TƏMİZ AYAQ SÖHBƏTİ | Yeni Müsavat

	12 fevral 2012


Onlayn ictimai-siyasi qəzet

Sevinc TELMANQIZI

TƏMİZ AYAQ SÖHBƏTİ

Yaşadığımız bu anormal, mənasız, yersiz, qıcıq.... istilərdən sonra şəxsən mən qışın olmayan əl-ayağını belə öpməyə hazıram. Vallah, onun titrəməli soyuqdəyməsinə də, buzuna da, qarlı yollarına da quzu kəsmək keçir içimdən. Heyf deyil, jaketi jaket, corabı corab üstündən keçirdiyimiz, əlcəkli, papaqlı günlər? Bilirsən ki, bu təbiət afətindən qorunmaq üçün şkafa əl atmaq bəsdir. Uzaqbaşı da idman etmək, dərhal canın isinəcək. Amma indi belədir? Çay içmə, tərləyərsən, buzlu su içmə, xəstələnərsən. Hələ hərəkət etməkdən heç danışmıram. Günün ən isti saatlarında birdən adama elə gəlir ki, bu dəqiqə əriyəcək. Hətta şair demiş, əriyib suya dönəcək, axıb çaya gedəcək. Yay gəlib, artıb qəmimiz... Neyləyək?

Kondisioneri işə salmanın heç adı yoxdu. 5-10 dəqiqə canın istidən qurtulursa, bayıra çıxdığın andan etibarən günəş bunu sənin gözündən gətirir. Düşürsən xəstə. Bunun qızdırması var, tərləməsi var, yediyinin-içdiyinin zəhər olması var... Var oğlu var... Hələ mən ən məsum kondisioner fəsadından danışıram. Xəbəriniz var ki, elm aləmi kondisionerin neçə yüz min xəstəliyini aşkara çıxarıb? O gün Türkiyə telekanallarında gördüm - abilər istirahət mərkəzlərində camaata soyuq, soyuducunun buz yerində saxladıqları can dəsmalları paylayırlar. Onlar da bunu başlarına bağlayır, bədənlərinə sarırdılar ki, canları istidən qurtulsun. Yəni rəsmən ibtidai dövrlərə, Adəmlə Həvva təcrübəsinə qayıdış. Nə gözəl... Kustar üsullarla istidən qorunma yolları. Varam sivilizasiya ilə bu cür mübarizəyə.
Yoxsa ki, bəndəniz kimi yayın 42 dərəcə istisində xəstələnir, gözünə əcaib-qəraib varlıqlar görünməyə başlayır. Bir neçə ay əvvəl bir bomj müsahibim deyirdi ki, gecələr gözümə “qulisinasiyalar” görünür, ağaclar hərəkətə gəlib, üstümə hücum edir. Bax, yay soyuqdəyməsi də təxminən belədir. Sən isti, bayır səndən isti... Qarabasmaların artması tamamilə təbiidir.
Qarabasma demiş, son sayıqlamalardan xəbəriniz var? Brilliant Dadaşovanın “Azərbaycan qadını ərinin ayaqlarını da yuyur” açıqlamasının yaratdığı əks-sədanı deyirəm. Xanım müğənni də Türkiyə dəbiylə ayaqlaşmağa başlayıb. Diqqət çəkmək üçün əndrabadi danışma taktikası. Bilməyənlər üçün olayın özətini danışım ki, Brilliant xanım şoumen Mehmet Əli Ərbilin proqramına çıxanda sonuncuya deyib ki, bəs niyə Azərbaycandan qız almamısan? Birini də bizimkilərdən alaydın, neyçün ki, azəri qadınlar ərlərinin ayaqlarını da yuyurlar. Bu da səs-küy yaradıb. “Yaxşi Cazibə” adlı serialın hay-həşiri bitməmiş bu çıxıb ortaya. Azəri qadınlarla bağlı daha bir aşağılayıcı rəy. Aşağılayıcı sözünü mən demirəm ha. Bu mövzuda keçirilən ictimai müzakirələr, sosial şəbəkələrdəki fikir dartışmalarında bu, belə qələmə verilir.
İlin-günün bu vaxtında, sivilizasiya, qadın haqları, feminizm hərəkatları...nın dünyanı başına aldığı zəmanədə deyiləcək sözdür heç? Bu dəqiqə hamının evində hamam da var, isti-soyuq su da, duş da. İstəyən gedər ayağını yuyar, çıxar. Ona görə deyirəm ki, bu, sadəcə diqqət çəkmək üçün deyilib. Belə götürəndə heç bu fikir Azərbaycan qadınını da aşağılamır. Onun fədakarlığı, yeri gələndə evinin qulluqçusu olması da təqdirə layiqdi. Həyat yoldaşına belə jest edənlər də ola bilər bu dövrdə. Sadəcə, bizi qıcıqlandıran şey sözü qurtaran aşığın nanay-nanay deməyə keçməsidi. Noldu, deməyə söz qalmadı? Azərbaycan qadını, Azərbaycan sənəti, bədəbəddə Azərbaycan nefti barədə? Dil-dil ötün də Azərbaycan televiziyasındakı kimi. Xalq artisti ünvanı, telekanallardakı silsilə şou proqramları... “baqaj”ınıza heç nə yığa bilməyib? Türkiyə seyrçisini doğrudanmı ancaq bunla təəccübləndirmək mümkündü? Azəri qadın ərinin ayaqlarını yuyurmuş. Bah, nə böyük sensasiya!
Milyonların izlədiyi efirdə deyə biləcək daha uğurlu söz tapıla bilərdi. Doğrudanmı Azərbaycan qızını seçmək sırf ona görə lazımdır ki, o, ərinin ayaqlarını yuyur? Onu başqa məziyyəti ilə tərif etmək mümkün deyil? Azərbaycanlı sənətçi belə danışandan sonra hansısa serial ssenaristindən “bizi pis qələmə verir” deyə umu-küsü etməyin yeri varmı? Bax bütün məsələ elə burdadır.
Nəsə, ayaqlarınızı tez-tez yuyun. Bayırda hava çox istidir...

744 dəfə baxılıb