ŞOK, ŞOK, ŞOK... | Yeni Müsavat

	25 may 2012


Onlayn ictimai-siyasi qəzet

Sevinc TELMANQIZI

ŞOK, ŞOK, ŞOK...

Şok üstünə şok. Telekanallara inansaq, hər gün manısxanada, mədəni dillə desək, şou biznes dünyasında bir şok yaşanır. Maqazin verilişləri, eləcə də “sıravi” insanların qatıldığı proqramlarda belə uydurma “bomba”ların biri beş qəpikdəndir.

Bayram günləri qonaq olduğum qohum-əqrəba evində bunlardan bir neçəsinə gözücü baxmaq zorunda qaldım (nə yaxşı ki, bizdə yerli telekanallar göstərmir, şükür-S.T). Əslində maqazin verilişi dediyimiz zad hər nədirsə, onun içində müğənnilərin, aktyor-aktrisa tayfasının sözün böyük mənasında özəl həyatı barədə süjetlər yayımlanmalıdır. Və bunun üçün də paparatsi deyilən jurnalistlər formalaşmalıdır. Bəs bizdə necədir?
Maqazin verilişi başlayır, ardınca da dərhal “şok”lar sadalanır. “Elarizi maşında gizlicə yaxaladıq...”, “Nadir Qafarzadə yumdu gözünü, açdı ağzını”, “Rəqsanə kimlərin bostanına daş atdı”... Azzz sonra. Bax, bunu yazan dəqiqələrdə belə “şok”un təsirindən barmaqların “donur”. Zarafatsız, anonsların heç bir şok dəyəri olmasa belə, adam fikirləşir ki, yəqin bu manıslar yenə nəsə səs-küy qoparıblar. Amma süjeti izləyəndə görürsən ki, anonslar tipik fiaskodur. Məsələn, Elariz hansısa toydan qaçaraq çıxıb, çox güman ki, o birinə tələsirmiş. Bunlar da şadlıq sarayının qabağında onu görüntüləyiblər. Və ya Nadir deyir, “bax, məni hirsləndirməsinlər, bildiklərimi deyərəm”. Sonra Rəqsanə “daşı” əlinə götürür və məchul bir bostana qolazlayır ki, bəs mən sizin bildiyiniz müğənnilərdən deyiləm. Misalları daha da artırmaq olar, amma məncə, bu qədəri kafi. Görünən kəndə daha nə bələdçi?
Yəni, qardaşlar hesab edir ki, bununla maqazin jurnalistikası ilə məşğul olurlar. Bir neçə ildir, siyasətdən, real həyatdan uzaqlaşıb, özlərini maqazinin qucağına atan kanallar, şəkildə göründüyü kimi bunun da haqqını verə, öhdəsindən gələ bilmirlər. Halbuki bu çirkli dənizin suyunda kimlərin necə üzdüyü, hansı hoqqalardan çıxdığı, lap elə kriminal dünya ilə bağlılıqları qosqoca bir sual işarəsidir. Arada-bərədə şou biznes dünyasının ayrı-ayrı üzvləri ilə bağlı məhkəmə qalmaqalları, kriminal olaylar baş verəndə məlum olur ki, bu sahə az xatalı deyilmiş. Bunların hər biri kiminsə himayəsindəymiş, (Hacı Məmmədovu xatırla-S.T) kimlərinsə kef məclislərinin klounlarıymış, qaranlıq dünya ilə bağlılıqları varmış və sair. Halbuki bunları məhkəmələrdən əvvəl elə o maqazinçilər araşdırıb ortaya çıxarmalıdır. Çünki işləri budur. Amma məlum olur ki, buna da “dux” lazımdır.
Eləcə də Türkiyədən “kopyalanan” izdivac verilişləri. Qondarma iştirakçılar, süni qalmaqallar, duzsuz hekayələr. Doğrudanmı heç olmasa bunun öhdəsindən layiqincə gəlmək olmur? Sosial şəbəkələrdə hər gün bu verilişlərin iştirakçıları barədə faktlar açıqlanır. Camaat dəlil-sübutları ortaya töküb deyir ki, bəs efirdə tanış olub evlənən cütlük əslində nişanlıdır. Sadəcə, verilişin imkanlarından (pul, ev və sair) istifadə etmək üçün belə bir teatr qurublar. Hələ bu ən abırlısıdır. Evli olduğu halda, verilişdən özünə yar “axtaranlar”, rejissorun yaxın qohumları, dostları, hansısa teatrın aktyorları da zaman-zaman bu verilişin efirində görünürlər.
Bayaqdan demək istədiyim də budu. Seçkini iqnor edirlər, siyasi polemikalardan, debatlardan qaçırlar, siyasəti isə bizim bəzi ura patriotlar kimi Güney Azərbaycan pəncərəsindən müzakirə edirlər. Qalxan isə budur - biz tamaşaçıya daha çox şou-əyləncə təqdim edirik. Demək ki, bunu da etmirsiz, edə bilmirsiz və ya etməyə qoymurlar. Onda bu meymunçuluğun nə mənası var? Hollivud filmi olan “Paparatsi”yə baxanlar görüb ki, okeanın o tayında insanlar bu peşəyə rəsmən canını fəda edir. Tamam, buna görə gözəl paralar da qazanırlar. Amma sizə iş deyirəm. Bəzən ölkəni silkələyən, siyasiləri belə ifşa edən olaylardan söhbət gedir. Niyə bizdə o əjdahadan yoxdur?
Bax, şok, şok, şok....elə budur ki, var.

1293 dəfə baxılıb