8 TƏLƏBƏYƏ 9 NÖV PLOV

	06 sentyabr 2010


Onlayn ictimai-siyasi qəzet

Sevinc TELMANQIZI

8 TƏLƏBƏYƏ 9 NÖV PLOV

Əslində dünəndən planlaşdırmışdım ki, bu gün Türkiyədə təmtəraqla qutlanan babalar günündən yazım. “Qonşunun toyuğu qonşunun gözünə qaz kimi görünür” deməyin. Yanğınsöndürənlərdən tutmuş, tankçılara qədər təqvimin hər gününü bir məslək yiyəsinə, yerli-yersiz tarixi hadisəyə ayıran hökumət nəyə görəsə ataları unudub.

Təsəvvür edin ki, bizim məmləkətdə hətta insan haqları günü də varmış - 18 iyun. O insan haqları ki, parlamentdə onun adını daşıyan komissiyaya Rəbiyyət Aslanova rəhbərlik edir. O Rəbiyyət Aslanova ki, müxalifətin son aksiyasında saxlanılanların Qobustana aparılmasını alqışlayıb, öz aləmində ironiya edərək “səyahətdir də, havası da gözəldir. Qoy gəzsinlər” deyib. Yəni bax bizdə insan haqları bu qədərdir.
Nəsə, mövzudan uzaqlaşmayaq. “Cənnət anaların ayaqları altındadır” - orasını qəbul etmişik. Amma bəs bu cənnəti onların ayaqları altına sərməkdə iştirakçı olan atalar? Təqvimin bir gününü doğrudanmı onlara çox görmüşük? Atalar dəyərlidir, ilin bir günü onlar üçün azlıq edir demaqoqiyasını da boş verin. Bayram bəhanədi - sevdiklərimizi xatırlamağa, onların könlünü xoş etməyə, hədiyyələr alıb sevindirməyə. “Bəhanə yaratmaqda mahir olan hökumət lütfən bu məsələdə yersiz təvazökarlıq göstərməsin” deyə söhbəti davam etdirəcəkdim ki...
Xəbər saytlarında gözümə ilginc məlumat sataşdı. İyunun 18-də Azərbaycan Dillər Universitetində (ADU) “Plov günü” keçirilib. Tədbirin əsas məqsədi universitetə Yay məktəbi keçmək üçün gəlmiş 8 nəfər amerikalı tələbəyə Azərbaycanın milli mətbəxi, mədəniyyəti haqqında məlumat verməkdən ibarət olub. Tədbirdə 9 növ Azərbaycan plovu bişirilib. Sonra hazırlanmış plov çeşidləri amerikalı tələbələrə təqdim olunub. “Bu nə plov, bu nə fisincan” bax belə yerdə deyirlər. Dövlət Dillər Universiteti hara, plov hara? Demirsiniz adamlar bura yay məktəbi keçməyə gəliblər, məqsədləri də Azərbaycan dilini öyrənməkdir? Bəs rusun sözü, priçyom plov? Yaxşı, lap tutaq ki, onlara dillə yanaşı, Azərbaycanın mədəniyyətini, tarixini, adət-ənənələrini də tanıtmaq istəyirsiniz. Doğrudanmı bunun üçün ağla gələn ilk iş 9 növ plov (görməmişliyə baxın - 8 tələbəyə 9 növ plov) bişirməkdir? Yayın cırhacırında yağlı-buğlu 9 plov. Bəs harada qaldı digər mədəni irslər, xalqımızın daşdankeçən adətləri? Mətbəxi minlərlə çeşid yeməklə zəngin olan amerikalını 9 plovla təəccübləndirmək “istedad”ını ancaq bizimkilər göstərə bilər, vəssalam.
Uzun müddət “Mətbəxdə” adlı rubrikanın müəllifi olaraq deməyə haqqım çatır ki, Azərbaycan mətbəxi heç də öyünüləcək qədər zənginliyə sahib deyil. Yəni, bunu mən yox, mətbəx sahəsində püxtələşmiş şəxslər, mütəxəssislər deyib. Elə az-çox üzə çıxarılası yeməklərimiz varsa, onların başında plov gəlir. Amma bu, adına Azərbaycan Dillər Universiteti deyilən təhsil ocağında plov şousu göstərməyə əsas vermir. Xarici tələbə qarşısında plovdan başqa öyünüləcək heç nəyimiz qalmayıbsa, fəlakətin astanasındayıq. Azərbaycan dili, mədəniyyəti, tarixi bu qədər tükənib? Yerli tələbələr öz bilik-bacarığı, lap elə ingilis dilinin amerikan ləhcəsində tum kimi çırtdamaqla o 8 tələbəni təəccübləndirə bilmədi? Müəllimlər Avropa standartlarına uyğun metodika, tədris planları ilə qonaqları şoka salmaqda aciz qaldı? Bilirəm, gülməli görünür...Amma iyunun cırhacırında 9 növ yağlı plov da bir o qədər gülməlidi.
“Demokrasidə çarələr tükənməz” deyib abilərimiz. Hərçənd ki, bizdə demokrasi yoxdur, amma burda nəsə yerinə düşdü deyə yazdım. Demək, məqsəd 8 tələbəni təəccübləndirməkdir, deyilmi? Təklif edirəm, universitet rəhbərliyi, Təhsil Nazirliyi, eləcə də digər ali təhsil ocaqları əl-ələ verib, əllərində olan bütün faktları o binəvalara göstərsinlər. Məsələn, 100 balla “dütdülü” özəl ali məktəbə daxil olan tələbənin bir il sonra ölkənin ən nüfuzlu sayılan universitetinin nüfuzlu fakültəsində peyda olmasını, ceyran belindəki zaçot-imtahan qiymətlərini, adına sinifkom deyilən şəxsin dekanın “meneceri” olmasını, topdan qiymət yazılışı ilə məşğul olan müəllimlərin kimliyinı, professor müəllimlə elmlər namizədi müəllimin imtahan “taksa”sı arasındakı fərqini... ədəb-ərkanla xarici qonaqlara başa salsalar, bu isti gündə soyuq duş effekti yarada bilərlər. Təəccüb də ki, öz yerində.
Yoxsa ki, düyü süz, onu dəmə qoy, 9 cür aş qarası hazırla... Sonra da gözlə ki, hansısa Kevin onu bəyənsin... Bir də ki, təhsilimizdən bozbaş iyi gəldiyini bu qədər nümayiş etdirməyin yeri yoxdur. Analoqu olmayan dövlətə yaraşmaz ən azı...

239 dəfə baxılıb