ULDUZ “SEZON”u | Yeni Müsavat

	25 may 2012


Onlayn ictimai-siyasi qəzet

Sevinc TELMANQIZI

ULDUZ “SEZON”u

İlin sonuna günlər qala qələm əhli yenə daraşıb astroloqların, falçıların canına. Özü də təkcə qələm əhli yox, məmləkət olaraq gözümüzü dirəmişik onların ağzına. Görəsən, qarşıdakı 365 gündə bizi nə gözləyir? Guya bu ildən əlimiz yağa-bala batıb.

Baxmayaraq ki, elə 2010-cu ilin ilk bir neçə ayından sonra gözünü növbəti ilə dkənlər də vardı. “Əşşi, bu il mənimki gətirmədi, inşallah 2011-də...” İlin necə keçəcəyini bir neçə astroloqun iki dodağı arasında olduğunu düşünənlərin uşaq sadəlövhlüyü qarşısında baş əyib, öz arqumentlərimə keçirəm.
Bir neçə dəfə özüm də belə yazılara imza qoymuşam, hətta redaksiyaya iki astroloq dəvət edib, onların debatını təşkil etdiyim günü də xatırlayıram. Onlar növbəti ili günbəgün, mövsümbəmövsüm təhlil etmişdi. Debat qurtaran kimi başda redaksiya əhli, sonra rəfiqə, qohum ordusunun “mənim bürcüm üçün nə dedi?” sualları əlində mən girinc qalmışdım. Adətən astroloqlar nə deyir, bir yada salaq. Bu il X bürcü üçün bərəkətli keçəcək, ilin ortalarına doğru xəstəlik gözlənilir, sonlara doğru isə işdə bir qədər uğursuzluq görünür.. Daha doğrusu ulduzlar belə vəd edir. İl 365 gündürsə, bu müddət ərzində insanın həyatında bərəkətli günlər də olacaq, xəstəlik də, maddi uğursuzluq da. Yəni, bunu bilmək üçün ulduzlara tərəf nərdivan dirəməyə gərək yoxdur. Bu, “iki vur iki bərabərdir dörd” qədər bəsit həqiqətdir.
Digər tərəfdən, gəlin xatırlayaq, ötən il astroloqun sizin iliniz, bürcünüz, yüksələn bürcünüz.... lə bağlı dediyi hansı proqnoz yadınızda qalıb? Yəni, birdəfəlik şpris kimidir bu proqnozlar. Bir günlük, ölüsü, bir aylıq ömrü var. Ondan sonra kimdi onu xatırlayan, ona uyğun addım atan?
Dərd təkcə bürc dərdi olsaydı, nə vardı ki? O gün Türkiyə mətbuatına göz atdım, dəhşət idi. Demək, astroloqun biri deyib ki, 21 dekabr tarixində ölkədə önəmli hadisələr baş verəcək. Neyçün ki, həmin tarix ən qısa gün, ən uzun gecəymiş.(heç dəxli var?-S.T) Bundan başqa, 4 yanvarda günəş tutulması var deyə başqa bir təlaş da bürüyüb ölkəni. 25 dekabrda da ulduzlar nəsə dombalaq aşacaqmış və sair. Yəni, ölkə qalıb bir-iki “rəml atıb, fala baxanların” əlində. Hamı işini-gücünü atıb, həmin günlərə fokuslanıb: Görəsən nələr olacaq?
Naxışımız güllü gəlib. 2011-ə giririksə, deməli, qiyamət gününə də bir il qalır. 2012-ci ildə dünya dağılacaq axı. Hollivud kinematoqraflarından tutmuş, siyasətçilərə qədər hamı bunu deyir. Necə deyərlər, geri sayım başladı. Qiyamətdi ki... Bundan sonra tərki-dünya, hər şeydən əlini üzmə əhvalına da tam köklənmək olar. Onsuz da dünya dağılacaq, elə deyil? Hamımız da azərbaycanlıyıq, nə ehtiyac var didişməyə... Varın gerisini siz düşünün. Bundan sonra başımıza nə desən, açacaqlar. Onsuz da qiyamət yaxınlaşır...
Mən hələ şükr edirəm ki, ölkədə qiyamətə hazırlıq kursları-filan təşkil olunmayıb. Zarafat etmirəm, xarici ölkələrdə bir ildən artıqdır, insanlar belə kurslara gedir, son gün, son dəqiqədə nə etməli olduqları barədə saatlarla mühazirələr dinləyir, təlimlər, sınaqlar keçir. Bədbəxt uşağı bu günə qədər dəfələrlə “qiyamət dəqiqəsi” yaşayıblar. Qiyamət günü baş tutmasa, özləri bir qiyamət qoparacaqlar - o boyda kurs pulu havayı getsin bəs?
Əslində mən də ona təəccüblənirəm ki, bizdə hər sahə üzrə kurslar, master-klasslar olduğu halda niyə qiyamət üzrə mütəxəssis yoxdur, kurslar açılmayıb. Axı bu məmləkət qiyamət gününə bənzər günləri tez-tez yaşayır. Adam var hər gün onlarla, yüzlərlə, hətta minlərlə insana divan tutur, onları o dünyaya göndərib qaytarır. Adam var ailəsini dolandıra bilmədiyi üçün hər gün dəfələrlə xəcalətdən ölüb-dirilir. Adam var... Dedim axı, biz bu sahə üzrə ixtisaslaşmışıq. Qiyaməti də, qiyamətə hazırlığı da, ulduzların gedişini də biz bilirik. “Qurdlar Vadisi”ndə necə deyir? Burda kuralları biz qoyarız, biz pozarız... Gurultulu səsləndi, hə? Yenə öz fikrinizdə qalır, bürclərə inanırsınız?
Dünyaya ulduz olaraq gəlmək varmış...

948 dəfə baxılıb