BƏNÖVŞƏ, BƏNDƏ DÜŞƏ...

	12 fevral 2012


Onlayn ictimai-siyasi qəzet

Sevinc TELMANQIZI

BƏNÖVŞƏ, BƏNDƏ DÜŞƏ...

Ellikcə gözümüz aydın, üzərimizdən nəhayət ki, böyük bir yük götürüldü. Gender bərabərliyi ilə bağlı tədbiri də yola verdik. Milli Məclisdə “Məişət zorakılığına qarşı” qanun layihəsini də birinci oxunuşdan keçirdik. Kim indi qadınlarımıza gözün üstə qaşın var deyəcək? Qazanın dibi tutanda, uşaq səbəbli-səbəbsiz ağlayanda kişinin hünəri nədi qadına cınqırını çıxarsın? O boyda qanun qəbul edilib, zarafat deyil. Hələ mən Avropa Şurasını demirəm. Adamlar “məmləkətin bir nömrəli problemini” həll etdiyinə görə hökuməti alqışlayıblar da. Sitat eynən bu cürdür: “Ümid edirik ki, artıq parlamentdə birinci oxunuşdan keçən qanun layihəsi yaxın vaxtlarda qəbul olunacaq. Biz bundan məmnunuq”. Ürəkləri sakitləşməyib, özləri də əlavə bir konfrans keçiriblər ki, problem lap kökündən həllə qovuşsun...

Seçki ilində, camaatın ağır yaşam dərdindən belini bükdüyü günlərdə siz bunların həşirinə baxın. Təbii ki, bu mövqeyi qərəzli qəbul edib, “hər şeyin öz yeri var” deyə düşünə də bilərsiniz. Qüsura baxmayın, ilin-günün bu vaxtında problemləri “qadın azadlığı”, “kişi azadlığı” deyə bölməyin tərəfdarı deyiləm. Ölkədə sözün böyük mənasında insan azadlığı problemi var çünki.
Sözügedən mövzunu hansısa qadın təşkilatı gündəmə çıxarıb müzakirə etsəydi, “onlar da qrant qazanıb balalarını dolandırmalıdır” deyib birtəhər yola vermək olardı. Amma qosqoca Avropa Şurası. Biz ən azı bu günlərdə onlardan yaxınlaşmaqda olan seçkilərdə daha sərt mövqe, saxtakarlığı önləyəcək tədbirlər silsiləsi gözləyirik. Adamların demokratiya listəsində birinci yeri seçkilər tutmalıdır. Yoxsa ki, saxtakarlıqla seçilən deputatın qəbul etdiyi qanundan, eyni qayda ilə vəzifəyə oturdulan məmurun idarə etdiyi məmləkətdən kimə nə fayda? Doğrudanmı yenə, yenidən “biz çox narahatıq”, “qurum bu saxtakarlığa görə təəssüfünü bildirir” kimi sitatları dinləyəcəyik? Onda lütfən, nə onlar özlərini yorsun, nə də biz...
O qanunu qəbul edən, amerikanların, avropalıların xoşuna gəlmək üçün insan bərabərliyindən dəqiqələrlə nitq söyləyən deputatlara bir baxın siz. Hərəsinin ayağında nə qədər pozulmuş hüquq, incidilmiş insan, ana-bacı göz yaşı var, bir Allah bilir. Amma canları yanmasın, tolerantdılar və Avropaya bir addım da yaxınlaşıblar. Demək nəymiş? Bizim ölkədə qadınların çalışmaq, nə bilim, özlərini ifadə etmək azadlıqları yoxmuş. Külliyyatı yalandır ha. Əksinə, son illər Azərbaycan qadını tarixin heç bir dönəmində olmadığı qədər çox çalışır, qan-tərə batır, ailənin yükünü ərinin çiynindən götürməklə məşğul olur. Qul bazarlarından tutmuş təhsil, səhiyyə ocaqlarına qədər hər yerdə qadının ayaq izi var.
Parlament desən, orda da qadın deputatlar lazımi qədərdir (Guya sayları az olsa, məmləkətin həyatında nə dəyişəcək ki?). Media, ədəbiyyat, incəsənət... də onun kimi. Demək, problem hansı cinsin hansı sahədə nə dərəcədə təmsil olunmasında yox, necə təmsil olunmasındadır. Müəllimi, həkimi rüşvətə bulaşmış, sənətçisi qəfəsin içində, yazı-pozu adamı da hər an döyülmək, öldürülmək əndişəsi altında... Yəni çərçivəyə yox, şəklə diqqət! Öncə mənzərəni düzəldək, onu lap qızıldan çərçivənin də içinə sala bilərik...
“Subaya arvad boşamaq asandı” deyiblər. İndi bu xaricilər də Azərbaycan insanının gerçəkdən nə çəkdiyini bilmədiyi və ya bilmək sərf etmədiyi üçün özlərini dağa-daşa vurublar. Yox, qadın azadlığı, yox, uşaq əməyinin istismarı, ay nə bilim, məktəblərin kompüterləşməməsinin uşaq zehninə vurduğu zərbə... Halbuki bütün bunlara gələnə qədər daha ciddi problemlər həll edilməlidir. Sağ əllə sol qulağı qaşımaq məsələsi çoxdan dəb deyil. Dünyaya hər gün bir kəşf bəxş edən əcnəbilər doğrudanmı bunun fərqində deyillər?
“Poçt qutusu”nun Novruzəlisi həbs ediləndə ağası bir az bikef olmuşdu. Məsəli bizdən uzaq (lap elə yaxın), əcnəbilər də yenə bizə görə bikef olmuşdular. Amma şükür ki, problemi “həll etdilər”, hakimiyyətin də “qulağını burdular”. Qaldı yay ayında pəncərəyə bulaşmış milçək izinin təmizlənməsi... Yəni ən qlobal olanı. Mən də buna görə narahatam, görəsən, necə həll edəcəklər... Haydı, qolay gəlsin, cənablar!

639 dəfə baxılıb