NAZİRLƏR DİZİ İZLƏYİRMİŞ...

	26 may 2012


Onlayn ictimai-siyasi qəzet

Sevinc TELMANQIZI

NAZİRLƏR DİZİ İZLƏYİRMİŞ...

Nəhayət, Azərbaycanda sonuncu sovxoz da ləğv olundu, amma bizim sovxoz yığıncaqlarından canımız qurtarmadı. “Hər inəkdən üç bala” prinsipi ilə nazirliklər, komitələr şanlı-qanlı iclaslar keçirmiş, quruculuğa AzTV demiş, öz töhfələrini vermişlər. Canım AzTV o gün daha bir unikal cümlə qurub, “qurdlu müxalifət jurnalistləri” də onu sosial şəbəkədə yayıblar. Yeri düşüb yazacam, cümlə məhz belədir: “Ötən il 20 min uşaq anaları tərəfindən doğulub”. Şanlı hökumətin ideoloji maşını buyurub ki, uşaqlar məhz anaları tərəfindən doğulub. Halbuki 1993-cü ilə qədər sözügedən proses özbaşına, qeyri-sabit bir formada baş verirmiş. Buna da şükür.

Nəsə, nazirliklərin korrupsiya ilə mübarizəyə verdikləri əvəzsiz töhfələrdə qalmışdıq. Bütün Azərbaycan bu mübarizənin effektindən dil boğaza qoymadan danışdığı halda, o gün yenə Türkiyədən maraqlı bir açıqlama gəldi. Qonşular Azərbaycandan Türkiyəyə evlənmək üçün gedən azərbaycanlı qızın macəralarından bəhs edən “Yahşi cazibə” adlı serial çəkiblər, yəqin bilirsiniz. Biz də onu eninə-uzununa təhlil etmişik deyə təkrar qayıtmayacam. Amma bu məşhur serialın rejissoru o gün əndrəbadi açıqlama verib. Deyib ki, “dizinin yayım saatında azeri bakanlar kimseye randevu vermiyor, dizini seyr ediyorlar ”. Düzü, mən bilən dizi bizim vaxtla axşam 10-da başlayır, həmin saatda isə heç bir iş randevusu (görüş) təyin etmək mümkün deyil. İkincisi, bizim nazirlər özlərinə sərf etməyəndə, heç bir saatda heç kimə (xüsusilə də sadə camaata) randevu vermirlər, onda qala serial saatında. Üçüncüsü və ən mühümü isə bütün millət nazirlərin korrupsiyanı aradan götürməklə bağlı gecəli-gündüzlü çalışdığını düşündüyü halda, onların “Yahşi Cazibe” izləməsi heç yahşi söhbət olmadı.
Nəsə, hesab edək ki, bu da bir səhv açıqlama idi. Və bunun səhv olduğunu necə deyərlər, rəqəmlər sübut edir. O gün açıqlandı ki, bəs Təhsil Nazirliyi (demək ki, həm də nazir) korrupsiya ilə mübarizə çərçivəsində düz 108 nəfəri işdən azad edib. Yəni, adamlar serial izləmir, zarafat gəlməsin, 108 nəfər... Amma az keçmədən araşdırmalar gerçəyi üzə çıxardı. Öyrəndik ki, 108 nəfərin cəmi 15-i gerçəkdən işdən azad edilənlərdir. 72 nəfər isə son 5 ildə işdən uzaqlaşdırılan, vəfat edən direktorlardır. Əminəm, Bəşir Səfəroğlu sağ olsaydı, qıdığı gələn ölülərlə bağlı günümüzə uyğun yeni parodiya səhnəsi ifa edərdi. Yenə də mübarizə zamanı mərhum insanların adını “pripiska”da kullanan rejimə atəşin alqış.
Amma nazirlik rəsmiləri təbii ki, bunu inkar etdi və bildirildi ki, işdən çıxarılanların siyahısını ictimaiyyətə açıqlaya bilməzlər. Çünki araşdırma yekunlaşmayıb. Adam bu obyektivlik qarşısında kövrəlib ağlamaq istəyir. Guya istəyəndə Əli İnsanovun evindən qızıl külçələri tapan, istəməyəndə isə Teymuraz Əliyevin Tiflis küçələrində fit çala-çala gəzməsinə göz yuman hökumətdən danışmırıq? Sanki bu ölkədə qanun şah imiş və bizim xəbərimiz yoxmuş. Əgər direktorun korrupsioner olduğu hələ araşdırma nəticəsində üzə çıxmayıbsa, hansı haqla işdən çıxarılıb? Yox, əgər üzə çıxıbsa, niyə adını açıqlamırlar? Dünyasını dəyişən müəllimlərin arxasında gizlənib, yalançı mübarizə fonu yaratmaq hansı kitab-dəftərə sığır? İndi kim təminat verir ki, o siyahıdakı x, y, z... müəllimlər gerçəkdən cəzalandırılıb, ya da görüntü üçün bir məktəbdən çıxarılıb, digərinə qoyulmayıb? Əlinin papağının Vəlinin, Vəlininkini isə Əlinin başına qoymaq axı son bir ayda “islahatlar”ın dəyişməz qanunudur. Flora xanım necə oxuyur? Dünya köhnə dünyadır, sevgiləri təzədir... Azərbaycan da köhnə Azərbaycandır, sadəcə korrupsiyaları təzədir...
Olmuş əhvalatdır. Medianın baməzə redaktorlarından biri maliyyə xərcləri ilə bağlı təsisçiyə hesabat yazıb. Bütün xərclərin nəyə sərf olunduğunu yalan-doğru qeyd edib, axırda 5-10 manat artıq pul qalıb. Onunla bağlı isə aşağıdakı izahatı qələmə alıb:"Bu məbləğin xərclənməsi zamanı korrupsiyaya yol verilib".
Bütün “korrupsiya” etirafları bu qədər məzəli olsaydı nə vardı ki? Bunlar millətə elə şah gəlirlər ki, hamı mat qalır. Zarafat deyil, adamlar dizi izləyir...

1526 dəfə baxılıb