MAĞARI YIĞIŞDIRMAYIN!

	25 may 2012


Onlayn ictimai-siyasi qəzet

Sevinc TELMANQIZI

MAĞARI YIĞIŞDIRMAYIN!

Müğənni Faiq Ağayev bıçaqlanmasaydı, ağlımıza gəlməyəcəkdi. Baxma, adam eyni zamanda həm xalq artisti, həm qızıl şlyager (Allahını sevən bu sözün mənasını mənə də izah eləsin-S.T.), həm YAP konsertlərinin göz bəbəyidir. Bununla belə adı kriminala qarışdı. Zərərçəkən olsa da ortada nəsə qaranlıq məqam söhbət dolaşdığını az-çox təxmin etdik. Bunun adı narkotik də ola bilər, xuliqanlıq da, nəsə başqa şey də.

Yox, söhbət təkcə ondan getmir ki, günah həmişə öləndə, bağışlayın, döyüləndə olur. Amma baxmayın da, Mirzə Xəlil demiş, hadisə vaqe olur, tülkü oyanmaz vaxtı, özü də Kubinkada. Deməli, nəsə var. Hərçənd ki, siz bu sətirləri oxuyanda hadisənin iç üzünü xalq artisti brifinqdə özü açıqlayacaq. O vaxta qədər nəsə versiya irəli sürməklə Faiq müəllimi incidə bilərik. Çünki artıq xəstəxanadan jurnalistlərə barmaq silkələyib. Versiyalarınızı hallandırmayın, mənim açıqlamamı gözləyin deyə. Onsuz da gözüqırıq, başıqapazlıdı bu jurnalist tayfası bu dəfə də şlyagerin qəzəbinə tuş gələrik. Dörd cangüdəni var, zarafat deyil. Nolsun ki, davada heç özlərini də qoruya bilməyiblər. Hər halda, amerikanlar demiş, sekyuritilərdir də...
Bu olay şou-bizneslə kriminal dünya arasındakı məsafənin nə qədər qısa olduğunu bizə növbəti dəfə göstərdi. Düzdü, bütün dünyada belədir. Müğənnidi, aktyordu, rejissordu... əvvəl-axır hansısa əməllərinə görə dörd divar arasına düşür, yaralanır, yaralayır, mafiyaya bulaşır. Qanunun şah olduğu ölkələrdə cəzalarını da alır, türklər demiş, paşa-paşa cəzalarını da çəkirlər. Bizdə isə bir toxunulmazlıq baş alıb gedir. “Gözün üstə qaşın var”ı manıslara çox nadir hallarda deyirlər.
Bu günə qədər baş verənləri bir yada salaq. Elşad Xose və Hüseyn Dəryanın adı narkotik qalmaqalında hallandı. Sonuncunun üzərində narkotik tapıldığından 5-7 il müddətinə həbs ediləcəkdi, amma müğənni olduğunu nəzərə alıb, cəzanı 1 illə əvəzlədilər, sonra eyni suça görə şərti cəza aldı. Elşad Xose də onun kimi. Narkotik maddə və 1 il cəza. Ekstazi qalmaqalında adı hallanan müğənniləri, xalq artistlərini də unutmayın. Şoumen Murad Dadaşovun “GEN” MMC-nin məhkəməsində adının çəkilməsini, Xatirə İslamın şantaj yolu ilə eks-sevgilisindən pul qopartma cəhdini, Rəqsanənin adının insan alverində hallanmasını, jurnalist döyən Vasif Məhərrəmlini, Hacı Məmmədovla can-ciyəri olmuş məşhur müğənniləri. Və gün üzünə çıxmamış daha nə kimi qalmaqalları...
İki reperdən başqa hansı qazamat divarı görüb, hə? Heç biri. Adamlar çox rahatlıqla cild-cild cinayətlərdən canlarını qurtarıblar. Məşhur olduqlarına görə? Deməzdim. Məşhura qalsa, bu hökumət çox məşhur jurnalistləri narkotik, xuliqanlıq... kimi saxta ittihamlarla həbsə atanda heç bu qədər humanist olmayıb. Əksinə, küncdə-bucaqda gizlətdiyi dələduzları, adı axtarışa düşən cinayətkarları çıxarıb onların üzünə qoyub, gülməli ssenarilər quraşdırıb. Məsələn, bir neçə il öncə bıçaqlanan jurnalistin başına açılan “mavi skandalı”nı indi Ağayevlə bağlı hadisədə təkrarlayarlarmı heç? Əsla...
Sıravi vətəndaşlar üçün də həmçinin. Azərbaycan bəzi polislərin pul qazanmaq üçün “cibə nəşə atdığı” ölkədir, burda heç kimə zaval yoxdur. Pulun, arxalı dayın yoxsa, əlli-ayaqlı gedəcəksən. Azərbaycan məhkəmələri qurama cinayət işlərindən dağılır.
Qayıdaq manıs tayfasına. Niyə onlar toxunulmaz büt olublar? Ancaq ona görə ki, hərəsinin arxasında Hacı Məmmədov kimi bir qoluzorlu day-day dayanıb? Yoxsa pulları, sərhədləri aşan şöhrətləri, lap elə pərəstişkarları çox olduğu üçün? Hər ikisi səbəb ola bilər, amma əsas məsələ budur ki, bu hakimiyyətin rəngli vitrinində bu personalar üçün hər zaman yer var. YAP-ın gülməşəkər konsertlərində atılıb-düşsünlər, 60 faizi ərzaq almağa pul tapmayan əhalinin qabağında “xalqımın günləri necə xoş, necə şən keçir” deyə bir ağız oxusunlar deyə. Hüseyn Dəryaya, Elşad Xoseyə baxmayın. Adamlar reperdir, reperi də bir az çox danışdırsan, başlayacaq üsyan etməyə. Düzdü, bizimkilərdə o cəsarət çətin ki, ola. Amma yenə də adları reperdi də. Onların təbliğatından nə olasıdı? Bir təbliğat ki, belə manısların hesabına qurulur, onun davamından nə gözləyəsən?
“Məhəllə” filmində Dilarə ölməmiş ərini necə ağlayır? “Mağarı yığışdırmayın....” Hə, ən məsləhətlisi yığışdırmamaqdı. Bu ölkə hələ çox belə “ölülər” görəcək...

686 dəfə baxılıb