SÜNBÜLQIRANIN NAĞILI | Yeni Müsavat

	06 sentyabr 2010


Onlayn ictimai-siyasi qəzet

Zamin HACI
zaminhaci@gmail.com

SÜNBÜLQIRANIN NAĞILI

Naxçıvanda bir müəllimi zorla iməciliyə aparıblar, ağac dibi belləyərkən onu ilan çalıbdır. Müəllim hazırda ağır durumda xəstəxanada yatır. Vasif Talıbovun ağalıq elədiyi məmləkətdən belə xəbərlər tez-tez gəlir. Adətən müəllimləri ya ilan çalır, ya da tutub döyürlər. Günah kimdədir, əlbəttə müəllimlərdə. Gərək onlar vaxtilə Talıbova yaxşı dərs keçəydilər. Adam həmişə özünün qazdığı quyuya düşür.

Naxçıvanda çox dayanmayaq, uçaq gedək Şəkiyə, yoxsa bizi də tutub apararlar iməciliyə, ilan ağzına düşərik.
Şəkidə kəndlilərə torpaqdan istifadə üzrə dövlət yardımları verilirmiş. Hakimiyyətin bu işlə məşğul kadrları həmin məsələdə əsl Şəki lətifəsi yaradıblar. Deməli, yardım alan kəndlilərin torpaq mülkiyyəti sənədlərini saxtalaşdırıblar. Məsələn, hər hektar taxıl sahəsinə görə 1000 dollar yardım veriləcəksə, kəndlinin də cəmi 300 sot torpağı varsa, yalandan kağızda yazırmışlar ki, filankəsin 5 hektarına 5 min dollar yardım verildi. Kəndli ilə təbii ki, öncədən razılaşma olurmuş: “Sən öz torpağına uyğun pulu al, qalanı mənim olsun”. Beləcə, Şəkinin taxıl “əkilən” torpaqları şişib olub hardasa Qazaxıstan düzləri boyda. Bir gün mərkəzdən yoxlama gəlib, sənədlərə baxıblar, məlum olub ki, hazırda Şəkidə adam yaşayan bir qarış da yer qalmayıb, elə rayonun bütün ərazisi taxıl zəmiləridir. Komissiya da pulunu alıb, çıxıb gedib işinin dalıyca. Bu olaydan çıxan ibrətamiz nəticə odur ki, gərək xalq naşükür olmasın. Hərə bir yandan eşirsə, sən də bir yandan sök getsin. Çox o yan - bu yan eləsən hökumət səni lap sünbülqıran sayar. Haqqı da var - taxıl zəmisində yaşamırsanmı?
Bu yaxında “Azadlıq” radiosundan dostumuz Babək Bəkir çox maraqlı bir araşdırma aparmışdı. Dövlət Neft Şirkəti və Ekologiya Nazirliyi guya neftlə çirklənmiş torpaqları təmizləyir, oralarda meşə salırlar. Belə “meşələrdən” biri də Balaxanı neft mədənləri tərəfdədir, Badamdara qalxan yoldan görünür, yaşıllıq bir yerdir. Qabaq neft-mazut gölməçələri, çirkab, zibillik bir yerdə indi yaşıllığın pöhrələnməsini görəndə adamın ürəyi açılır. Ancaq Babək bəy bizim kimi uzaqdan baxmayıb, yaxına gedib görüb ki, burda ağac-zad bitməyib, əkilənlər quruyub, yaşıl görünən də... onları külək sındırmasın deyə bağlanan taxtalardır! Yapokratiyanın “altı təzək, üstü bəzək” siyasətinin bundan yaxşı simvolu olmazdı. Fırıldağın unikallığı həm də ləzzət elədi. Görünür, bunlar xalqın pullarını zarafat eləmədən, məzələnmədən, zövq almadan əkişdirmək istəmirlər.
Hələ məncə, bunun ardı da olacaq. Məsələn, payızda həmin taxtaları sarı-qırmızı rəngə boyayarlar, fəsilə uyğun olsun deyə. Təklif edirəm hökumətimiz o taxtaların üstündə qırmızı dairələr də çəksin, xalq uzaqdan elə bilsin ki, ağaclar alma gətiribdir. Şəkil kimi hökumətimiz var, ta nə istəyirsiniz?
Elə indicə saytımızda Ramiz Mehdiyevin Konstitusiya Məhkəməsi haqda kəskin açıqlamasını oxudum və az qaldım kompyuteri bağlayıb köşə yazarlığından istefa edim. Sən hələ fikir ver, gör Prezident Administrasiyası şefi ən ali məhkəmə orqanımız haqda nə deyir: “Konstitusiya Məhkəməsini alver ocağına çevirmisiniz”. Əla cümlədir. Bizim müxalifət liderləri öz internet bloqlarında hakimiyyəti heç belə kəskin tənqid eləmirlər. Ümumiyyətlə, Ramiz bəy televiziyaları tənqid elədi - televiziyalar düzəldi, daha heç kim bizim telekanallara baxmır. Sonra təhsili tənqid elədi, müəllimləri ilan çaldı. İndi də Konstitusiya Məhkəməsi... Alver ocağı nə deməkdir? “Sədərək”, “Binə” yarmarkaları kimi bir yer yəni. Konstitusiya Məhkəməsinin əlində mal olaraq ancaq konstitusiyamız var, deməli, onlar konstitusiyanı satırlar. Maddə-maddə, paraqrafla. Topdan alanlara güzəşt var. Axırıncı dəfə 1-ci maddə (“Azərbaycan Respublikasında dövlət hakimiyyətinin yeganə mənbəyi xalqdır”) 5 qəpiyə satılıb.
Mehdiyevin bəyanatında bir hissə diqqətimi çəkdi, burada “yarmarkanın” açılma vaxtı göstərilir. Məhkəmənin sədri Fərhad Abdullayevə xitabən deyib: “Konstitusiya Məhkəməsi müqəddəs bir qurum olmalıdır. Vaxtilə bura çox müqəddəs bir məhkəmə idi. Ancaq siz təyin olunduğunuz bu 7 il ərzində məhkəməni alver ocağına çevirmisiniz, vətəndaşların hüquqlarını qorumaq əvəzinə, onların pozuntusu ilə məşğul olursunuz”.
7 il... Çox maraqlıdır. 2010-dan 7 çıxanda 2003 eləyir. Bu 7 ildə Fərhad Abdullayev kimin prezident seçilməyini 2 dəfə təsdiq edibdir?
Sualın cavabını tapanlar Şəkidə taxıl zəmisi ilə təmin ediləcəkdir.

777 dəfə baxılıb