OKU BAKAYIM - A-YI! | Yeni Müsavat

	25 may 2012


Onlayn ictimai-siyasi qəzet

Sevinc TELMANQIZI

OKU BAKAYIM - A-YI!

Rəhmətlik Barış Manço uzaqgörən imiş. Adam illəəəər öncə “Ayı” adlı mahnı yazanda, üstəlik onun klipini də məhkəmə zalında çəkəndə heç kimsənin ağlına belə gəlməzdi ki, “kardeş Azerbeycan”da (yeri gəlmişkən, osmanlı abilərimizin bizim ölkənin adını niyə bu formada tələffüz etdiyini bilən varsa, Allah rizası üçün, mənə də desin. Nə ahəng qanunu, nə də tələffüz qaydaları bu cür səslənişi tələb etmir-S.T) XXI əsrin əvvəlində hüququ pozulan ayıya görə məhkəmə keçiriləcək.

O klipə baxmısınızsa, nə dediyimi anladınız. Yox, baxmamısınızsa, google saytında axtarış verin, dərhal çıxacaq. Tənbəllik edənlər üçün bəndəniz facebook ünvanında bu klipi paylaşıb, bir göz atın.
Barış abi klipdə müttəhim kürsüsündə oturub da ayıların insanlara haqsızlıq etdiyindən şikayətlənir. Uşaqlarına “bak, evladım, buna ayı derler. Ormandan enib şehre inerler. Bir az ağır, hantaldır, amma armutun iyisini ayılar yerler” deyə mesaj verir, sonda da ayıdan şikayətlənir. “Armudun iyisini zaten o yeyer
Bir eli yağda, ötekisi balda, Buramıza kadar geldi, hakim bey, Takdir sizden, bir az da ite-kaka"...
Və sonda da hamı “a-yı, a-yı” deyə qışqırır. Təxminən biz qəzetçilərin keçirəcəyi “ayı aksiyasında” qışqıracağımız kimi. Hadi bakiyim “a”, bir de “ye” de, şimdi bir de “ı”. Oku bakiyiiim - a-yı...
Gün gəlib, dövran yetişib, bizi də ayıya görə müttəhim kürsüsündə oturtmaq istəyirlər. Bir əli yağda, bir əli balda olanlar iddia edir ki, əslində onlar da məcnunsayağı dərd əlindən dağa çıxıblarmış. Sadəcə biz demişik ki, bəxtəvərlər yaylağa çıxıb. Yəni ortada ayı-mayı yoxdur, onlar da millət dərdi çəkməklə məşğuldur. Mətbuatı o qədər küncə sıxışdırıblar ki, artıq üstünə ayı da gəlir. Media yazarı olaraq yatsam yuxuma da girməzdi ki, bir qəzeti bir ayıya görə məhkəməyə versinlər. Gəl indi ayının ailəsindən reportaj hazırla, arvadı varsa, ondan müsahibə götür, uşaqlarını danışdır. Amma qışın girdiyini nəzərə alsaq, artıq mərhumun ailəsi dərin bir yuxuya gedib. Kimdi “Yeni Müsavat”ın müxbirinə qapı açan?
Bu günə qədər mətbuat nazirin, onun oğlunun qanunsuz əməllərindən bəs deyincə yazıb. Elə təkcə körpülər, yeraltı keçidlər, yamaqlanan yollarla... bağlı maxinasiya əməllərini yada salmaq kifayətdir. Hələ mən Ebru Polata alınan 35 min avroluq çantadan, villalardan danışmıram. Bunların heç birində dinməyən nazir oğlu ayı yeməsinin üzə çıxdığına görə aylar sonra niyə hərəkətə gəlib? Bundan iki nəticə çıxır. Birincisi, mətbuatın bu ata-bala barədə bu günə qədər yazdıqları bütün tənqidlər nöqtə-vergülünə qədər doğrudur. İkincisi, Müsavat başqanı İsa Qəmbər demişkən, hökumət ayının taleyindən narahat olmağa başlayıb. Ayı qəliz məsələdir... Üstəlik də əgər o, qış yuxusuna gedibsə.
Amma ortada suallar dolaşmaqda davam edir. Birincisi, ayı yemək, rus demişkən, niyə “zapadlo” sayılır? Yeri gələndə ən bahalı heyvan ətidir, cana faydaları da bəs deyincə. Üstəgəl, bizim millət yeyib-içən oğlanları sevir. Əgər bu oğlan ayı yeyibsə, şöhrəti birə-on artar. Ona qalsa, bizim qəzetin gənc reportyoru Günay Musayeva da Anar Məmmədovdan sonra gedib bir restoranda ayı əti yemişdi. İndi bunu yazdığına görə özü-özünü məhkəməyə verməlidir? Lap tutaq ki, məhkəmə baş tutdu. Nazir oğlu ayı yemədiyini necə sübut edəcək? Prosesə “mərhum olduğu deyilən, əslindəsə mərhum olmayan” ayı gətiriləcək? Yaxşı, bəs gerçək mərhum prosesə reaksiya verməyəcək? Bəsdi, siz Allah, ölünün də qıdığı gələr heç?!
Analoqu olmayan ölkədə yaşadığımızı deyən hökumət nümayəndələri haqlıymış. İndi də analoqsuz məhkəmə dövrü başlayır. Dəsmallarınızı çıxarın... Ya gülməyə, ya da ağlamağa...

818 dəfə baxılıb