SİNOPTİKLƏR XƏBƏR VERİR...

	25 may 2012


Onlayn ictimai-siyasi qəzet

Sevinc TELMANQIZI

SİNOPTİKLƏR XƏBƏR VERİR...

Avropa qardan, şaxtadan büzüşüb, bizdə isə güllük-gülüstanlıqdır. Məlum olub ki, ölkədə qeydə alınan temperatur çoxillik iqlim normasından 5 dərəcəyədək yüksəkdir. Məmləkət olaraq çaş-baş günlər yaşadığımız heç kimə sirr deyil. Okeanın o tayındakılar insan azadlıqları uğrunda mitinqlər mərhələsini bitirib, heyvanlara qarşı ayrı-seçkilik haqq-hesabına keçdiyi halda, biz hələ də elementar hüquqlarımıza görə cınqırımızı çıxara bilmirik. Əcnəbi mala-mülkə əhəmiyyət verməyib, pulunu daha çox mənəvi zövqə - səyahətə, intellekt artımına sərf edirsə, biz qapıbır qonşunu çatlatmaq üçün daha bahalı, daha gözəgəlimli maşın, geyim... almaq azarındayıq. İndi də havamız. O da elə özümüzə bənzəyir. Özümüz kimi qeyri-adi, orijinal, havalı...

Ən maraqlısı isə bu durumun hidrometeoroloji açıqlamasıdır. Dünən oxudum, Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun direktoru Umayra Tağıyeva deyib ki, havanın belə mülayim keçməsinə səbəb orta atmosferdə bərqərar olmuş qərbi hava axınlarının soyuq hava kütlələrinin ölkə ərazisinə müdaxiləsinə imkan verməməsidir. Buna görə də bu həftənin sonunadək ölkə ərazisində atmosfer sirkulyasiyasının dəyişməsi gözlənilmir. Əslində bu da simvolikadır. Necə ki, ölkəyə Qərb dəyərlərinin, standartlarının gəlməməsi üçün qapılar bağlanıb, eləcə də qərbdən gələn hava kütlələrinə “yox” demişik.
Xaricdən qayıdanlar əcnəbilər haqda çox vaxt eyni sözləri deyir: “Orda adamlar o qədər pozitiv enerjilidir ki. Küçədə gedərkən tanımadıqları adamlara belə gülümsünürlər”. İlk baxışda düşünürsən ki, o məşhur “amerikan gülüşü” gizlənir bütün çöhrələrdə. Yəni gülə-gülə adamı ağlar günə qoymaq, ən yaxşı halda isə xoş görünmək istəyi. Amma dərindən düşünəndə məlum olur ki, əslində oralarda (biz olmayan yerlərdə) insanlar həqiqətən həyatın, mövcud şəraitin onlara verdiklərindən məmnundular. Və bu məmnuniyyətlərini də xoş bir təbəssümlə ifadə edirlər. Yəni söhbət bioloji prosesdən gedir. İnsan da, onun hüceyrələri də məmnundur və bu, onun çöhrəsində ifadə olunur. Özləri də havaları kimi təbiidir.
Bəlkə də Allah üzümüzə baxıb. Paytaxtın başına azca yağış, qar töküləndə nə günə düşdüyümüz göz qabağındadır. Asfaltlar “sürüşür”, yolları su basır, evlərə qaz, istilik nəqli dayandırılır, transformatorlar “qəfil” partlayır... Bir sözlə, Sibirə dönür Bakı. Bir anda Hacıbala Abutalıbovun yamayıb-bəzəyib, çıraqban etdiyi paytaxtın bütün paxırı üzə çıxır. Parisdə gördüyüm bir mənzərəni sizlə paylaşsam, fikrimi daha dəqiq izah edəcəm (görməmiş bir dəfə Parisə getdi, vurdu Eyfel qülləsini dağıtdı - S.T.) Demək, biz orada olduğumuz günlərdə paytaxtı qar götürmüşdü, havanın temperaturu -4 dərəcəni göstərirdi. Amma şəhər sanki adi günlərdən birini yaşayırdı. Cəmi bir gün nəqliyyatın pik vaxtında, Təcili Yardım, polis maşınlarının səsi küçəni götürdü. Onda da məlum oldu ki, yarana biləcək qəzaya müdaxilə etmək üçün həmin maşınları indidən səfərbər ediblər. Yəni belə şəhərə qış neyləyə bilər. Heç sərt siklon yanından yel olub ötə də bilməz...
Bir dəfə yazmışam, qoy bu, ikinci olsun. "Space" telekanalında xəbərlər buraxılışından sonra ənənəvi olaraq hava proqnozu da elan edilir. Amma astroloqun müşayiəti ilə. Tutaq ki, aparıcı xanım Bakıda havanın soyuq olacağını elan edir, astroloq isə dəxli olmadığı halda, tutaq ki, sabah Qoç bürcünü nəyin gözlədiyindən bəhs edir. Bu “harmoniya”nı kimin necə tapdığı müəmma olsa da, azərbaycansayağıdır. İndi də aşağıdakı anonsu verməyin vaxtıdır. Bu günlərdə Bakıda hava yaman istidir. Bütün bürclər, yaxın günlərdə hökumət sizi kütləvi bahalaşmaya məruz qoyacaq, hazırlıqlı olun...
Osmanlı türkləri çox ədalı, forslu adamlara havalı deyirlər. Onların əlindən yanıqlı olanda da “havan batsın” qarğışını eşitmək olar. Bizim ölkə də bu aralar yaman havalıdır. Sözün bütün mənalarında...

881 dəfə baxılıb