AY SİZİ.... DOVŞAN YESİN

	25 may 2012


Onlayn ictimai-siyasi qəzet

Sevinc TELMANQIZI

AY SİZİ.... DOVŞAN YESİN

Bineyi-qədimdən mövhumata meyilli camaat olmuşuq. Yolumuza qara pişik çıxsa, dərhal geri dönər, yanımızda tək asqıran olsa, həmin gün qaralar bağlayar, sağ əlimiz qaşınsa pulun gələcəyinə, sol əlimiz qaşınsa, pulun gedəcəyinə sidq-ürəkdən inanarıq. Bizim dünyamızda “qara daban”lar, “bəd uğurlular”, bir sözlə, nəhs kateqoriyalı bir düjün adam var. Onlar qara siyahımızdadır. İşdi-şayəd, taleyüklü bir işə görə evdən çıxanda hansısa biriylə qarşılaşsaq, əmin oluruq ki, o işin fatihəsini oxumaq lazımdır.

Yadımdadır, qəbul imtahanına getdiyim gün qonşular arasında bəd uğurluğu ilə ad qazanmış üst qonşumuz qarşıma çıxmışdı. Valideynlərim, eləcə də digər qonşular onu görən kimi dərhal halıma acımağa başladılar ki, bəs yazıq uşağın bir illik əziyyəti puç olub getdi. İmtahana gedən yolda bizimkilər rəsmən gələn il üçün daha ciddi hazırlıq planları qururdular - daha güclü hazırlıq kursu, “bunker” müəllimlərinin yanına getmək... Sanki bir illik hazırlığım elə bu qonşu xalaya bağlı imiş, nə sınaq imtahanlarımın normal nəticələri, nə daha öncəki göstəriciləri yada salan vardı. Ali məktəb qapıları üzümə “bağlanmışdı”, vəssalam. Düzdü, həmin il tələbə statusu qazanmağımla qonşumuzun mənfi imicində bir dəyişmə oldu, məhəllə əhli xalanın dabanlarının qara yox, mübarək olduğu qənaətinə gəldi, amma... Bütün “bəd uğurlar”ı bir gündə xilas etmək olmur ki...
Bu uğur, şans, düşər-düşməzlik, sınama... ilə bağlı söhbətlər Yeni il gecəsi, eləcə də, ilin ilk günü lap fantan vurur. Yəqin son iki-üç gündə belə söhbətlərdən siz də etmisiniz, etməmisinizsə, şahidi olmusunuz. Bir neçəsini yazım, xatırlayaq: “Saat 12-ni vuranda heç kəs yatmasın, yoxsa il boyu elə yataqda qalar”. “Həmin dəqiqələrdə yeyin, için, şənlənin ki, il də belə şən keçsin”. Hələ lap şitini-şorunu çıxaranlar tanıyıram ki, ayın 1-nə keçən dəqiqədə evdəki bütün bulaşıq qab-qacaqların yuyulmasını vacib sayır. Yoxsa il boyu qablar çirki qalacaq? Absurdun bu həddini tanımırdınız? İlin ilk gününə gəlincə, həmin gün evinə qonaq gələnin kimliyi də əhəmiyyət daşıyan məsələlərdəndir. Əlində nə gətirməsi, gəldiyi gün özünü necə aparması.... say, say bitən deyil. Sinov gedirik belə sınamalardan ötrü.
Yəni, mahiyyətə yox, formaya əhəmiyyət verənlərdənik. Başımıza gələn pis, uğursuz işlərdə mütləq bir qara pişik, qara daban, qara it... axtarmaqda maraqlıyıq. Halbuki işimiz alınmırsa, bunun səbəbkarının, tutaq ki, hansısa rüşvətxor məmur olduğunu qəbul etməklə söhbətə başlaya bilərik. İl boyu xəstəliyin də, uğursuzluğun da, lap elə var-dövlətin də sahibi ola bilərik. 365 gün bu, nəyin necə olacağını bir adamın bir cüt ayağı müəyyənləşdirə bilməz ki? “Samanyolu”nun “Sırlar dünyası”ndakı kimi hər şeyi mövhumata bağlamağa son qoymağın vaxtı çatmayıb? O məşhur lətifəni bilirsiniz yəqin: Sağ əli qaşınan kişiyə dostu pul gələcəyini deyir. Kişi sonra sol əlinin də qaşındığını deyir, məlum olur ki, gələn pul sonra gedəcək. Ardınca sağ qulağının, sol qulağının, ayağının... da qaşındığını deyir. Dostu bunların hər biri üçün bir proqnoz versə də, “qaşınma” söhbəti bitmir. Axırda hirslənib “yaxşısı budu, sən get çim” məsləhətini verir... Bax, bizimki həmin söhbətdi.
Ona qalsa.... İl cəmi 5 gündü başlayıb, amma kriminal xronika qara-qura hadisələrlə dolub-daşır. Yol qəzaları, mənzil qarətləri, ölən bomjlar, içəndən sonra arvadını öldürən ərlər... Hamısı baş verib Bakıda. Siyasi arena ondan daha qaynar. İndi neyləyək? İndidən qaralar bağlayıb, “bu il bizə düşmədi”mi deyək?
Hər şeyi qoyaq bir kənara - il nə üstə təhvİl gəlib? Dovşan üstə. Dovşan da ki, meşənin ən qorxaq, ən ürkək, rus demiş, ən “çumo” heyvanı sayılır. Başıqapazlı olub ömür boyu - gələn vurub, gedən vurub. Deməli, bizi də bu il dovşan taleyi gözləyir, eləmi?(Guya ki, əvvəlki illərdə lap şir olub, bütün aləmə hökmranlıq etmişik də- S.T)
Odu ki, il hələ təzə “bismillah” eləyib, onu hürkütməyin. Dovşan olmamaq öz əlimizdədir...

1158 dəfə baxılıb