İNTELLEKTUAL SÜRÜCÜLƏR ƏSRİ

	26 may 2012


Onlayn ictimai-siyasi qəzet

Sevinc TELMANQIZI

İNTELLEKTUAL SÜRÜCÜLƏR ƏSRİ

Bizim mikroavtobuslarda yazılan unikal elanlar yüz faiz Ginnesin Rekordlar Kitabına düşməyə layiqdir. Öz absurdluq səviyyəsinə görə təbii ki. Məsələn, “sürücü ilə danışmaq yasaqdır” yazılır əksərinin salonunda. Matın-qutun quruyur. Halbuki sən səhər “gedim bir sürücü ilə söhbətləşim, sonra qayıdaram” deyə evdən çıxmışdın. Misir olayları, vikileks qalmaqalı, inqilablara hazırlıq... bunların hamısını sürücü Tofiq dayı ilə müzakirə etmək günün önəmli işlərindən deyilmi hər birimiz üçün? Yanlış anlaşılmasın, sürücülərin intellektinə, savadına qətiyyən rişxənd etmək fikrim yoxdur. Sadəcə, sürücü ilə söhbəti qadağan edən nəqliyyat rəhbərliyini dəli bir alqışlamaq keçdi ürəyimdən.

Və ya başqa bir şanlı elan. “Hörmətli sərnişinlər, özünüzü cibgirlərdən qoruyun”. Bəli, bu vəzifə də anası ölməmiş sərnişinin öhdəsinə düşür. Polis, Nəqliyyat Nazirliyinin əməkdaşlarının belə bir mübarizə ilə nə işi ola bilər? Bəs onda metronun qabağında qoca arvadın satdığı limonları kim təpikləsin, dayanacağa gələn avtobuslardan gündəlik haqqı kim yığsın? Vətəndaş bu ölkənin həm polisi, həm müfəttişi, həm də fəhləsi olmalıdır.
“Qonşudan qalma geri” prinsipi ilə Nəqliyyat Nazirliyində də iclaslar keçirilir, korrupsiyaya qarşı mübarizə tədbirləri aparılır. Ötən həftə qəzetlərdə yazıldı ki, bəs yenidən sürücülərin vahid geyim söhbəti aktuallaşıb. Lap Avropa ölkələrində olduğu kimi, onlar da kepkalı, vahid uniforma ilə sərnişinləri qarşılayacaqlar, “buyurun, cənab” deyə marşruta dəvət edəcəklər. Dayanacaqdan kənarda düşmək istəyənlərə isə “ser, ayağının altında ölüm, olmaz” deyəcək və sair. İnanan daşa dönsün, biz bu “islahatlar”ı daha öncə də görmüşük. Mikroavtobuslardan radioların yığışdırılıb, əvəzində maqnitafon quraşdırılması, sürücülərin siqaret çəkməsinə qadağa qoyulması... çox uzaq keçmişdə deyil. Hansı biri işləyib ki?
Amma indi işləyəcək guya ki. Deyilənə görə, artıq mikroavtobuslarda musiqi səsləndirilməsi ümumən yasaqlanacaq. Buna səbəb sərnişinlərin əhvalıymış. Xatırladıram, o sərnişinlərin ki, hökumət ürəyi istəyəndə onların metroda gediş haqqını bir gündə 3 dəfə qaldırır, işıq, qaz, benzin qiymətlərini kəllə çarxa çıxarır. Bilirəm, indi çoxları iddia edəcək ki, avtobuslarda zövqsüz, səviyyəsiz ara mahnıları eşitməkdən bezmişdilər, bu islahat yaxşı oldu. Yaxşı, bəs eyni nömrəli avtobusların bir-biri ilə sərnişin yarışına girib, sükanı dəli kimi idarə etməsindən, marşrutlardakı cibgirlərdən, içəridəki antisanitariyadan - ayağını yerə vuran kimi göyə qalxan tozdan, Nəqliyyat Nazirliyi müfəttişlərinin günlük haqqı ödəməyən (ödəyə bilməyən) sürücünü maşından aşağı düşürüb, avtobusu da xətdən çıxarmasından, hər an gediş haqqının artacağı təhlükəsindən .... narazı deyilsinizmi?
Dekorativ tədbirlər - geyim, musiqi, siqaret yasağı -sərnişinin hüquqlarının bərpası deyil. Əksinə, sağ əllə sol qulağı qaşımağa bənzəyir. Axı eyni məntiqlə biz elə metro qatarına ayaq basan kimi “Jalə” şirələrinin, yuyucu tozun, lap elə “əəəən uzun düyü”nün reklamının yığışdırılmasını da tələb etməliyik. Niyə olmasın? Reklam pul gətirir, amma musiqi yox, ona görə?
Nəqliyyat Nazirliyi mətbuat xidməti rəhbərinin bu yasaqla bağlı milli.az saytında unikal bir açıqlamasını oxudum. Namiq Həsənov qanunvericilikdəki əlavə və dəyişiklikləri nəzərə alaraq hesab edir ki, avtobuslarda musiqi olmasa daha yaxşıdır. Çünki avtobusda musiqini sevməyən, yaxud əzizini itirmiş sərnişinlər ola bilər.
Amma bununla da kifayətlənməyib Namiq müəllim. Deyib ki, bundan sonra xəttə ancaq intellektual sürücülər çıxacaq. Yəni, gələcəkdə sürücüləri işə götürəndə, sahibkarlara lisenziya verəndə qarşıya qoyulan əsas şərtlərdən biri sürücülük vəsiqəsi ilə yanaşı, onun mədəni səviyyəsi də əsas götürüləcək. Maraqlıdır, bəs bu səviyyə necə ölçüləcək və ümumiyyətlə, bunu kim, hansı meyarlarla ölçəcək? Bəlkə haqq ödəmədiyi üçün sürücünü təkləyib ölümünə döyən müfəttişlər?
Amma deyəsən, “islahat”ın türkün sözü ana xəttini açıqlamağı unutduq. Neyçün ki, dediyimiz bu musiqi yasağına məhəl qoymayan sürücülər 40-50 manat məbləğində cərimələnəcək. Necə deyərlər, dananın quyruğunun qopduğu an da bu andır. İndi gəlsin sürücü sübut eləsin ki, yolda gedəndə tutaq ki, “Ana” muğamatına qulaq asmayıb. Ortada anonim “sərnişin şikayəti” var...
Odu ki, uniformanızı geyinin, siqaretinizi atın, maqnitafonunuzu da söndürün. İrəli... İntellektual sürücülər əsrinə xoş gəldiniz...

999 dəfə baxılıb