UŞAQLI ATALARA YER VERMƏMƏK

	12 fevral 2012


Onlayn ictimai-siyasi qəzet

Zamin HACI
zaminhaci@gmail.com

UŞAQLI ATALARA YER VERMƏMƏK

“AER” dondurma şirkətinin rəhbəri Azər Şükürovu axır ki, tutdular. Mən bu əhvalatı başdan bəri izləyirdim. Öncə onun dondurmalarının istehsal və saxlanma vaxtının düzgün yazılmadığını bildirdilər. İqtisadi İnkişaf Nazirliyinin uzun adı olan departamenti həmin məhsulları məhv eləmək qərarı çıxartdı. Sonra dedilər ki, şirkət məhsulları məhv etməyib. Daha sonra iş prokurorluğa verildi və nəhayət Azər Şükürovu həbs elədilər. İndi bu şəxsə qarşı Cinayət Məcəlləsinin “istehlakçıları aldatma və ya pis keyfiyyətli məhsul istehsal etmə və satma”, “vəzifə səlahiyyətlərindən sui-istifadə etmə” və “vəzifə saxtakarlığı” maddələri ilə ittiham irəli sürülüb.

Necə deyərlər, çox əla. İstəməyənin gözü çıxsın. Azərbaycan xalqını zəhərləyən hər bir şəxsi tutmaq lazımdır. Ancaq burada ikili standartlar nə üçündür? Neçə illərdir mətbuat Kəmaləddin Heydərovun uşaqlarına məxsus şirkətin buraxdığı, bazar-dükanı basmış meyvə şirələrindən, onların saxtalığından, içməyə yararlı olmadığından yazır. Doğrudan da adını burada çəkmək istəmədiyim - çünki onun adı gələndə belə ürəyim bulanır, bir dəfə çaşıb içmişəm - həmin meyvə şirələrinin keyfiyyətsizliyi bircə qurtumundan aydın bilinir. Elə bil sənə yaxantı, bulanıq su içirdirlər. Ancaq dövlət idarələri bu meyvə şirələri ilə mübarizə aparıb Taleh Heydərovu da Azər Şükürovun gününə qoya bilərmi? Başa düşürəm, bunu indiki halda fərz eləməyin özü də gülməlidir.
Şükürova qarşı ittihamdakı bir cümlə isə mənə xüsusi ləzzət elədi: “O, dondurmanın saxlanma müddətini süni şəkildə artırıb”. Dondurmanın saxlanma müddəti... Yoldaşlar, axı necə olur, siz qanunları hər il it ağzından çıxardıb ölkədəki bütün vəzifələri ömürlük eləmisiniz, artıq Azərbaycanda prezidentdən tutmuş ombudsmana, prokurordan nazirə qədər hər bir vəzifənin daşıyıcısı ölənə qədər “çalışa” bilər - dondurmaya niyə vaxt qoyulmalıdır? Bir şey ki, buzdur! Azərbaycanda dövlət vəzifələrinin “saxlanma müddəti” yoxdursa, məhsulların da olmasın gərək. Özü də buradakı “süni şəkildə” ifadəsi də komikdir. Guya siz vəzifələrinizi təbii şəkildə ömürlük eləmisiniz? Bəyəm adamlar xarab olmur? Adamlara qurd, bağırsaq çöpləri, bakteriyalar, cürbəcür rüşvət və antihumanizm mikrobları düşmür? Düşür. Demokratiya və ümumən insanlıq tarixi sübut edib ki, istənilən vəzifə limitsiz ediləndə, adamlar dəyişilməz olaraq bir görəvdə oturanda xarab olurlar. Öz xalqlarının qarnını-başını ağrıdırlar, infeksiya mənbəyi kimi ətraf xalqlara da ziyan vururlar. Dondurma müddəti məsələsində səmimi deyilsiniz, yoldaş yapokratlar. Açın buraxın Azər Şükürovu. Ya da özünüzü buraxın.
Sözlərə fikir vermək lazımdır, yoxsa adam idiot durumuna düşə bilər. Bu yaxında mən metroda bir söhbətin şahidi oldum. Qoca kişi Metro Tağının vaqonlarda səsləndirdiyi təzə elandan narazılıq edirdi. Yəqin eşitmisiniz, indi vaqonlarda belə mənasız cümlə səslənir: “Hörmətli sərnişinlər, bir-birinizə qarşı diqqətli, mehriban olun. (Müxbirlərə ”niyə burcudursan" deyən bir metro rəisinin mehribançılıq və diqqətdən gap eləməyi ayrı mövzudur-Z.H.). Yaşlılara, əlillərə, uşaqlı qadınlara yer verin". Qoca məhz sonuncu cümləyə görə deyinirdi: “Bunlar bizim xalqı lap avam yerinə qoyublar. Savadsızlıqdır. Belə çıxır əgər vaqona uşaqlı ata girsə ona yer vermək lazım deyil”. Mən həmin adını bilmədiyim qocanın məntiqi qarşısında baş əyirəm. Doğrudan da bizim xalqımız istedadlı və ağıllıdır, sadəcə onun rəhbərliyinə vaxtı, saxlanma müddəti keçmiş, mikrob düşmüş kadrlar çıxıblar. Hətta “mikroblar hakimiyyəti ələ keçirib” yazsaq daha düz olar.
Metro Tağını başa düşürəm, yəqin ömründə bir dəfə də uşağının əlindən tutub, qucağına alıb metroya minməyib.

1446 dəfə baxılıb