“BU NƏ PLOVDU, YAĞ GƏTİR...”

	25 may 2012


Onlayn ictimai-siyasi qəzet

Sevinc TELMANQIZI

“BU NƏ PLOVDU, YAĞ GƏTİR...”

Hər ilin sonu eyni təranə çalınır. “Gələn il Allah qoysa”... ilə başlanan cümlələrin sayı-hesabı olmur. Məhz əqrəblərin saat 12-ni vurmasına hesablanan dürlü planlar da öz yerində. Sanki keçən il və ya ondan əvvəlki il yeni ilə necə girdiyini xatırlayan biri varmış kimi. Filosofluq olmasın, amma bu yeni il də insanın özünü aldatması, təskinlik, yüngüllük yaşaması üçün bir bəhanədir. Çoxumuz bu il başara bilmədiyimiz, bir çox hallarda isə mümkünsüz olan planları gələn ilin belinə yükləyirik. Elə ilin ortasından etibarən. Gələn ildən dieta planı quranlardan tutmuş, yeni ev, maşın sevdasına düşənlərə, dil kurslarına qatılacaqlara qədər... Yəni əslində bu yeni il bayramı da başqa növ aldanışdır. Nə fərqi var, onu Amerikadakı Con hinduşka bişirərək qarşılayır, yoxsa Bakıdakı Fatma plov dəmləyərək.

Dükan-bazara çıxanda adamı lap dəhşət bürüyür. Adamda elə təəssürat yaranır ki, sanki bizim camaat ancaq bayramda yeyib-içir. Bəs deyincə yemək, düt deyincə içmək üçündür Yeni il gecəsi deyə düşünürsən. Planlar da bunun üzərinə qurulub. “Ayın 31-ə nə bişirək?”, “Yeni il gecəsi möhkəm vurarıq” və sair. Yeyib-içən millətik, canımız yanmasın...
Yeyib-içmək demiş, Dövlət Dillər Universiteti yenə, bir daha, yenidən, israrla.... plov festivalı keçirib. Düzü, festivalın təfərrüatlarıyla maraqlanmadım, çünki xəbər nəyə desən dəyərdi. Xəbərdə isə belə deyilir: “plov festivalında regionşünaslıq kafedrasının müəllimi Təranə Quluzadənin ”Düyü və onun yayılma arealı", həmin kafedranın müəllimi Rəna Rəcəblinin “Azərbaycanda çəltikçilik tarixindən” və kafedranın müdiri, dosent Sevdagül Əliyevanın “Azərbaycan mətbəxinin şahı” mövzularında məruzələri dinləniləcəkdir. Məruzələrdə düyünün vətəni, növləri və bəzi xalqların qidasının əsasını təşkil etməsi haqqında, plov sözünün hərfi və lüğəti mənası, plovun yaranma tarixindən, eləcə də Azərbaycanda çəltikçilik tarixindən bəhs ediləcəkdir.
Tədbirdə tələbələrin ifasında musiqi nömrələri də səslənəcəkdir.
Festivalın növbəti hissəsində isə Azərbaycan mətbəxinin şahı sayılan plovun 55 növü (Allah gözünüzü doyursun-S.T) tədbir iştirakçılarına təqdim ediləcək və hazırlanma texnologiyası haqqında məlumat veriləcəkdir. Bununla yanaşı, iştirakçılar plovun “Buta” adlı yeni növü və Azərbaycan bayrağı formasında hazırlanan “Bayraq” plovu ilə də tanış olmaq imkanı əldə edəcəklər. “Dadlı hissə” adlanan son hissədə isə ADU müəllim azad həmkarlar komitəsinin dəstəyi ilə 300 nəfər üçün nəzərdə tutulan müxtəlif plov növlərindən hazırlanmış ziyafət süfrəsi açılacaqdır".
Adama elə gəlir ki, kimsə lətifə danışır, düzdü? Yəni, yazını burda da bitirmək olardı, çünki sözün bitdiyi yerə gəlib çıxmışıq. Amma başda rektor Səməd Seyidov olmaqla, ali məktəb rəhbərliyindən Allahını sevən kimsə biz binəvalara başa sala bilərmi ki, Dillər Universiteti hara, plov hara? Bunu Milli Kulinariya Mərkəzi etsə, anlarıq, hansısa restoran və ya restoranlar şəbəkəsi qolunu çırmasa, susarıq. Amma rus demiş, “priçyom” Dillər Universiteti? Biz bilən bu təhsil ocağı (indi o ocaqda plov dəmlənir-S.T) millətin balasına dil öyrətməlidir, plov bişirmək yox. Hələ siz mühazirələrin mövzusuna baxın... “Düyü və onun yayılma arealı”, “Azərbaycanda çəltikçilik tarixindən”...
Ölkə deyil ey, mətbəxdi. Biri 49 metr uzunluğunda tort bişirir, o biri 59 növ plov dəmlətdirir. Əlinin papağı Vəlinin, Vəlininki Əlinin başındadır. Bir kimsə öz işi ilə məşğul deyil. Təhsil verməli olan da, camaatın qayğısına qalmalı olan da başını salıb qazanın içinə. Elə bilir ki, heç kimin heç nədən xəbəri yoxdu. İllər əvvəl müəllifi olduğum “Mətbəxdə” rubrikasında müsahiblərimdən biri Azərbaycanı torta bənzətdiyini demişdi. Qarışıq ərzaqları, qatları, dürlü bəzənmə qaydası ilə. Son günlər ölkədəki mətbəx sevgisini görəndə bu bənzətmə yadıma düşdü. Hər şey bir-birinə qarışıb, hərə bir tərəfdən “bəzəyir”.
İndi ali məktəb divarları arxasında(eləcə də festivalın keçirildiyi universitetdə) şıdırğı alver gedir. “4 kəsirə 500 manat, 3 zaçota 150, aşağı yeri varmı?” Bax, əsl festival budur. Analoqu olmayan bu bayramı isə dost-düşmənə göstərməyə oğul istəyirəm. Məşhur rus filmində necə deyilir? İmtahan həmişə bayramdır...

771 dəfə baxılıb