ÖLÜVİZİYA | Yeni Müsavat

	26 may 2012


Onlayn ictimai-siyasi qəzet

Zamin HACI

ÖLÜVİZİYA

Milli Teleradio Şurasının sədri, Eynulla Fətullayev demişkən, “Ramiz Mehdiyevin icazəsi olmasa kabinetindəki televizorun kanalını dəyişməyə cürət etməyən” Nuşirəvan Məhərrəmli də telekanalizasiya sistemimizdəki toy, evlənmək verilişlərini tənqid eləmişdi. Sitat: “Hesab etmirəm ki, normal adam orda özünə ailə qursun. Ola bilsin, burda başqa məsələlər də var. Efir xatirinə incəsənətin müəyyən fəndlərindən istifadə də edə bilirlər.

Amma istər-istəməz, ailə məsələsini efirə çıxarıb o formada göstərmək həmin kanallara heç bir şöhrət gətirmir”. Artıq neçənci dəfədir hakimiyyət nümayəndələri televiziya kanallarından şikayətlənirlər. Guya bu vəziyyəti özləri yaratmayıb. Guya bu kanalların hər birinin arxasında hansısa nazirin, məmurun, rejim nümayəndəsinin barmağı durmur.
Bir dəfə yazmışam, yenə yazıram: televiziyada evlənmək, toy verilişinin olması problem deyil. Problem ölkədə azad televiziyanın yoxluğudur. Təzəlikcə Prezident Administrasiyasında şöbə müdiri Əli Həsənov da telekanallardan gileylənmişdi: “Kommersiya proqramları olmalıdır, eyni zamanda televiziyalar vətəndaş cəmiyyətinin mühüm institutları kimi milli dəyərlərin qorunması, gənc nəslin yetişməsi, gələcəyə hazırlanması sahəsində də müəyyən məsuliyyət daşıyırlar”. Televiziyanın funksiyaları sırasında “gənc nəslin yetişdirilməsi” kimi bir vəzifənin də olması nəsə yenilikdir. Əli Həsənov bunu ixtira edib. Yəqin sonra da qocaların yola salınması funksiyası olur.
Televiziya kəşf ediləndən bəri onun əsas funksiyası insanlara xəbər çatdırmaq olub, ancaq gördüyümüz kimi heç bir yapokratı Azərbaycan televiziyalarında xəbərin yoxluğu narahat eləmir. Toydan, şoudan-filandan veriliş sifariş edir, sonra bir neçə il belə verilişlərin qarasıyca donquldanırlar. Xəbər hanı, yoldaşlar? Ölkəni sel basır, terrorçu camaatı qırır, ev uçur - ən gec bunu ölkə telekanalları verir. Azərbaycan camaatı yerli kanallara etibarını tamam tükətmişdir, ondansa İranın “Səhər” kimi düşmən mövqeli kanalını izləməyi düz sayır.
Vaxtilə “Lider” kanalı efirdə gündüz vaxtı pornoqrafiya yayanda jurnalistlər Nuşirəvan bəyi tapa bilmirdilər. Yoxa çıxmışdı. Axırda da çıxıb dedi... Düzü, o qədər mənasız açıqlama vermişdi, heç yadda saxlamamışam, indi də axtarmağı lazım bilmədim. Hər halda, efirə porno verən kanala adi xəbərdarlıq etməyə də, türkün sözü, pultu çatmayan bir teleradio şurası sədrinin sözünün nə mənası var? Ancaq yox, bu adam normal ailə quruculuğunda efirin rolundan dəm vurur. Toy verilişlərinin əleyhinə çıxır. Guya efirə çıxıb “özümə arvad axtarıram” demək 17 ildir xalqın evinə ifraz edilən “iqtisadi inkişaf, dövlətçilik, sabitlik, qurtuluş” yalanlarından daha pismiş. Şadlıq sarayından başqa nə tikmisiniz ki, indi də efir toyu əleyhinə danışırsınız?
Eşitdiyimə görə (artıq neçə ildir mən də Azərbaycan telekanallarına baxmaq kimi bir mazoxizmdən qurtulmuşam) bir telekanalizasiyada toy verilişi artıq bağlanıb, o birindəki üzərində də qara buludlar sıxlaşır. Yaxşı, siz nə istəyirsiniz axı, yapokratlar? Camaata ictimai-siyasi, xəbər, elmi-praktik verilişlər göstərməyi telekanallara qadağan etmisiniz. Çünki belə verilişlər xalqı oyadar, birlik yaradar, təbiətdə “inkişaf” qurultusundan, “dövlətçilik” cippiltisindən, “sabitlik” mırıltısından başqa da səslər olduğunu eşidərlər, o zaman rejimin axırı çatar. Bunu başa düşdük - özünüzü qoruyursunuz. Bir ara dini verilişləri də bağladınız, çünki burda da hərdən lazım olmayan mənəviyyat söhbətləri gedirdi, Azərbaycan xalqı isə padşahın mərhəməti ilə yalnız qarnını və qarından aşağını düşünməlidir. İndi toy verilişləri, manıs-şoulardan da şikayətlənirsiniz. Olmadı ki, bu. Xəbər olmasın, müzakirə olmasın, toy da olmasın... Bəs nə olsun? Qəbiristanlıq sükutumu?
Onda buyurun, 24 saat qəbiristanlıqdan canlı yayım verin. Qoy ölülər elə bilsin dirilər halva yeyir...

2442 dəfə baxılıb