OPERATİV DƏDƏ QORQUD | Yeni Müsavat

	12 fevral 2012


Onlayn ictimai-siyasi qəzet

Sevinc TELMANQIZI

OPERATİV DƏDƏ QORQUD

Yaşasın! Artıq balalarımız bütün dərd-bəladan sığortalandı. Prezident Aparatının tövsiyəsi ilə Milli Məclis yeni qanun yaratdı. Bundan sonra yeni doğulmuş uşaqların qeydiyyatı daha sürətli, daha operativ həyata keçiriləcək. Bəs necə? Uşaq ki, doğulantək ad almadı, dövlətin şanlı qeydiyyatına düşmədi, tay o nə uşaq oldu? Ondan əlinizi üzün, vəssalam. Milli Məclis hesab edir ki, bizim valideynlər Dədə Qorqud sayağı, uşaq şücaət göstərməyincə ona ad qoymur. Bu isə çoooox böyük fəlakətlər yaradır.

Fəlakətin qarşısını almaqçün hətta cərimələr də tətbiq olunub. Xəbəriniz olsun ki, əgər bu günə qədər doğum haqqında məlumat uşağın doğulduğu gündən ən geci 3 ay ərzində verilməli idisə, Milli Məclis üzvləri bu müddəti 1 aya endirdilər. Və qərar verdilər ki, bu müddəti ötürən məsul şəxsləri də (həkimləri, qeydiyyat şöbəsinin işçilərini) 100 manatdan 300 manatadək cərimə etsinlər. Necədi, bunu istəyirdiz?
Doğrudanmı hökumət bu qədər sadəlövhdür, yoxsa camaatla oynayır? Bəlkə yenicə ata-ana olmuş insanların xəstəxanalarda başına gətirilənlərdən xəbəri yoxdur? Valideynlər ordan çıxandan sonra psixoloji gərginlikdən bir neçə ay özlərinə gələ bilmirlər. Həkimlərin pul tələləri, mənəvi təzyiqləri, antisanitariya şəraitindəki xəstəxanaların yaratdığı fəsadlar, tibbi personalın yeni anaları sındırma metodları... Bütün bunlar gerçək həyat məktəbidir, mənə inanın. Onu bir dəfə yaşayan adam çətin ki, tezliklə təkrar uşaq sahibi olmaq arzusuna düşsün və ya yolunu hansısa dövlət idarəsindən salsın.
Mən demirəm ki, yeni ata-analar bunu yaşayıbsa, uşağı qeydiyyatdan keçirməsin və ya ad qoymasın. Sadəcə deputatların problemin kökünü qoyub, yan-yörəsində fırlanmasıdır adamı yandıran. Uşaq qeydiyyata ilk ay düşdü, ya üçüncü ay - bunun ona, gələcəyinə nə təsiri var axı? Qoçaqsınızsa, dişiniz batırsa, problemə doğum evlərindən başlayın. Ana namizədi ilə doğum sövdələşməsi aparılmasından, bir palatada 7 xəstənin yatızdırılmasından, pul ödəməyincə tibb bacılarının körpələrin altını dəyişməməsindən... Hansı birini sadalayım? Havadan danışmıram - ötən ilin dekabrında yolum bir doğum evinə düşmüşdü. Daha konkret desək, xalq arasında adına “respublikanski” deyilən xəstəxananın doğum şöbəsinə. Səhər saat 7 radələri idi və Təcili Yardım Maşınında xəstəxanaya çatdırılarkən yolda uşaq dünyaya gətirən bir qadının başına gələnlərin canlı şahidi oldum. Qadın dünyaya uşaq gətirmişdi və heç kəs ona sahib durmaq istəmirdi. Təcili Yardımın həkimi deyirdi, bizlik deyil, həyətə girəndə doğuş gerçəkləşdi. Xəstəxananın qəbul şöbəsi isə uşağı qəbul etmirdi ki, “hadisə” bura gələnə qədər baş verib. Və həmin anda bayğın vəziyyətdə uzanan ana heç nəyin fərqində deyildi. Dekabrın soyuğunda nazik bir mələfəyə bürünmüş körpə isə dayanmadan qəbul şöbəsindəki masanın üstündə ağlayırdı... Bunu niyə xatırladım? Çünki biz bu cür rəzil bir mənzərənin yaşandığı məmləkətin üzvləriyik. Sırf ana bayğın vəziyyətdə olduğu, ortada həkimləri pul yağışına tutacaq ata olmadığı üçün körpəyə də heç kim sahib dayanmırdı. Bunca rəzillik yəni... Həmin uşağın bir və ya üç ay sonra qeydiyyata düşməsinin nə fərqi var? Adını gec qoyacaqlar, tez qoyacaqlar, bunun dövlətə hansısa istisi-soyuğu varmı? Deməyim odu ki, sağ qulağı sol əllə qaşımaq əvəzinə, hərə öz işi ilə layiqincə məşğul olsa yaxşıdır.
Yoxsa ki, daha öncə də buna bənzər bir qanun qüvvəyə mindi. Ana bətnində olan körpənin cinsiyyəti söylənilməsin. Ki, analar sırf oğlan dünyaya gətirmək üçün bətnlərindəki qızları məhv etdirməsinlər. O da şübhəsiz ki, pul tələsi idi, yeni qanun da.
Hə, ilk bir ayda valideynlərin başı qarışsın uşağın yeməyinə, pampersinə, uşaqgörməsinə gələn qohum-əqrəbaya süfrə açmağa... Qeydiyyat yaddan çıxsın, şanlı hökumətimiz bəbənin adını bilməsin. Bu cür qanun pozuntusu etdiyi üçünsə özü də, dövlət idarəsindəki məmurlar da 100 manatdan 300 manata qədər cərimələnsinlər. “Mozalan”ın məşhur səhnəciyini improvizə etsək - bəs bu pullar kimə çatsın? Tər-bi-yə-çi-yə! Yəni yenə, bir daha, yenidən başda oturanlar qazansın...Başqa nə cür olmalıydı ki?
Odu ki... Haydı, hər kəs ad düşünməyə! Dədə Qorqud olmaq artıq ziyan gətirir. Siz adı bir ay ərzində qoyun, uşaq şücaəti sonradan necə olsa göstərər.

855 dəfə baxılıb