BİR QRUP MÜŞAHİDƏÇİ

	26 may 2012


Onlayn ictimai-siyasi qəzet

Sevinc TELMANQIZI

BİR QRUP MÜŞAHİDƏÇİ

“Başınız işləmir, vallah. Siz nə vaxt ağıllanassınız?” Ayda 300 manat maaşla bir çətən külfəti dolandıran, hər halda bunu iddia edən qohumlardan biri idi zəng vuran mitinq günü. Hal-əhvaldan dərhal sonra verdi bu sualı. Mitinqdən yazdığımıza, mitinqə getdiyimizə, ümumiyyətlə, hələ də qəzetdə “süründüyümüzə” görə qazanmışdıq bu ünvanı onun gözündə. “Bir tikə çörəyimizi yeyib, balamızı saxlamaq” kimi “lüks”dən yararlanma məsləhətləri verirdi. Təkcə omu?

Azərbaycanda böyük bir kəsim var. Ayda demirəm, 6 ayda bir dəfə də olsun, qəzet arası açmasalar da, qəzetlərin elə hər zaman yalan yazması haqda danışırlar. Müxalifətin də iqtidara tay olduğunu, bütün jurnalistlərin reketçilik etdiyini, bu dünyanın elə belə gəlib, belə də gedəcəyini, “təzələr”in də gəlib, özünə gün ağlayacağını, cibini doldurana qədər kasıbın gününü qara edəcəyini... deyib, özlərinə təskinlik verməyə çalışırlar. Arada-bərədə də müdirləri, şöbə müdirləri, “uçastkovı” ilə nəsə araları dəyəndə “sizə onunla bağlı bir bomba material verəcəm, yazarsınız” anonsları verirlər. “Niyə bu işıqdan, metro haqqından yazmırsız ey” deyə şikayətlənirlər, sən hər gün bu barədə yazsan da. “Nə vaxt yıxassınız ey bu hökuməti” deyə redaksiyaya zəng vurub cavab tələb edərlər. Sanki sən burda adamyıxan işləyirsən. Mitinqi sosial şəbəkələrdən, xəbər portallarından izləyirlər. Qladiator döyüşü seyrçiləri kimi. Onlar nəyə görəsə bu missiyanı götürüblər üzərlərinə - seyrçidilər. Sadalamaqla qurtaran deyil, əminəm, sizin də gözünüzün qabağına bir personaj gəldi.
Daha bir demaqoqiya. Onsuz da hökumət nə müxalifətdən, nə də müstəqil qəzetlərdən qorxan deyil. Halbuki həmin o “olmayan” qorxunun miqyası mitinq günləri daha çox bəlli olur. Aksiyanın başlanmasına dəqiqələr qalmış gücləri çatan müstəqil qəzetlərin, informasiya portallarının saytına haker hücumu başlanır. Şəhərdə qəzet satışı əngəllənir. Aman, xəbər yayılmasın, kimsələr duymasın. “Qoxmadıqları” müxalifətin bir üzvünü zərərsizləşdirmək üçün 10 nəfər silahlı, dəbilqəli adam ayırırlar. Cansız-cəsədsiz gəncləri maşınlara mindirmək üçün olmazın işgəncələr tətbiq edirlər. Ürəkləri soyumur, maşına mindirəndən sonra da şüşəni sındırıb, dubinkayla bayırdan vururlar. Özü də elə qisas hissiylə ki, sanki bunların cüzi məvacibinin, gündəlik məişət qayğılarının baiskarı həmin o sıravi müxalifətçidir. Hər tərəfdə də əli kameralı boynuyoğunlar. Bir gündə şəhərə o qədər “kino çəkənlər” gəlir ki....
Bəs bu beynəlxalq təşkilatlara, demokratik təsisatlara nə deməli? Ölkəmizdə baş verən anormallıqlara daim təəssüflənən, heyrətlənən, hiddətlənən... qurumlar var ha, onları deyirəm. Bir neçə il əvvəlin məşhur zarafatıdır. Bir jurnalistə çalışdığı qəzetdə yaxını ilə bağlı başsağlığı yerləşdirməsini xahiş edən müxalifətçi səhəri gün başsağlığının qəzetdə çap olunduğunu görüb, zəng edir: “Qardaş, çox sağ ol. Başsağlığını qəzetdə oxuyub elə sevindik ki...” Bax, həmin beynəlxalq təşkilatlar da bu məntiqlə hərəkət edir. Biz ölkənin başsağlığını yayımlayırıq, onlar oxuyub elə sevinirlər ki...
Dünyada ərəb inqilabları başlananda geopolitiklər məşhur bir tezis səsləndirirdi. Deyirdilər ki, Qərb iqtisadiyyatdakı “yarat, istifadə et, sonra ötür” terminindən istifadə edir. Amma bir az fərqli formada. Onlar diktatorları yaradır, sonra dəstəkləyir, axırda da yox edir. Bizim ölkədə hələ ikinci mərhələdir. Yaradıblar və dəstəkləməkdə davam edirlər... 3-cü düyməni basan yoxdur.
Bir qrup isə müşahidə edir... Nolacaq bu işlərin axırı? Bəs əvvəlini bilirdin?

777 dəfə baxılıb