SƏN MARSDAN GƏLMİSƏN

	12 fevral 2012


Onlayn ictimai-siyasi qəzet

Sevinc TELMANQIZI

SƏN MARSDAN GƏLMİSƏN?

Yazılanlara inansaq, avqustun 28-nə keçən gecə Mars planetini adi gözlə görmək mümkün olacaq. Yəni həmin gecə göy üzünün ən parlaq cismi olacaq Mars Ay böyüklüyündə görünəcək. Zarafat deyil, o zaman Mars Yer planetinə 34,65 milyon mil yaxınlaşacaq. Özü də düz gecə saat 02:30-da. Həmin radələrdə göyə baxanlar Mars planetini ömürlərində ilk dəfə öz gözləri ilə görə biləcək.

Bu xəbəri içi mən qarışıq yəqin çoxunuz həyəcanla oxumusunuz. Ay aman, lap az qalıb, bircə gün sonra Marsı görəcəyik. Bəlkə oradakılar da bizi gördü? Axı deyirlər, Marsda həyat da var, marsiyançiklər də. Ev-eşiyi yığışdıraq, hazırlıq görək, ölüsü, bir çay süfrəsi, uzağı bir toğlu kəsək. Zarafat deyil, bir də bu mübhəm görüş 2287-ci ildə baş tutacaq. O vaxta qədər də kim ölə, kim qala...
Gülməlidi, eləmi? Narahat olmayın, bu hazırlıq təlaşı nə qədər gülməlidisə, elə gecə saat 3-ün yarısında Məlikməmməd misalı barmağını çərtib içinə duz qoyaraq, Marsı görməyi planlaşdıranların təlaşı da bir o qədər gülməlidi. “Sivilizasiyadı, insan oğlunun da bu fürsətdən yararlanaraq Marsı görmək istəməsi təbiidi” deyən çoxbilmişlərin səsi gəlir artıq qulağıma. Burnunun ucundan uzağı görməyən, görmək istəməyən məmləkət adamlarımız Marsdan bir “kadr”ı canlı-canlı seyr etsələr nə olacaq, etməsələr nə? Yəni Marsı görüb də nə edəcəklər? Fikrimi çatdıra bilirəmmi?
Bu tip təbiət hadisələri həyatını, yaşamını pis-yaxşı sığortalamış, öz hüquqlarından yeri gələndə yeri gələn qədər istifadə etməyi bacaran conlar, marklar üçündür. Adamların yeganə dərd-səri ekzotika, həyəcan, adrenalin artımıdır. Buna görə bəzən paraşütlə yerə hoppanır, əcaib-qəraib aksiyalara qatılırlar ki, adrenalinləri artsın, həyatlarına rəng qatılsın. Bizdə isə uzun-uzadı arayışlara ehtiyac yox. Azərbaycan insanını üzü ağ olmuş hökumət hər gün adrenalin, həyəcan bombardmanına qonaq edir. Yayda suyunu, qışda işığını kəsir, bir səhər oyananda görür ki, yaşadığı ev hasarlanıb, hansısa oliqarx burda itləri üçün istirahət mərkəzi tikir, maaşını, pensiyasını istədikləri vaxt kəsirlər... Necə deyərlər, hər yer Kərbəla, hər gün müsibət. O zaman nə həyəcan? Öz həyəcanımız özümüzə bəsdi.
Digər tərəfdən, tutaq ki, lap pəncərəyə çıxdıq, gözümüzü də zillədik göylərə. Kim nə görməyi ümid edir axı? Yalan olmasın, bu yadplanetlilərin yeddi arxa dönəninə qədər bələdik, saniyə-saniyə nə yeyib-içdiklərindən də xəbərdarıq. Heç kənddə yaşayan qohumlarımızın həyatından o qədər çox şey bilmirik, nəinki onlarınkından.
Texnika, yenilik, kəşflər deməyin mənə... Siz Allah, qoyun oturmuşuq. Onların ziyanı xeyrindən çoxdu. Ən elementarı - mobil telefon. Nolsun ki, onun sayəsində istədiyin adamı istədiyin vaxt tapa bilirsən?(Baxmayaraq ki, telefonu söndürsə, heç bu da mümkün deyil-S.T.) Vaxtilə mobil telefon yox idi, insanlar bir-birini itirmişdi? Əksinə, daha mehriban, daha səmimi idilər. Halbuki bu telefon sayəsində indi milyonlarla ailə dağılıb, insanların həyatına tələlər qurulub, problemləri artıb, insan oğlunun canavar yönünü üzə çıxarıb bu alət...
Misalları artırıb, texnikanın yeniliklərini it sürütməsi etmək olar, sadəcə, yerimiz kasad, odu ki, biri bəsdi. Sadəcə, deməyim o ki, “kəşf”, “elmi tərəqqi” deyə həşir qoparmağın yeri yoxdu. Gördüklərimiz bizə yetər.
Digər tərəfdən, elə bizim ölkədə də Marsdan gələnlər az deyil. Bu dəqiqə Azərbaycanda YAP-çı müsavatçıya, müəllim bilik almaq istəyən tələbəyə, həkim pul vermək istəməyən xəstəyə, məmur uşağının peçenyesinə pul tapmayan kasıba... yadplanetli kimi baxır. Dəyərlər, standartlar, əqidələr o qədər uc nöqtələrdədir ki, insanların sinifləşib, bir-birindən uzaq düşmələri adiləşib. İnanıram ki, indi bir YAP-çının marsiyançiklə söhbəti daha tez alınar, nəinki bir cəbhəçi, müsavatçı ilə. Fikir vermirsinizsə, hətta ən mötəbər sayılan tədbirlərdə də hökumət nümayəndələri müxalifətlə təhqir tonunda, “ayı söhbəti” edirlər. O zaman biz nədən danışırıq?
Demək ki, nəymiş, öz marsiyançiklərimiz, Marsdan yerə zənbillə enənlərimiz özümüzə bəsdi. Onların ayağı Yerə dəysin, həqiqi Marsı görməsək də olar...

1002 dəfə baxılıb