BİRCƏ ZURNA KƏMDİR | Yeni Müsavat

	09 sentyabr 2010


Onlayn ictimai-siyasi qəzet

Zamin HACI
zaminhaci@gmail.com

BİRCƏ ZURNA KƏMDİR

Hərənin bir dərdi var. Mən artıq bir ildir futbol kimi mənasızlaşmış, mərc kontorlarının fırıldaq məkanına çevrilmiş bir oyuna baxmaqdan imtina eləmişəm, ancaq indi görürəm ki, camaat da yavaş-yavaş haqqın yoluna gəlməkdədir. Məsələn, hazırda Cənubi Afrika Respublikasında dünya çempionatı keçirilir, internetdə şərhləri izləyirəm, görürəm futbol qalıb qıraqda, hamı vuvuzeladan danışır, yazır. Bu vuvuzela təxminən bizim zurna kimi musiqi alətidir, afrikalıların milli aləti sayılır, səsi də, eşitmədiyim üçün rəylərə əsasən yazıram - həm arı vızıltısına, həm eşşək anqırtısına bənzər çıxır. Doğrusu, bir alətin eyni zamanda həm arı, həm eşşək səsi çıxartması da orijinal şeydir. Bu da yəqin musiqi alətlərinin “eşşəkarısı”dır.

Uzun sözün qısası, azarkeşlər şikayətlənir ki, stadionda vuvuzela çalanların səsindən dünya çempionatını izləmək müşkülə çevrilibdir. Guya oyunlarının az qala hamısı heç-heçə bitən bir çempionatı izləmək çox önəmliymiş. Bir oyun ki, uzağı bir aydan sonra tamam yaddan çıxır, bundan ötrü vaxt ayırmağa, çığır-bağır salmağa dəyərmi? Hələ bunun statistikasını aparan gülməli adamlar da var. (Etiraf edim, vaxtilə orta məktəbdə oxuyarkən mən də bu gülünc işlə məşğul olmuşam). “Filan oyunun neçənci dəqiqəsində qol vuruldu”, “neçə adam sarı vərəqə aldı”, “hər komandaya nə qədər künc vuruşu düşdü” - gülməli işlərdir bunlar. Tutaq ki, Messi oynayıb milyonlar qazanır, bundan sizə nə? Yenə özü arada-bərədə məhəllədə futbol oynayan adamları başa düşürəm, ancaq ömrü boyu ayağına top dəyməyən adamların dəhşətli həvəslə futbol izləməsi gülməlidir. Futbola baxmaqla hansı mənəvi, ruhi qidanı almaq olar? Vuvuzela çalanlara eşq olsun! Bərkdən püfləyin, qardaşlar, nəfəsiniz gəlsin!
Eyni zamanda bu vuvuzela ağlıma ideya saldı. Gərək afrikalılar Milli Vuvuzela Festivalı keçirtsinlər, bizdə muğam festivalı olan kimi. Dövlət səviyyəsində vuvuzelaya dəstək olsun, camaat da banan ağacında oturub vuvuzela püfləyənlərə “esemes” göndərsin. Bu çox lazımlı işdir. Bax, bizdə hər il “Milli Qurtuluş Günü” adıyla mənası heç kimə məlum olmayan bayram keçirilir. Nədən qurtulmuşuq, kimdən və niyə canımız qurtarıb - qəti bilinmir. Ona görə xalq da bu bayramı maraqla qeyd eləmir. Yaxşı olar yapçılar gələn il 15 iyun üçün Afrikadan çoxlu vuvuzela alıb gətirsinlər, üfürsünlər, xalqda maraq oyansın. Zurna çalmaq da mənalı olardı, ancaq vuvuzela daha ekzotikdir.
Vuvuzela qalsın burda, sizə nəql edim bizim AzTV-dən. Dünən bu telekanal karikaturası özünün akademiyasının açılışını edibdir. Təsəvvür edin, Arif Alışanov camaata televiziya sənəti öyrədəcəkdir. Bu “akademiyaya” rəhbər isə Etibar Babayev qoyulubdur - “Space” kanalının keçmiş şefi. Baxanlar bilir, “Space” hətta iqtidar telekanalizasiyaları içərisində də həmişə ən maraqsızı olub. İndi buna rəhbərlik etmiş şəxs xalqa televiziyaçılıq öyrədəcək. Əlbəttə, niyə öyrətməsin, ona qalsa talon oğrusu seçki keçirdir.
Yenə Vasif Talıbovun - Naxçıvan xanının canı sağ olsun, əsl səmimi adam odur. Bugünlərdə yoldaş Talıbovun canlı lətifələri silsiləsinə daha biri əlavə olunubdur. Naxçıvan xanı nökər-naiblərini yığıb deyib ki, biz gərək bu il 300 park yaradaq. Hamı çaşıb qalıb ki, Naxçıvan balaca yerdir, burda bir ilə 300 parkı necə qurmaq olar. Ancaq kimsə fasilədə fürsət tapıb Talıbov üçün yazılmış çıxışın mətninə baxıb, görüb orda belə cümlə var: “Bu il Naxçıvanda zoopark (xan latın qrafikasını hələ öyrənə bilməyib, ona görə çıxışlarını kirillə yazırlar- Z.H.) yaradılmalıdır”. Demə xan bu “zoopark” sözünü “300 park” kimi oxuyubmuş.
Vuvuzela çalanlara bir daha eşq olsun.

1016 dəfə baxılıb