ARVADIN YAXŞISI... | Yeni Müsavat

	25 may 2012


Onlayn ictimai-siyasi qəzet

Sevinc TELMANQIZI

ARVADIN YAXŞISI...

Qadın-kişi münasibətləri ilə bağlı mübahisələr dünya bina olandan bəri aktual olub. Filosoflar baş sındırıb, yazarlar bununla bağlı əsərlər yazıb, rejissorlar kino çəkib... Hətta baş sındıran vaxt qərara da gəliblər ki, kişilər evlənsə yaxşıdır, çünki axırda ya xoşbəxt olurlar, ya da filosof. O gün dostlardan biri isə durnanı lap gözündən vurmuşdu. Başqa bir dostunun fikirlərini tirajlayıb yazmışdı ki, “Arvadın yaxşısı təhlükəlidir. Pisi yenə boşamaq olur”. Mən onun ilkin variantını elə ilkin mənbədən belə eşitmişdim ki, “ən pis arvad yaxşı arvaddır. Çünki onu boşamaq olmur”. Əslində mahiyyət etibarilə eyni fikirlərdir, amma...

Anlamadığım nöqtə də əslində güclü cins nümayəndələrinin daim narazı tövrləridir. Qadın pisdir, vay, qadın yaxşıdır, yenə vay. Bir dostumuzun dediyi kimi, “bizim üstünlüklərimizi bizim qüsurumuz kimi qələmə vermək” nə vaxtdan yeni fəlsəfi kəşf olub? Yaxşı olanda da pis kimi qələmə verilmək - bu qədəri də pes doğrusu. Və ya şair demiş, siz bizi sevəsiniz deyə, bu cavan yaşımızda öləkmi? Hələ bu şükürlüdür. “Qadın da insandır” deyən bir mərhum siyasətçinin fikirləri son vaxtlar necə tirajlanıb, fərqindəsiniz? Özgə vaxt onun bir fikrini də bəyənməyən dostlar indi yeri gəldi-gəlmədi “filankəs necə gözəl tapıb?” deyərək sitatı bol-bol təkrarlayırlar. Hələ mən “qadın insanın dostudur”, “ən yaxşı arvad ölü arvaddır” kimi mənasız, duzsuz zarafatlardan danışmıram... Bir deyil, beş deyil, hansı birini sadalayasan?
Bu yerdə iki kitab arası açmış birisi olaraq filosofların qadınlarla bağlı dediyi ən gözəl cümlələri, fikirləri təkrarlamaq, sözü qüvvətləndirmək olardı. Yeri-göyü köməyə çağırıb, Həvvadan üzü bu yana bəşəriyyətdə qadınların sayəsində baş verən gözəllikləri xatırlamaq da həmçinin. “Qurdlar Vadisi”nin Seyfosu misalı heç kim “bu qadınlar bir çocuq doğurur, o dəqiqə də özlərini Allah zənn edirlər” fikrini əlində qalxan etməsin, çünki tipik cığallıqdır.
Cığallıq olduğunu isə bax elə indi yazacağımız hadisə göstərir. Srağagün Xaçmazın Əbilyataq kənd sakini, 73 yaşlı Şəfaqət İbrahimov özünü iplə asaraq intihar edib. Və sizcə bu ağsaqqalı belə bir addım atmağa nə vadar edib? Cüzi pensiya, xəstəlik, dolanışıq çətinliyi.... Heç biri. 3 ay əvvəl 52 illik həyat yoldaşını itirməsi. Ailəsinin dediyinə görə, qoca ömür-gün yoldaşının ölümündən sonra tez-tez şikayət edərək, onsuz qala bilmədiyini deyirmiş və .... Allah rəhmət eləsin.
Bütün kişilər xanımlarını itirəndən sonra “yarım gedib, tək qalmışam” əhvalıyla intihar etmir və bu fakt ümumiləşdirmə üçün yetərsizdir, fərqindəyəm. Çünki qadınlardan fərqli olaraq, güclü cinsin nümayəndələri həyat yoldaşını itirəndən sonra ikinci dəfə evlənməyə daha çox meyl edirlər. Bununla belə, yuxarıda yazdığım misal da, elə ikinci evlilik tendensiyası da onu göstərir ki, qadınların içində bulunmadığı ev də, məclis də, həyat da bozdur, mənasızdır. Xanımı bir neçə gün evdə olmayan ailənin durumunu sadəcə təsəvvür edin. Evdə nə təmizlikdən, nə istilikdən, nə də huzurdan əsər-əlamət qalır. “Olmazsa olmaz” deyilən var ha, bu ifadə qadın nəzərdə tutularaq yaranıb, məncə. (Bir az gurultulu oldu, fərqindəyəm - S.T.)
Qısa müddət öncə Türkiyə telekanallarında maraqlı bir reklam çarxı fırlanırdı. Balaca, şirin bir qız uşağı öz həmyaşıdı oğlandan soruşurdu: “Senin baban ne iş yapıyor?” Oğlan sakitcə “doktor” deyir. Qızsa bu cavabı eşidib başlayır nə başlayır: Ama benim annem hem doktor, hem aşçı (aşbaz), hem itfayeçi (yanğınsöndürən).... hem ayakkabı bağlayıcı..."
Bax belə... Reklam deyib keçməyin, anaların, qadınların dəyərini uşaqlar belə bilir.
P.S. Yazıda tez-tez istifadə olunan “arvad”(doğru variantı - qadın) sözünə görə həmcinslərimdən üzr istəyirəm. Amma arqumentlərə cavab verərkən qarşı tərəfin sitatlarından istifadə etmək zorunda qaldım.

967 dəfə baxılıb