ƏN BÖYÜK KƏŞF - AZƏRBAYCANDA...

	25 may 2012


Onlayn ictimai-siyasi qəzet

Sevinc TELMANQIZI

ƏN BÖYÜK KƏŞF - AZƏRBAYCANDA...

Alimlər indi də geridə qoymağa hazırlaşdığımız 2010-cu ili dəyərləndiriblər. Məlum olub ki, bu il bir çox kəşflərlə yadda qalıb. Atası kompyuter olan ilk süni hüceyrə, insan toxumaları içərisində yaşaya bilən ilk molekulyar robot, yad planetlərdə həyat, kainatın yaradılışının sirri... kimi kəşflər məhz bu ilin məhsulları imiş. Əslində alimlərin kəşfi ilə bağlı hər zaman özəl yanaşmam olub. Alimlə alimlik etmək istəmirəm, amma bu zalımların bir dedikləri heç zaman o birini tutmayıb.

Məsələn, bir səhər oyanıb kəşf ediblər ki, səhərlər süd içmək insan ömrünü uzadır. Amma bir neçə gün sonra qaynanmış südün xərçəng xəstəliyinə səbəb olduğunu ortaya çıxarıblar. Tez-tez həyəcanlanmağın gah ürəyə ziyanlı olduğu kəşf edilir, gah da adrenalin yüksəlişinin insana xeyirli olması iddia olunur. Sağlıqlı yaşam tezisləri adı altında insan menyusuna nələrin təklif olunduğunu məndən yaxşı bilirsiniz. “Yemə, öldürər” deyibən, o qədər qidanı siyahıdan çıxarıblar ki, insan sağlıqlı yaşam anlayışına rəsmən nifrət etməyə başlayıb. O ki qaldı 2010-cu ilə aid “”yad planetdə yaşayışın kəşfi" məsələsinə, biz bu kinonu illərdir görürük. Kosmosdan bəhs edən söhbətlər artıq insan oğlunu iyrəndirməyə başlayıb və bu, kəşf sayılmaz.
Kəşf isə odur ki... Düzü, elə bizim məmləkət bu ili bir çox kəşflərlə geridə qoydu. Azərbaycan insanı məhz bu il öyrəndi ki, məmləkətdə “heç vaxt heç vaxt demə” məsəli artıq şahdır. Təkcə son parlament seçkilərini götürək. Hakimiyyətin ətrafında daha sıx birləşmək üçün tıxac yaradanların yeni, fərqli, bambaşqa... metodlarla seçimi kəşf idi. Məlum oldu ki, artıq sevilən və seçilən olmaq üçün köhnə üsullar keçərli deyil. İndi məşhur məsəldə deyildiyi kimi, “böyüklər deyirsə ki, əjdaha uçur, demək, uçur, amma bir az aşağıdan” fikrini müdafiə edənlərin adı “konstruktiv” siyasətçidir.
Bu il öyrəndik və özü də deputatlığa məzəli namizədlər sayəsində beynimizə həkk etdik ki, Azərbaycanın problemləri beynəlxalq arenDAya çıxarıla bilər, Azərbaycanın xəritəsi qartala bənzəyir, qartalın arxası isə karikaturaya...
“Müxalifət az olarsa, basılmaz vətən” atalar məsəli də bu ilin kəşflərindəndir. Müxalifətçilər, müxalif qələm sahibləri parlamentdən, siyasi arenadan o qədər uzaqlaşdırıldılar ki, onun radiusuna qayıtmaq üçün xeyli yol qət etməli olacaqlar bundan sonra. 2010 bunu da öyrətdi bizə.
Bu il kəşf etdik ki, Azərbaycan insanı artıq öz gücünə evlənə bilmir. Mütləq bir elgiz, nərgiz, təngiz... olmalıdır ki, cavanları ekranda bir araya gətirsin, lazım gələndə ağsaqqallıq edib, onların üstünə çəmkirsin, qollarından tutub, studiyadan bayıra qovsun. Atalar oğulları, analar gəlinləri, eltilər qayınanaları... ilə problemlərini ancaq milli efirdə müzakirə edib, rahatlana bilərlər. Bunu da öyrəndik. Yeməyi üzünün ənlik kirşanı par-par parıldayan manıslar bişirə bilər ancaq. Mənəviyyatdan xəbəri olmayanlar insanlara mənəviyyat dərsi verə bilər bir qayda olaraq... Az şeydir?
Yoxsa ki, xərçəngin dərmanı tapılıbmış. Azərbaycanda baş çıxarıb yaşaya bilmək elə xərçəng dərmanı kəşf etmək kimidir. Tapdınsa, deməli, vaxtsız ölümün pəncəsindən də qurtulmuş sayılırsan...

1367 dəfə baxılıb