DİQQƏT - EFİRDƏ AĞSAQQAL VAR!

	25 may 2012


Onlayn ictimai-siyasi qəzet

Sevinc TELMANQIZI

DİQQƏT - EFİRDƏ AĞSAQQAL VAR!

Yenə əlimizdə o məlum çötkə ilə hesablamalara başlamışıq. 10 dəqiqə çıxış üçün bir kanal 12 min, o biri 16 min manat istəyirsə, bir dəqiqəlik çıxış neçəyə başa gələr? Bir dəqiqədə neçə söz, neçə cümlə söyləmək olar? Bəlkə namizəd ekrana çıxıb, “hörmətli seçicilərim” desə bəs edər? Cəmi 4 saniyə, nəyi pisdi ki? Yox, o da çoxdu, konfet kağızı deyil ki, pulnandı hamısı... Yaxşısı budu, eləcə mənalı-mənalı baxsın. Bu da olsun 2 saniyə. Onsuz da anlayan anlayacaq... Bir baxış at, bir neçə yüz manat ödə. Baxışının dəyərini anla. Lap reklam rolikinə bənzədi.

Zarafat bir tərəfə, dünyanın heç bir yerində belə anormallıq görünməyib. Ölkədə 5 ildən bir parlament seçkisi keçirilir, kanalın biri elan edir ki, biz seçki təbliğatına qoşulmuruq, çünki oradan gələn pul bizə lazım deyil. Heç dəxli var? Sən ictimai əhəmiyyətli bir olayı necə iqnor edə, seçicinin informasiya hüququnu əlindən ala bilərsən? Bu da Elgizin izdivac verilişi deyil ki, ürəyin istəyəndə istədiyin adamı efirdən qovasan. (Bu söhbətə qayıdacam, maraqlı hoqqalar var-S.T)
O biri də qatılmır, amma qorxusundan cıqqırını da çıxarmır. Nə sənə, nə mənə. Heç səbəbini də demir. Son gündə ikisi qatılır, onlar da özlərini göyün yeddinci qatına, efirçün təbliğat qiymətlərini isə ceyran belinə çıxarırlar. İTV 10 dəqiqə efirçün 12 min, “Lider”sə 16 min manat istəyir. Bu boyda absurd. Hamı pozuntu ilə məşğuldur, amma heç birinə gözün üstə qaşın var deyən yoxdur. İstədiyin vaxt reklamını fasiləsiz, maneəsiz al, qaz vurub qazan doldur, seçki vaxtı da astronomik məbləğlə efir vaxtı təklif elə. Nəyə əsasən, hansı parametrlərlə hesablanıb? Sənin kommersiya reklamının qiyməti nə qədərdir ki, seçki reklamını bu qədər baha təklif edirsən? Necə deyərlər, heç kim heç kimin kitabını oxumur.
İl boyu ordan-burdan çırpışdırdıqları telelayihələr, seriallarla efir dolduranların efiri birdən-birə öz gözlərinə gülməşəkər görünüb. Sanki belə olmalıymış kimi buna bir kəlmə etiraz edən də yoxdu. Əlahəzrət məntiq isə deyir ki, ortada bir məqsəd var: onsuz da efir üzünə həsrət qalan kasıb müxalifəti bu seçkidə onun həndəvərinə buraxmamaq.
Bəs necə? İndi efir zaurların, elgizlərin... efiridir. Camaata yemək bişirməkdən tutmuş qız ərə verməyin qaydalarına qədər hər şeyi bu başbilənlər öyrədir. Oğurluq telelayihələrin birini qurtarıb, o birinə başlayırlar. İndi də 3 gün efirdə bir-birini “tanıyan” cavanları evləndirməyə qərar veriblər. O gün dostlardan biri link göndərməsəydi, heç belə verilişin varlığından xəbərim də olmayacaqdı. Demək, verilişlərdən birində aparıcı evlənməyə qərar verən, amma oğlanın anasının narazı olduğu bir izdivacla bağlı qızıl xıralayır. Bu yerdə canlı efirə oğlanın anası qoşulur, bir daha etiraz edir. Qız da potensial qayınanasına təxminən belə deyir ki, istəsən də, istəməsən də, biz evlənəcəyik. Aparıcını bu yerdə od götürmür? Ağbirçəyə hörmətsizlik etdiyi üçün öncə qızı, sonra oğlanı efirdən qovur. Sonuncuya da deyir ki, sənin oğul boyunu yerə soxum, kül kişi başına... və sair. Dedim, axı, qızıl xırdalanlb. Hələ mən studiyada qopan alqış sədalarını demirəm. “Elgiz, halaldır”ın biri beş qəpikdən, vay-şüvən, isterika. Sanki adam məmləkəti xilas edib, heç kəsin bilmədiyi həqiqətləri üzə çıxarıb, saxtakarları ifşa edib. Qəhrəmanmış bir sözlə, biz bilməmişik.
Camaatın mətbəxinə, paltar şkafına, cibinə girdilər, ürəkləri soyumadı. Sms diləndilər, bu da bəs eləmədi. Yaxşı, indi növbə nəyə çatıb? Bir ailənin ki, təməli şouya hesablanmış bir verilişdə qoyulur, boşanma ərizəsinin yazılacağı gün də yaxındır, inanın.
Ev yıxmağı hər adam bacarmır ha, bu da bir qabiliyyətdir.
İndi siz deyin. Belə verilişlərin çıxdığı efirdə seçiciyə söz deyilsə nə dəyişəcək, deyilməsə nə?
P.S. İzdivac proqramlarının bir saniyəsi neçə manat edir, biləniniz varmı?

1224 dəfə baxılıb