XARİCİ SİYASƏTDƏ AYI FAKTORU

	06 sentyabr 2010


Onlayn ictimai-siyasi qəzet

Zamin HACI
zaminhaci@gmail.com

XARİCİ SİYASƏTDƏ AYI FAKTORU

Nəqliyyat naziri Ziya Məmmədovun oğlu Anarın Qəbələdə ayı yeməsi haqda xalq dastanlarının ağızlarda dolaşdığı bu isti yay günlərində acı bir etiraf xarici işlər nazirindən gəldi. Elmar Məmmədyarov deyir ki, Qarabağ danışıqları mənasız bir şəkil alıb. Sitat: “Danışıqlar keçirilən zaman razılaşdırılmış məsələlər bir kənara atılır və başqa məsələlərin müzakirəsinə keçirilir. İki görüş sonra biz yenidən müzakirə etdiyimiz məsələlərə qayıdırıq".

Bax neçə ildir biz elə bunu yazırıq! Yazırıq ki, yapokratiyanın xarici siyasəti tamam mənasızdır, Azərbaycanın mənafeyinə qətiyyən uyğun deyil, 17 ildir bunlar uğursuz xarici siyasətlə xalqımızın başını piyləyir, daxili sərvətləri əkişdirməklə məşğul olurlar. Yazırıq ki, xarici işlər nazirlərinin, prezidentlərin, diplomatların görüşləri heç nəyi həll eləmir. Yazırıq ki, fərasətsiz bir hakimiyyətimiz var... Ancaq yapokratlar bizi uğurları görməməkdə suçlayır. Labirintə salınmış siçanlar kimi dövr eləmək, iki görüş sonra yenidən müzakirə edilmiş məsələyə qayıtmaq uğurdurmu? Bu, artıq fiaskonun etirafıdır. Məmmədyarovun yerinə kim olsa, istənilən sivil dövlətin naziri olsa istefa verməliydi.
Burda ermənidə suç axtarmağın da mənası yoxdur. Ermənistan bizim ərazimizi işğal edib, bununla da düşmən olduğunu bildirib. Bundan artıq bizə nə edə bilər ki? Günah yapokratiyadadır, onun yarıtmaz kadrlarındadır. Çalışıb diplomatiyada uğurlar qazanmaq, dünya siyasətini Azərbaycana doğru yönəltmək lazım idi ki, bu gün dünya bizim haqlı olduğumuzu görsün, bizə tərəf olsun, nəticədə ermənilər cığallıq edə bilməsin, danışıqları çürütməsin.
Amma əlbəttə, bunlar normal dövlətçiliyi olan ölkə haqda fikirlərdir, mən yapokratiyadan heç nə ummuram. Bir ölkədə ki, prezidentin xarici siyasət müşaviri duz gölündə alver üstündə qaçqınlarla qırğına çıxa, o ölkədə hansı siyasətdən, diplomatiyadan, dövlət mənafeyindən danışmaq olar?
Mən girişdə nəqliyyat nazirinin “gül balası”nın ayı kəsdirməyindən nahaq yerə yazmadım. Ermənilər bizim ölkəni kimlərin idarə elədiyini gözəl anlayırlar, ona görə də işğal siyasətindən çəkinmirlər. Onlar görür ki, burada harın məmurlar, onların qudurğan övladları at oynadır, xalqın Qarabağ istəyi bu fonda o qədər yetim günündədir ki, bu xalq həmin məhv edilmiş istəklə heç Qaradağa qədər gedə bilmir. Ermənilər bizim güclü, demokratik, xalqa arxalanan dövlət qurduğumuzu görsələr, bizimlə hesablaşarlar. İndiki halda veclərinə deyil. Öz xalqının səsini boğan hakimiyyəti düşmən də vecə almaz - bu, aksiomdur.
Ancaq ironiya mələyi deyir ki, dilxorçuluğa əsas yoxdur, məsələn, elə həmin Anar Məmmədovu Qarabağa desant atmaq yaxşı olardı. Gerçəkdən, ayı əti yemişdir, ayı ürəkli oğlandır, qoy gedib erməniləri mələtsin. Haçanacan öz enerjisini avtovağzalda sürücülərdən 20 qəpik yığmağa sərf edəcək? Elə Ziya Məmmədovun özü də pis deyil. Vaxtilə Eynulla Fətullayev “Gündəlik Azərbaycan” qəzetində Ziya Məmmədovun unikal bir fotosunu vermişdi: nəqliyyat naziri hansısa tədbirdə çiyninə qumbaraatan qoyub şəkil çəkdirmişdi. Bu adamı göndərin, qoy erməni zirehli texnikalarını mələtsin, yoxsa Bakıda taksi sürücüsünü döyməklə Qarabağ danışıqlarına müsbət təsir etmək çətindir.
Hamısı belədir - öz enerjilərini boş işlərə sərf edirlər. Srağagün Bakıda qəbul imtahanında bir valideyn öldü. Bu, Misir Mərdanovun təhsil sisteminin nəticəsidir. Valideynlər imtahan günü şəhid olur. Elə bütün dərs ili boyunca, əslində... Bax bu adam, təhsil naziri öz potensialını düşmənə qarşı yönəltsə, pis olarmı? Qoy Mərdanovun dərsliklərini paraşütlə Qarabağa atsınlar, ermənilər oxuyub uşaqlı-böyüklü, çəyirtkə kimi qırılsınlar.
Yoxsa mağmın Məmmədyarovu erməninin üzərinə təkcə buraxmısınız, o da qalıb naəlac... Hamı vətən üçün çalışmalıdır.

874 dəfə baxılıb