ÇİRKİN RÜŞVƏTXORLAR DİYARI

	26 may 2012


Onlayn ictimai-siyasi qəzet

Sevinc TELMANQIZI

ÇİRKİN RÜŞVƏTXORLAR DİYARI

Bu günlərdə məlum oldu ki, sən demə, ölkədə hamı çirkin rüşvətxormuş. Hacıbala Abutalıbovun qulağı cingildəsin, təəssüf ki, heç kim bunu onun qədər sentimental, “indeyski”- göz yaşları içində etiraf edə bilmir. Sizi bilmirəm, şəxsən bir jurnalist kimi mən o etirafı öz qulaqlarımla eşitmişəm. 2004-cü ildə redaksiyaya bu etirafın yazıldığı lent yazısı gəlib çıxmışdı və biz iş günlərinin sonunda, çox yorğun vaxtlarımızda həmkarlarla birgə “Bakımızın merinin” ağlayaraq etdiyi etiraflara qulaq asıb dincəlirdik. Hıçqırıq, titrək səs tonu, qəhər - nə axtarsan vardı müəllimin etirafında...

İndi ortada ağlayıb, dəsmal çıxaran olmasa da, hər nazirlikdə kolxoz yığıncaqları sayaq nəsə keçirilir. Məlum olur ki, hamı pis işləyir, dövlətə sədaqətsizlik edir. Buna görə də məmurlar, məşhur film personajı demişkən, “həyatlarının bundan sonrakı hissəsi”ni rüşvətlə mübarizəyə həsr ediblər. Zərbəçilər danlanır, qabaqcıllar həvəsləndirilir. Açılan qaynar xətlərin bolluğundan isə hələ danışmıram. O qədər çoxdular ki, hətta rəfiqənə zəng edəndə gedib, qaynar xəttə düşdüyün olur. Dünən “islahat günləri” çərçivəsində işdən çıxarılanların statistikasına baxdım, paradoks yaranmışdı. Rüşvətxorluq faktlarına görə Baş Prokurorluq 5, Ekologiya və Təbii Sərvətlər Nazirliyi isə 136 nəfər işçisini vəzifəsindən azad edib. Çox güman ki, ortada yenə “qonşudan qalma geri” söhbəti rol oynayıb, yoxsa ki, ekoloqların gecə-gündüz meşədəki canavarlardan rüşvət istəməsi ehtimalı inandırıcı deyildi.
Amma məni daha çox Korrupsiyaya qarşı Mübarizə Fondunun rəhbəri Vasif Mövsümovun açıqlaması təəccübləndirdi. Müəllim deyib ki, rüşvətxorluğun aradan qaldırılmasında vətəndaş özü maraqlı olmalıdır, əks halda mübarizə effekt verməyəcək. Yəni bu, cücənin yumurtadan, yoxsa yumurtanın cücədən çıxması mübahisəsini xatırladır guya ki. Camaat verməsə, məmur götürməz. Yox, məmur istəməsə, millətin başına at təpməyib ki, pul versin? Sonuncu variant istisnasız doğrudur. Siz bu günə qədər həkim pul almır deyə xəstəxanadan çıxmayan, onunla süpürləşən xəstə görmüsünüz? Ya da gömrükdə sənədin arasına pul qoyan, amma pulu rədd edildiyi üçün binanın qabağında özünü yandırmaq istəyən vətəndaş? Məktəbdə fond pulu yığılmır deyə nazirliyə şikayət edən valideynlə necə, qarşılaşanınız olubmu?
Əslində isə durum gün kimi aydındır. Səlahiyyətin varsa, korrupsiyaya yol verirsən, imkan yaradırsan, ən yaxşı halda göz yumursan. Yəni, iki vur iki bərabərdir dörd. Bu cur təhlükəli zamanlarda da əldə-ayaqda qalan bir-iki işçini çıxart, Məşədi İbad kimi “qurban olasan ayağımın altındakı hambala” deyib, səs-küy sal, qurtarsın getsin. Sonra sən sağ, Misirdəkilər salamat... Boşalan yerlər üçün yeni namizədlərdən alınacaq şirinlik də öz yerində. Tipik “fillər təpişəndə otlar əzilir” misalı. Olan millətə olacaq.
Bu başılovlu günlərdə isə deputat Zahid Oruc deyir ki, gəlin bundan sonra and içək. Biz yox, onlar, yəni Milli Məclisin deputatları fəaliyyətə başlayarkən and içsinlər ki, ədalətli, təmiz, obyektiv... işləyəcəklər. Təklif var ki, deputat ilk andını ədalətli seçkilərlə seçildiyinə içsin. Bacarsa, təbii ki.
Yenə də Zahid müəllimə “dedim inandılar, and içdim inanmadılar”,- söhbətini xatırlatmağa lüzum görmürəm, amma bu, balaca uşaq variantıdır. Necə ki, evdə uşaq nəsə yalan danışanda dərhal and içməyə başlayır, eləcə də bu. Özü də tərslikdən uşaq and içməyə elə valideynlərinin canından başlayır. “Anamın canı üçün...”lə başlayan cümləni eşidən kimi anlayırsan ki, evdəki balaca Buratino olmaq yolunda irəliləyir, bir azdan burnu uzanacaq. İndi mən qorxuram ki, bəzi deputatlar da and içəndə “and olsun millətimin canına”,- deyə başlasınlar. Yazıq canımız, onda bizi heç kim xilas edə bilməyəcək. Parlamentdə var 125 deputat. Hərəsi mandat alanda bir dəfə, hansısa layihənin müzakirəsi zamana bir dəfə.... canımıza and içsə, gör bu vurub hara çıxır? Qarşıdakı 5 ildən sağ çıxsaq, bizə zaval yoxdu.
Yazını çirkin rüşvətxorluqla başladım, onunla da bitirim. Tarix sübut edir ki, bu ölkədə belə etirafın, Teymur əmi demiş, qəti qorxusu yoxdur. Baxın, Hacıbala müəllimə, illərdir dəf kimi oturub yerində. Siz xəbər agentliklərinin kvartalda bir dəfə onu “işdən” çıxarmasına baxmayın, adam Bakını sevməklə məşğuldu. Allah kəssin belə sevgini...

1357 dəfə baxılıb