HİNDLİ OLAQ... BİR GÜNLÜK

	25 may 2012


Onlayn ictimai-siyasi qəzet

Sevinc TELMANQIZI

HİNDLİ OLAQ... BİR GÜNLÜK

Hər nə hikmətdirsə, bəzi telekanallar məhz həftə sonları, xüsusən də şənbə günləri hind filmləri nümayiş etdirilər. Özü də günorta saatlarında. İstirahət günü, günəşin çırtlayan vaxtı bayıra çıxmaq ağılsızlıqdı - oturub məcburən filmə baxırsan. Burda dərin izlər axtarmaq istəmirəm, amma həftənin yorğunluğunun real həyatdan uzaq, nağılvari bir filmlə çıxa biləcəyini düşünən televizyonçular az aşın duzu deyillər.

Neyçün ki, indi orta yaşlı istənilən tamaşaçı Moşunun da haqqında danışdığı o məşhur “optimist nəslin nümayəndəsidir”, Ciminin bir gecənin içində varlı olacağına, Rac Kapurun on kişini bir dəqiqənin içində qanına qəltan edə biləcəyinə... bir sözlə, yaxşıların axırda hər zaman qalib gələcəyinə inanır. Cazibədar Zitalar, on barmağında on qabiliyyət olan Gitalar. Bu filmlərdə ancaq uc nöqtələr var, orta həddə yer yox. Adam ya lap pisdir, ya da lap yaxşı. Qəhrəman ya acından köpük qusur, ya da qızıl boşqabda yemək yeyir. Reallıq hissi sıfır...
Həftə yorğun, uğursuz, qazancsız keçib, əhvalın da yox. Amma ekrandan məlahətli bir hind qızının mənasını bilmədiyin mahnısı səslənir. Təəssüf ki, köşədən o mahnıların effektini çatdıra bilmirəm. Amma bir anlıq gözünüzü yumun, hesab edin ki, evdən elə bir melodiya yayılır. İstər-istəməz alır səni təsirinə, ekranda da irreal bir süjet, fantastik hekayə, oğlan igid, qız qəşəng... Vaqif Bayatılı demiş, bir-birini də, dünyanı da yupyumru bir sevgi ilə sevirlər. Sevginin şiddətindən otluqda dəli kimi yumbalanmalardanmı deyim, ağac dalında gizlənpaç oynamalardanmı? Bundan artıq nə istəyirsən? Sənə sadəcə sonu təxmin etmək qalır. Kənd camaatı hind filmləri barədə nə deyirmiş? “Əvvəli hırıldamalı, sonu zırıldamalı” və ya tərsinə... Yəni, sənin öhdənə sadəcə o düşür ki, filmə baxa-baxa sonunun hırıldamalı və ya zırıldamalı olacağını təxmin edəsən.
Sovet dövründə çəkilən Azərbaycan filmləri də onun kimi. Baxanda məlum olur ki, sən demə, Sovet insanının ən böyük faciəsi işdə ala biləcəyi töhmət, ən böyük uğuru isə adının şərəf lövhəsinə düşməsi imiş. Qabaqcıllar, zərbəçilər, “Kirpi”nin öldürücü tənqidi. Bütün həyat bunun üzərində qurulubmuş sanki. Sevgi, məhəbbət, iztirab... Bunlar da var. Amma günümüzün seriallarından fərqli olaraq laübali sevgi üçbucaqları, ucuz intriqalara əsla yer ayrılmayıb. Sevgilər də ki, bir qayda olaraq sovet zəhmətkeşinin əmək sevgisinin içində əriyib. Ən böyük, ən fədakar aşiq işində uğur qazanan qabaqcıldır. Aşılanan da budur ”“ insan zəhmətkeş, qabaqçıl, əmək qəhrəmanı deyilsə, onun sevgisi də kiçik, mənasız və keyfiyyətsizdir. İnsanlar birinci üzüm, pambıq tarlalarını sevməli, sonra isə oradakı zəhmətkeş (ancaq zəhmətkeşləri ha ”“ S.T) qız-oğlanları.
Bəs günümüzün filmləri? Dava-dalaş, qan, intriqa, mafiya, üçbucaq-dördbucaq sevgilər... Hələ uşaqların baxdığı cizgi filmlərindən danışmıram. Qız uşaqları Vinx qızlarının bərbəzəkli, sevgi macəraları, balaca oğlanlar isə Pokemon, Batman kimi şiddət səhnələrilə zəngin cizgi filmlərinə aludədilər. Yəni, hər ikisi yaşlarına uyğun olmayan şeyləri seyr etməkdə. Harda “Nu poqodi”nin məsum hekayəsi, harda bu qan-şiddət dolu intiqam nağılları? Ona görə də indi orta nəslin sadəlövhlüyü, optimistliyinin səbəblərini Hind filmlərində görənlər bu gün pokemonlar, batmanların, vinxlərin əsarətində olan uşaqlardan da gələcəkdə gözəl bir şeylər gözləməsin. Nəticə daha pis, daha qorxulu olacaq...
Nəsə, reallıq hissini itirməmək yaxşı şeydi. Amma məşhur mahnıda da deyildiyi kimi, ayda bir gün, həftədə bir gün... buna icazə var. Nolar ki, Ciminin o elektriklənmiş gitaraya toxunan kimi öləcəyini gözləyək, amma o ölməsin. Biz də sevinək azca. Ravi Kumar xərçəng xəstəliyinə tutulub, qan qussun, amma sevdiyi qıza bunu hiss etdirməmək üçün “artıq başqasını sevirəm” desin. Gözümüz dolsun bu fədakarlıq qarşısında. Yaxşı kasıblar bir dəqiqədə varlı olsun, zalım varlılar iflasa uğrayıb, onların qapısında sürünsün. Kişilər super mərd, qorxmaz... qadınlar dəhşət fədakar, gözəl... olsunlar.
Hə, nolar ki, nolar? Heç olmasa həftədə bir gün... Baxaq və inanaq. Sonra həyata geri qayıdarıq...

648 dəfə baxılıb