GƏLİN, BAŞIMIZI SAXLAYAQ

	25 may 2012


Onlayn ictimai-siyasi qəzet

Sevinc TELMANQIZI

GƏLİN, BAŞIMIZI SAXLAYAQ

Və ya qartalın arxası nəyə bənzəyir?

Zarafat kimi görünəcək, amma bu hadisə baş verib. Deputatlığa namizəd olan müəllimlərdən biri, lap elə konkretləşdirim, Yaşar Əhmədov adlı müəllim deyib bunu İTV-nin efirindən. “...Bu dövr ərzində yarımçıq müstəqilliyə məruz qalmışıq. Amma nə etmək olar? Daxili insani münasibətdə (bunun nə demək olduğunu biri mənə də desin, lütfən -S.T.) dövlətimizdən razıyıq. Birtəhər başımızı saxlayıb, həyatımızı keçiririk...”

Səbir edin, komediya hələ qabaqdadır. Müəllim höccələyə-höccələyə nitqini (Allah, sən özün saxla) davam edəndə qızılları xırdalamağı da əldən qoymur: “... Mənəviyyatımız bizim bitib. Azərbaycanın xəritəsi qartala bənzəyir. (Mənəviyyat söhbətindən qartala super keçid) Qartalın arxası karikaturaya. Qartalın ayağı xəritənin... (cümlə yarımçıq kəsilir) Ermənistanın təcavüzü ilə baxsan...”
Bu da belə. Baxanda adama elə gəlir ki, “Bakılı oğlanlar”ın, ya da “”Bu şəhərdə"nin hansısa səhnəciyini izləyirsən. O “KamAZ sürmüşəm, motosiklet sürmüşəm, ondan sonra, marşrutka sürmüşəm, amma namizədliyimi irəli sürməmişəm. Qələtdi eləmişəm də... Necə deyərlər, tutar qatıq, tutmaz deputat” deyən komediya səhnəsindəki kimi axırda şirin-şirin güləcəyini düşünürsən. Parodiya ustası da alqış sədaları altında baş əyib səhnəni tərk edəcək. Amma yoooox. Adam deputatlığa iddialıdır. Yaddaşımı təzələdim, hətta 2008-ci ildə prezidentliyə də namizəd olub. Mənə inanmayanlar bu çıxışı youtube-de tapıb izləyə bilər.
Daxili insani münasibət, qartal, onun dalı-qabağı, erməni təcavüzü... Bilmirəm, bəlkə də vaxt azlığından qaynaqlanıb, istəyib hər şeyi eyni vaxtda desin. Ya da bu cür diqqət çəkməyə çalışıb. Reklamın pisi-yaxşısı yoxdu söhbətidi də. Hər halda, bildiyim odu ki, baxanda adamı ağlamaq tutur.
Məşhur filmin məşhur sitatını improvizə etsək, “bu seçki həm qəlizdi, həm də maraqlı”. Qəlizliyinin səbəbini bilirsiniz. Amma maraqlıdır ona görə ki, onun sayəsində kimin kim olduğu üzə çıxır. Jurnalistlərin zaman-zaman bəzəyib-düzəyib, üzə çıxardığı siyasətçilərin canlı yayımda boşqablarında nə olduğu məlum olur. Məsələn, o gün İTV-nin efirində xanım namizədlərdən biri də deyib ki, Azərbaycanın problemlərini beynəlxalq arendaya çıxarmalıyıq. O arendanın haqqı nə qədərdir, kimə ödəyəcəyik - bax bunu deməyib, ona görə də narahat qalmışıq.
O biri kanalda vəziyyət bundan da biabırçıdı. Aparıcı oğulu, qayınananı, gəlini, baldızı, eltini... çağırıb efirə. Ana oğulu sillələyir, oğul gəlini, gəlin təzədən özünü. Məişət zibilxanası. Bu adamları necə tapırlar, niyə danışdırırlar, nəyi həll edirlər - bilən yoxdu. Ötən bazar həmin verilişdən birinə gözucu baxdım. Oğlunu boşatdırmağa qərarlı olan ana dirənmişdi ki, onlar boşanmasalar, özünü yandıracaq, ya da evə od qoyacaq. Uzaqbaşı da kəndi atəşə verəcək. Bütün hallarda işə od-alov qarışacaq. “Biz seçkidən pul qazanmaq istəmirik” deyən telekanal indi bu söhbətlərdən qazanmaq istəyir. Amma nə?
“Space”də isə komediyanın gözündən vurublar. Demək, xəbərlər buraxılışından sonra efirə hava proqnozunu elan edən xanım çıxır. Yanında da bir astroloq. Məsələn, xanım aparıcı deyir ki, bu gün “Quba, Xaçmaz bölgələrində yağış yağacaq, şimşək çaxacaq...” Onun ardınca dərhal astroloq, məsələn, balıq bürcündən danışır. “Balıq bürcləri, sevinin. Şans üzünüzə gülə bilər, amma maddi sıxıntılarınız olacaq”... Əlaqə nədir, harmoniyanı hansı prinsiplə qurmaq istəyiblər, bilinmir. Aparıcının biri dağlara düşən çəni vəsf edir, o biri göydəki ulduzların fitnə-fəsadından dəm vurur. Hərə öz bazarından danışır, biri o birinə “sən söhbətini elə” deyərək, bildiyini oxuyur. Əslində elə Azərbaycanın real mənzərəsidir. Hərə öz havasını çalır, heç kim heç kimin kitabını oxumur.
Öz aramızdı, qardaş düz deyir də. Birtəhər başımızı saxlayıb həyatımızı keçiririk. Üstəgəl, mənəviyyatımız itib. Azərbaycanın xəritəsi də qartala bənzəyir. Qartalın arxası isə karikaturaya. Qartalın ayağına gəlincə..
Nəyə gülürsünüz? Düz deyir də... Qartalın ayağı qəliz söhbətdi.

1102 dəfə baxılıb