ƏMƏKDAR SƏSBOĞUCULARIN REJİMİ

	26 may 2012


Onlayn ictimai-siyasi qəzet

Zamin HACI

ƏMƏKDAR SƏSBOĞUCULARIN REJİMİ

AXCP üzvü olan gənc Dəyanət Babayevi internet klubdan oğurladılar, iki gün xəbər bilinmədi. Sonradan onun Nəsimi polisi və məhkəməsinin əlbir əməliyyatı sonucunda 10 gün həbs cəzası aldığı məlum oldu. Guya Babayev Milli Bankın binası qarşısında telefonla ucadan danışır, üstəlik, söyüş söyürmüş. Azərbaycanda yaşayan hər kəs bunun nə qədər axmaq iddia olduğunu gözəl anlayır, çünki söyüşə və bağırmağa görə adam tutulsa, gərək elə həmin polislərin tam 70-80 faizi indi “içəridə” olaydı. Şəxsən mən küçədə ən pis bağırtı və söyüş səslərini həmişə polislərin çıxartdığını görmüşəm.

Qoy dahi şairin adına “layiq” şəkildə bu gün insanların dərisini soyan Nəsimi məhkəməsi izahat versin: Babayev hansı söyüşləri söyüb ki, ona 10 gün həbs verilib? Kimi söyüb? Telefonun o biri ucundakı şəxsi, yoxsa Milli Bankın qabağında duranları? Bu detallar çox önəmlidir, məsələn, həmin bankın qabağında təkcə adamlar durmur.
O cümlədən ölkədə insanların danışıq səslərinin neçə desibelə qədər icazəli olması haqda məlumat verilməlidir. Biz bilməliyik nə qədər qışqırmağın cəzası 10 sutkadır, səs hansı yüksəkliyə ucalanda cəza 1 aya qalxır və sairə.
Təzəlikcə Bakıda dəhşətli hadisə olmuşdu, yaramaz ər-arvad 5 yaşlı qızcığazı döyüb öldürmüşdü. Onlardan biri uşağın doğma atası idi. Və onlar ilkin izahatlarında polisə deyiblər ki, uşaq ağlayır, səs salırmış, kiridə bilməyib başına zərbə vurublar. Döşəməsilənlə, təpiklə... İndi polis izah eləsin ki, bir gənci ucadan danışmağa görə 10 gün həbsə atmaq bu olaya bənzəyir, ya yox? Sadə insanlardan fərqli olaraq polisin döymək təcrübəsi var, elə yerlərdən vururlar adam ölmür. Rəhbərliyin göstərişi var, bütün səslər kəsilməlidir, bütün qışqıranların ağzı yumulmalıdır. Ancaq icazəli manıs xanımcığazlar məmurların qabağında ulamaq haqqına malikdir.
Söz düşmüşkən, dünən bir xəbərdə deyilirdi ki, Gəncənin icra başçısı Yelmar Vəliyev öz dəvələrini otaran şəxsə prezidentin fərmanı ilə “Əməkdar aqronom” adı verdiribdir. Niyə də yox? Bu rejimdə hər məmurun öz “dəvəsi”, dəvəotaranı var. Əgər prezident onun təbliğat kampaniyalarında fəallıq edən, bir qəpiklik səsi və istedadı olmayan manıslara “Xalq artisti” adını ənam kimi paylayırsa, onda hər hansı icra başçısının da öz naxırçısına fəxri ad istəmək haqqı yaranır. Əgər Siyavuş Novruzov “hüquq elmləri doktoru” elmi dərəcəsi ala bilirsə, nədən Elmar Vəliyevin dəvə otaranı da əməkdar aqronom olmasın?
Dünən Tələbə Qəbulu Dövlət Komissiyasının sədri Məleykə Abbaszadə biabırçı rəqəm açıqladı: nazirliklərin birində düz 40 nəfər saxta diplomlu işçi çalışırmış! Görün bu ölkəni kimlər idarə edir - saxta diplomlu saxtakarlar. Hələ keçən ay Təhsil Nazirliyi Bakının 9-cu mikrorayonunda bir ünvanda (!) yerləşən üç saxta “ali məktəb” aşkarlamışdı. Qəhvə reklamında deyilən kimi, “üçü birində”. Həmin məktəbciklərin adı da ləzzətli idi: Ukraynanın Kadrların İdarə Olunması Beynəlxalq Akademiyasının, Ukrayna Regionlararası Universitetinin və Gürcüstanın Heydər Əliyev adına Beynəlxalq Regionlararası Universitetinin Bakı filialları. Bir yaşayış binasında 2 universitet və 1 akademiya qayırmaq ancaq Azərbaycan kimi dərəbəylik dövlət sistemlərində mümkün olur. Əslində bizdə elə həmişə təxminən bu cür olub. Sovet dövründən üzü bəri, görərdin deyirlər: “Filankəs Akademiklərin binasında yaşayır”. Yaxud “Yazıçıların evi ilə üzbəüzdə filan yerdə görüşək”. Bunu eşidən əcnəbi də mat qalardı ki, gör bunlarda elm olmasa da nə qədər akademik var. Yazıçı, şair-mair bolluğundan onlara ayrıca bina tikməli olublar. Nə olsun onlar oxumağa bir dənə babat kitab yazmayıb?
Yazını bir məktubla bitirirəm: “Mənim 12 yaşım var. Atam və anam 15 il rabitədə işləyib. Rabitə nazirinin müavini İltimas Məmmədov onları işdən çıxardıb. (Burada iddia olunur ki, Məmmədov onları rüşvət vermədikləri üçün işdən qovub və indi də ailəni yer üzündən silməklə hədələyir. Mən bunun yalan-doğru olduğunu yoxlaya bilmərəm və bəri başdan Məmmədovun da söz haqqını tanıyacağımı bildirirəm - Z.H.) Hər ikisi işsizdir. Ailəmiz acdır. Heç yanda iş yoxdur. Aclıq bu ailəyə güc gəlib. Rədd olsun soyqırım. Azərbaycan xalqını bu ailənin müdafiəsinə çağırıram. Azad Azərbaycan naminə. Əlaqə telefonu 0554372848".
Bu kədərli məktuba ancaq bir cümlə əlavə edə bilərəm ki, həmin nömrəyə zəng vurdum, məktubun həqiqi olduğunu dəqiqləşdirdim.

2124 dəfə baxılıb