“AHZADLOOK”umuzun SƏVİYYƏSİ

	09 sentyabr 2010


Onlayn ictimai-siyasi qəzet

Zamin HACI
zaminhaci@gmail.com

“AHZADLOOK”umuzun SƏVİYYƏSİ

Beynəlxalq insan haqları qurumları yapokratiya qazamatında heç bir suçu olmadan 3 ildir saxlanan jurnalist Eynulla Fətullayevə azadlıq tələb eləməkdən yorulmurlar. Bugünlərdə belə aksiyalardan biri Londondakı səfirliyimiz önündə keçirilib. Orada “Beynəlxalq Amnistiya”, “Artikl 19", İngiltərə PEN-Klubu və başqa qurumlar iştirak edib. Mən aksiyadan fotolara baxdım, həmin qurumların nümayəndələri bizim səfirlik anlasın deyə bəzi şüarları azərbaycan dilində yazmağa cəhd eləmişdilər və bir az komik cümlələr alınmışdı.

Məsələn, bir şüar belə idi: ”Ey-nu-la-nuh ah-zad ed-een". Başqa bir qadın isə əlində böyük hərflərlə “Ah-zad-look” yazılmış vərəq tutmuşdu. Təxminən elə bil bu şüarları bizim şanlı hökumət nümayəndələri Artur Rasizadə və Elmar Məmmədyarov yazmışdılar. Əslində, mümkündür ki, dilimizi xaricilərin bu cür “öyrənməsi” elə onların təsiridir, ingilis yazıq neyləsin, qarşısında həmişə Məmmədyarovu görür, o da azadlıq sözünü “ahzadlook”dan pis deyir.
Başqa yöndən, bu gün Azərbaycanda azadlıqla “ahzadlook”un elə bir fərqi də qalmayıb. İstəyirsən qazamatın içində ol, istəyirsən çölündə - ikisi də eyni bədbəxtçilikdir. Biz azadlıqın necə şirin nemət olduğunu hələ elliklə anlamaq səviyyəsinə çatmamışıq. Çatsaydıq, onu hansısa polis çavuşunun çəkməsi altında tapdaq olmağa qoymazdıq. Hakimiyyət də bunu görür, ona görə azadlıq əldə eləməyimizə imkan vermir, hətta “ahzadlook”u da bizə çox görür. İngilislər bizim jurnalistlərə azadlıq tələb edir, ancaq xəbərləri yoxdur ki, Səbayel rayon icra hakimiyyəti Nizami küçəsində qəzet satışını qadağan edib və başçının müavini bunu belə gülünc arqumentlə əsaslandırıb: “Bu addım insanların sağlamlığının təmini üçün atılıb”. Sanki qəzet təhlükəli virus mənbəyidir. Qəzetdən bu cür qorxan adamlara neyləmək olar? Bəlkə bu icra başçıları uşaq vaxtı qəzet peyvəndi edilməlidir?
Yeri gəlmişkən, ölkə içində yoxlama aparsan xalqımızın böyük çoxluğu azadlıq sözünün necə yazıldığını da bilməyəcək. Biz hələ azadlığın qrammatik səviyyəsinə də çatmamışıq. Mən bir yaşayış binasında “blloka düfürməyin” cümləsini görmüşəm və xeyli baş sındırmışam ki, görəsən “müəllif” bununla nə demək istəyibdir. Bu işdə təhsil sisteminin günahı da böyükdür. Buyurun, srağagün Tələbə Qəbulu Dövlət Komissiyasının başçısı Məleykə Abbaszadə deyib ki, daşqın rayonlarından ali məktəblərə sənəd verənlərin sayında bu il dəyişiklik olmayıb. Keçən il neçə abituriyent sənəd vermişdisə, elə bu il də təxminən o qədər olubmuş. İki aydan çoxdur evindən dərbədər düşən minlərlə insanın oxumaq eşqinə kimi inandırmaq olar? Burda yalnız bir səbəb var: həmin kəndlərdən qabaqlar da sənəd verən olmurmuş! İndi suyun altında qurbağa və çömçəquyruq oylağına çevrilən məktəblərdə ötən illərdə də dərs keçilmirmiş! Dəyişiklik olmamasının səbəbi yalnız budur.
Yeri gəlmişkən, təhsil qanununun mənhus bir cəhəti bu gün çılpaqlığı ilə ortadadır. Hələ bu qanun qəbul edilən ərəfədə idmanda dünya və Avropa çempionlarının, beynəlxalq müsabiqə qaliblərinin imtahansız qəbulu qaydası ora salınanda cəmiyyət buna ciddi etiraz etmədi. Buyurun, bu il 22 çempion artıq imtahansız qəbul hüququ qazanıb. Hələ bu idmançılar toya getməlidir, Mədəniyyət və Turizm Nazirliyi TQDK-ya nə az, nə çox - düz 35 beynəlxalq festivalın siyahısını verib! Bu festivalların qalibləri də imtahansız universitetlərə girə biləcəklər, dövlət hesabına oxumaq haqqı qazanacaqlar. Nə çətindir bir neçə min dollar verib həmin “beynəlxalq festival”ın diplomunu almaq? Kim gedib Moskvada bunu dəqiqləşdirə biləcək? Pullu məmurların uşaqları kef edəcəklər, kasıb uşaqlarının yerini tutacaqlar. Bu da sənə “bərabər təhsil hüququ”...
“Ah-zad-look” bizi belə xoşbəxt gələcəyə aparır.

730 dəfə baxılıb