CİB TELEFONU KİMİ SEÇKİ

	25 may 2012


Onlayn ictimai-siyasi qəzet

Sevinc TELMANQIZI

CİB TELEFONU KİMİ SEÇKİ

21-ci əsr insanının bir-birinə ən böyük komplimenti nədir, bilirsiniz? Çox adam qarşısındakının könlünü xoş etmək, onun təkrarsız olduğunu ifadə etmək üçün adətən belə bərbəzəkli cümlələr qurur: “Sən cib telefonu kimisən, görəsən, sən olmayana qədər mən(biz, bütün dünya) necə yaşayırdı?” Daşa desən, daş əriyər bu cümlə qarşısında. Komplimentdəki aktuallığa, zamanın nəbzini tutmağa, orijinallığa baxın siz.

Mənə görə isə bəşəriyyətin ən böyük kəşfi seçkilər olub. Yüksək vəzifəyə iddialı olanları başqaları seçiblər, bu və ya digər yollarla. Daha padişahların zamanındakı kimi göyə quş buraxıb, onun hansı bəxtəvərin başına qonacağını gözləməyə ehtiyac qalmayıb. Quşda ağıl var, nə bilirsən, gedib kimin başına qonacaq? Ən ağılsız adamlara “quşbaş” deməyimizdən götürün hesabı. Nə isə, uzaqlaşmayaq mətləbdən. Əsas odu ki, indi seçki var və kimin ağ, kimin qara olduğu məhz indiki dönəmdə bilinir. Ona görə də o girişdəki komplimenti mən seçkilər barədə işlədərdim: seçkilər də cib telefonu kimidir, görəsən onlar keçirilənə qədər biz necə yaşayırdıq?
Seçkilər sayəsində, şair demiş, qaranlıqlarda kimin əlinin kimin cibindən çıxdığını bilirsən. Agah olursan ki, kim kimin adamıdır, kim kimdən qorxur(hətta üyüdür), kimin pulu çoxdur, hakimiyyət kimi niyə sevir-sevmir. Bir sözlə, ilboyu baş sındırdığın suallar bir ayın içində gün üzünə çıxır.
Məsələn, artıq təbliğat-təşviqat dönəmi başlanıb. Ona görə də Seçki Məcəlləsini pozacağımızdan qorxmadan arın-arxayın danışa bilərik. Ötən müddət nə göstərdi bizə? Əksər namizədlər aylar boyu YAP-ın o mübarək siyahısını gözlədilər. “Görək gözaltıladığım dairədən hakimiyyətin hansı adamı seçkiyə gedəcək” deyə. Siyahı açıqlandı, qorxanlar geri çəkildi, “Bir qalanın sirri”ndəki balaca oğlan misalı “Mən səndən qorxmuram, göygöz kosa” deyərək, sinəsini qabağa verənlər tapıldı. YAP-çıların xeyrinə öz namizədliyini geri götürüb, hamam suyu ilə dost tutanlar da öz yerində. Bu da gələcəyə başqa cür kapital qoymağa bənzəyir.
Hakimiyyət çoxlu sayda jurnalist namizədlərin namizədliyini qeydə almadı. Ekspertlərin bir qismi dedilər ki, jurnalistlər hər zaman iqtidar üçün başağrısı olub. İstər Milli Məclis zalında, istərsə redaksiyada. Ona görə də onları öz ətrafından uzaqlaşdırmaq daha məsləhətdir. Bu da növbəti etiraf - hakimiyyət söz adamlarından daha çox qorxur, nəinki sıravi biznesmendən. Çoxları isə düşündü ki, zatən jurnalistlərin parlamentə gedən yolları bağlı idi. Sadəcə keçmişdəki bəzi jurnalist-deputat örnəkləri (özü də uğursuz olanlar) onları şirnikləndirmişdi. Cəhdlərin nəticəsi də qosqoca fiasko.
Seçkinin başlanması ilə media nümayəndəsinə qarşı başlanan qara piardan isə heç danışmıram. Hər zaman eyni qara piar vasitələri, qurşaqdan aşağı zərbələr - taktika dəyişmir. Növbəti gerçək - hakimiyyət özünü təkrarlayır və bunda israrlı görünür.
Amma bəzi namizədlərin cəbhəsində yenilik var. Özünü yeniləyib, səs almaq üçün qonaqlıq verənlərdənmi deyim, “mənə səs verin, gələcəkdə ölünüzün yasını mən götürəcəyəm” vədlərindənmi, yoxsa evlərə bazarlıq edənlərdənmi? Allaha şükür, bizim millət də bu ölü-diri məsələsinə münasibətdə xeyli həssasdır. Özü acından qan qusar, amma ölüsünü dəfə-daraqlı son mənzilə yola salar ki, el onu qınamasın. Bu el deyilən kəsimin konkret kimdən ibarət olduğunu bilməsə də...
Qabaqda isə qosqoca bir ay var. Bu məmləkət, eləcə də onun əhalisi seçki sayəsində xoruz səsi eşitməmiş bir çox yeniliklərdən agah olacaq, bir çox “kəşf”lərə imza atacaq, bir çox acı gerçəklərə başını bulayıb keçəcək. Dediyim kimi, cib telefonudur bu seçki. İçində hər cür proqramı, əyləncəsi, funksiyası var...
Əsas odu, bir ay boyu “telefon”unuza zəng çatsın. Əhatə dairəsindən də çıxmayın...

725 dəfə baxılıb