YUXUNDA... GÖRƏRSƏN | Yeni Müsavat

	26 may 2012


Onlayn ictimai-siyasi qəzet

Sevinc TELMANQIZI

YUXUNDA... GÖRƏRSƏN

Bu xaricilər həyatlarına rəng qatmaq üçün hər gün bir hoqqa çıxarırlar. Adamlar bütün dərd-qayğılarından azad olublar, indi də adrenalinləri çatışmır. Ekstra həyəcan üçün paraşütdən yerə hoppanandanmı deyim, ilanlarla bir qəfəsin içinə girənlərdənmi... Son olaraq da dünyaya küy salıblar ki, bəs əksəriyyətinin yuxusuna naməlum, əsrarlı eyni adam girir. Los Ancelesdən tutmuş, Berlinə, San Pauloya, Tehrana, Romaya, Parisə, Stokholma... qədər yüz minlərlə adamın zaman-zaman yuxusuna girənin kimliyi isə dünyaya dərd olub. O gün fotorobotunu gördüm saytlarda, eybəcər, keçəl bir kişidir. Bir suyu da Tahir Xubanovla Fərda Əsədova (bəlkə də onlardır, kim bilir?-S.T.) oxşayır. Sir-sifətindən də zəhrimar yağır.

İndi psixoloqlar qarışıb terapistlərə, terapistlər siyasətçilərə... Hamı düşünür ki, bu adam kim ola? Düzü, ortada bəs deyincə də versiya var. Gah deyirlər, bu, Allahın göndərdiyi elçidir, gah deyirlər, insanların yuxusuna girməyi bacaran qeyri-adi istedadlı insandır. Ən gülməli versiya isə bunu bir şirkətin planlaşdırmış olmasıyla bağlıdır. Versiyaya görə, insanları dəli etmək üçün oyun quran bir şirkət illərdir, bu planı həyata keçirir və deyəsən, nail də olur.
Düzü, əcaib kişini yuxusunda görənlər arasında azərbaycanlıların adı yox idi. Buna da min şükür. Çünki kişi yuxusuna girdiyi adamlara da qəribə məsləhətlər verirmiş. Sonradan guya bu, onların taleyinə təsir edirmiş və sair... Təxminən “Sırlar Dünyası” serialındakı ağ saqqallı dədə kimi. “Evladım” deyərək, gəlir, adamlara yol göstərir və gedir. Düzü, mən elə bilirdim, bu yuxu yozmalarına ancaq bizim kimi gələcəkdən ümidini üzən, mövhumatlardan mədət uman xalqlar inanır. Yəni bizimkilər yuxuda kömür dolu vaqon görən kimi sevinib nəzir paylayırlar ki, varlanacaqlar. Yox, əgər yuxularına valyutadəyişmə məntəqəsi giribsə, yas bağlayırlar, müflis olacaqlar. İlan görənlər qorxuya düşür, villa görənlər düşmən üzərində qələbə çalacağına inanır. Eyni yuxuda həm vaqon, həm valyutadəyişmə məntəqəsi görənlər isə lap çaş-baş qalır. Varlanacam, yoxsa müflis olacam? Hamletsayağı dilemma deyirlər bunun adına. Halbuki Azərbaycanda yuxu görmədən də nəyin necə olacağını təxmin etmək olur. Məsələn, bu gün hansısa nazir qudurğanlıq edirsə, bu, onun gələcəkdə daha da quduz, qaniçən olacağını göstərir. Bu gün ölkədə “analoqsuz inkişaf”la bağlı bir yenilik uydurulursa, sabah bu, özünü bahalaşmada göstərir. Yuxuna canavar da girsə, mələk də girsə nəticə dəyişmir... Ya da tutaq ki, yuxunuza yanan bina girdi. Bu, bir neçə gün sonra yaşadığınız evin söküləcəyinə hazırlaşın. Çayda batdığını görən azərbaycanlı tezliklə borca düşür və sair. Bir sözlə, yuxularımız da həyatımız kimi əcaibdir.
Bayaq da dedim, bizim yuxumuza o əsrarəngiz, çirkin kişi girməyib. Belə şey olsaydı, indi “bir inəkdən üç bala alındığını” sensasiya kimi sırıyan xəbər saytları bundan da yazardılar. Amma mən Azərbaycan insanının yuxusuna hər gün girənlərin siyahısını tuta bilərəm. Azərbaycan insanı azadlığı, firavan yaşayışı, rüşvətsiz təhsili, hüquq azadlıqlarını... illərdir yuxusunda görür ancaq. Yuxunu da adətən tərsinə yozurlar axı. Heç biri baş tutmur.
Bir məşhur lətifə var. Günlərin bir günü bir kişi yuxudan oyanıb, şirin-şirin gülür. Həyat yoldaşı nə baş verdiyini, yuxusunda nə gördüyünü soruşur. Kişi deyir: “Gördüm ki, ikimiz də ölmüşük, bizi ayrı-ayrı yerlərə aparırlar. Sən ağlayırsan ki, məni ərimdən ayırmayın”. Qadın hirslənib, “bu ki, kabusdur, yuxu yox” deyir. Ərin cavabı gecikmir: “Yox, həyatım röyadır, röya...”
Biz də lətifədəki kişi kimi illərdir röya görürük. Həyata keçib-keçməyəcəyini bilmədən həm də...

1146 dəfə baxılıb