ÇƏKİRƏM HAAA... | Yeni Müsavat

	05 fevral 2012


Onlayn ictimai-siyasi qəzet

Sevinc TELMANQIZI

ÇƏKİRƏM HAAA...

Ehtimal var ki, bundan sonra hamımız tanınmışlar sırasına qatılaq, lap elə ulduz olaq. Neyçün ki, artıq Bakının hər köşəsinə videokameralar quraşdırılacaq, hara getsək bizi təqib edəcək, hər hərəkətimizi müvafiq idarələrdə, müvafiq şəxslər izləyəcəklər. Bir növ onlar olacaq paparatsi, biz də ki, kaprizli ulduzlar. “Xeyransa bu gün qarderobundakı hansı paltarla şəhərə çıxdı? Az sonra...”, “Məmməd dondurma yeyərkən qızlar ona necə söz atdı? Bizi izləyin...” Sağımız-solumuz maqazin olacaq, görərsiniz.

Parkda, mağazada, yolda-izdə - hər yerdə səksəkə ilə gəzəcəyik. Ay aman, görəsən kameraya düşdümmü? Yolda həyat yoldaşının üstünə qışqıran, yelləncəyə mindirmədiyi üçün uşağını ağladan da qorxacaq, oğrusu da, cibgiri də. Sabah bu əməlinə görə qanun qarşısında başı ağrıyacaqmı deyə. Sonuncu iki kateqoriyadan olanlar elə qorxsa yaxşıdır, amma deyim ki, Azərbaycan insanını bu cür səksəkə içində saxlama cəhdi çox şeydən xəbər verir.
Məsələn, əhalinin bir qismi düşünür ki, bu, seçkiöncəsi camaatı qorxutmaq üçün edilir. “Kim, harada, nə zaman” verilişi hazırlayır hökumət. Faktları toplayır, daha sonra istədiyi vaxt istədiyi adamlara qarşı bunlardan istifadə edəcək. 2003-cu il 15-16 oktyabrı xatırla...
Başqa bir qism iddia edir ki, onsuz da hökumət artıq heç kimdən qorxmur, bu tip kameraları isə ancaq ona görə quraşdırır ki, Bakı az-maz xarici şəhərlərə oxşasın.
Bizim camaat kameranı sevmir, bilirsiz. Söhbət sıravi olanlardan gedir. Ağlınız xarici ölkələrdəki kamera zarafatı çəkən verilişlərə getməsin. Amerikadakı Conun başından aşağı qıpqırmızı “kraska” tökürlər, cınqırını da çıxarmır, hələ bir axırda kameraya əl yelləyib, “chiiiz” də deyir. Niyə? Çünki onunçün həyat gözəldi, dərd-səri az, qayğısı lap az. Bu tip, türkün sözü, eşşək şakalarına da gülə-gülə “o may qaad” deyib keçə bilirlər. Televiziyada işləyən bir tanışım danışır ki, bizimkilərin belə verilişləri çəkməsi it zülmünə başa gəlir. Məsum bir zarafata görə qırğın qoparan bakılılar hətta məsələni telekanal rəhbərliyinə qədər gətirib çıxarır. Camaatımızın yumor hissi vaxtilə olub, amma indi bir çox şeylər kimi o da tükənib. Bir də ki, göz gördüyündən qorxar. Hamı bilir ki, bu cür kamera zarafatının axırı başqa bir kamerada qurtara bilər...
Kamera demiş, o ki hakimiyyət bu cür canfəşanlığa başlayıb, məsləhətdi ki, o gözəlim kameralardan rüşvətxor həkimlərin, müəllimlərin, digər məmurların da kabinetinə yerləşdirsin. Bəlkə belədə az-maz rüşvət azalar. Bakı küçələrinin canı candı, bizimki yox? Amma yenə də pessimistlik adamı rahat buraxmır. Dedim axı, göz gördüyündən qorxar. Adamın yadına “Azadlıq” qəzetinin baş redaktoru Qənimət Zahidin, eləcə də bloqqerlər Emin Milli ilə Adnan Hacızadənin məhkəməsi düşür. Qənimət bəy məhkəməsi boyunca hakimdən tələb etdi ki, “Azərbaycan” nəşriyyatının yanındakı kameranın görüntüləri məhkəmə sübutlarına əlavə edilsin. Neyçün ki, ordakı görüntülər əsl gerçəyi, yəni, kimin kimi döydüyünü ortaya qoyacaqdı. Amma nə oldu? Məhkəmə aylar boyu o görüntüləri tapıb işə əlavə etmədi. Bloqqerlərin işində də eyni həngamə çıxdı. Söz vaxtına çəkər. Ötən il bu vaxt bloqqerlər lLivanÂ» restoranındakı hadisədən sonra Səbail rayon 39-cu polis bölməsinə gəlmişdilər və döyülmələri barədə şikayət etmişdilər. Bu halı bölmənin yaxınlığındakı videokameralar qeydə alsa da, vəkillərinin müraciətinə rəğmən həmin kadrlar məhkəməyə təqdim olunmadı. Demək ki, hökumətin kamerası da elə onun özü kimi işləyir. İstəyəndə çəkir, istəməyəndə yox...
Yəqin ki, çoxunuz məşhur Hollivud filmi “Truman şou”ya baxmısınız. 30 yaşlı Trumanın doğulduğu gündən etibarən bir realiti şounun qəhrəmanına çevrilməsi və özünün bundan xəbərsiz olması yadınızdadırmı? Yaşadığı evdən tutmuş, evləndiyi qıza qədər hər şey bir şounun tərkib hissəsiydi. Hər yer kamera, bütün yaşadıqları isə film kimi milyonların evində izlənirdi. Və bütün yaşamının bir şou olduğunu öyrənəndə keçirdiyi sarsıntı.
Məncə, bizim hamımızı Trumanın gününə salacaqlar. Yeni şoulara hazır olun...

697 dəfə baxılıb