YADPLANETLİ DEMƏ... | Yeni Müsavat

	06 sentyabr 2010


Onlayn ictimai-siyasi qəzet

Sevinc TELMANQIZI

YADPLANETLİ DEMƏ...

...Dəxi o da bizim birimiz

Elə gün olmaz ki, səhər gözümüzü açanda yadplanetlilərlə bağlı bir xəbər oxumayaq. Mübaliğə olmasın, amma anamızdan-dədəmizdən daha çox onların sorağını eşidirik. Məşhur filmin məşhur sitatında deyildiyi kimi, gəlirlər, yazırlar, gedirlər. Barələrində yüz minlərlə film çəkilib, kitab yazılıb. Amma doymaq bilmirlər. Beş dost, rəfiqə oturub söhbət etsin, yüz faiz aralarından biri “nə vaxtsa, gecə saatlarında” göydə bir yadplanetli işığı gördüyünü iddia edəcək.

Hələ mən kənd yerini-filan demirəm. Şişirtməli söhbəti sevən kənd adamları bəlkə də bir qonşusunun fənərlə işıq saldığı tarlada yadplanetliləri gördüyünü iddia etməklə kifayətlənməz, onları şillə-yumruğun altına saldığını, axırda da “o yekəbaşların” ondan üzr istəyib əl-ayağından öpdüyünü iddia edər. Yəni belə hekayələr minlərlədir.
Ən geniş yayılanı isə yadplanetlinin bir insanı qaçırıb aparması, günlərlə, aylarla öz gəmilərində saxlayandan sonra geri qaytarması ilə bağlıdır. Ən çox da belə hekayələrə gülürəm. Yəni kənd camaatı demişkən, o yekəbaşlar Yer planeti barədə tonlarla ağırlığı olan bilgiləri hansısa Məmmədhəsəndən öyrənməyə çalışır. Yox bir, daha nələr...
Amma rus demişkən, “heç vaxt ”heç vaxt" demə". İyunun 10-da İspaniyanın Beynəlxalq Təhlükəsizlik Mərkəzinin 2003-cü ildə hazırlanmış gizli bir sənədi ortaya çıxıb. Sənədə görə, dünyadan 4,3 işıq ili uzaqlıqda olan Alpha Centauri planetində yaşayanlar türk dilində danışırmış. Alpha Centauridə yaşayanların iki cinsi varmış - biri bəni-insan övladını xatırladır, o biri isə nəsə əcayib-qəraibmiş. Tez-tez Yer kürəsinə gəlib araşdırma aparır, amma nə istədikləri bilinmirmiş.
Nəsə, bizə məsələnin dillə bağlı olan hissəsi maraqlıdır. Bayaq zarafata Məmmədhəsən dedim ha. Nə bilirsiniz bəlkə elə zavallı kəndlilərin danışdığı əhvalatlar doğru imiş? Düşüblər yadplanetlilərin yanına, onlara füzulilər demiş, yaşamağın “yolunu-yolağası”nı öyrədib, sonra da qayıdıblar geri. Özü də doğmaca dilimizdə. Hansı ləhcə ilə olduğunu deyəmmərəm, çünki İspaniya Beynəlxalq Təhlükəsizlik Mərkəzi bu barədə heç nə deməyib. Nəsə, hədəfləri kiçiltməyək. Hamımız azərbaycanlı döyülükmü?
Təbii ki, bu informasiya millət olaraq bizim dünyadakı hörmətimizi, nüfuzumuzu artırıb. O boyda Çörçil... pardon yadplanetlilərə dilimizi öyrətmişik. Yəni Alpha Centauridə (zəhrimarın adı da adamın dilinə yatmır) “bizim adamlar” yaşayır. Dili bir qardaşlarımız. Heç kimsə bizi hirsləndirməsin, Alphaya xəbər göndərərik, başlarına göydən daş-dəmir, ulduz, meteorit - nə gəldi qolazlayarlar. Digər tərəfdən dilimizi bilirlər ya, yəqin xasiyyətimizi də götürüblər. Yəqin o planetdə də göydələnlər dəbdədir, “qaqaşlar” inomarka sürür, rüşvətsiz iş ötmür...
Nə vaxt bu sahədə dara düşsək, bir xəbər yollarıq. Dərhal gəmilərinə minib dadımıza yetərlər. Yayda uşaqları da götürüb rahatca Alphada istirahətə gedə bilərik. Ekzotika olar - kiçik həblərlə nahar, şam yeməyi, uzay gəmisinə minib marketə getmək, əcaib-qəraib alətlərlə ən çətin işləri həyata keçirmək...
Qulağa xoş gəlir. Sadəcə məni narahat edən bilirsiz nədi? Bunlar doğmaca türk dilimizdə danışırlar, düzdü? Tutaq ki, bir gün paytaxtımızı görmək üçün bu tərəfə təşrif buyurdular. Özü də çaşıb yekə gəmilərini saxladılar “Torqovı”da. O mağazada, kafedə adamla rus dilində danışılan, azəricə söz deyəndə satıcıların ağızlarını büzdüyü küçə var ha, oranı deyirəm. Azəricə söz deyənləri “çuşka” adlandıran adamların küçəsi. Allah eləsin, yadplanetlilərin yolu ora düşməsin. Yoxsa, biabır olarıq.
Bəlkə də düşsə yaxşıdı. Bəlkə onların sayəsində daha doğma dildə danışanlara yadplanetli kimi baxmazlar. Dilimiz kainatın dörd bir tərəfinə yayılıb, zarafat deyil. Dəblə ayaqlaşmaq lazımdır.
Hər işdə bir xeyir var. Dilimizin qurtuluşu yadplanetlilərin əlindədir.

218 dəfə baxılıb