HƏR ÖLKƏYƏ BİR SİYAVUŞ... BƏS EDƏR

	26 may 2012


Onlayn ictimai-siyasi qəzet

Sevinc TELMANQIZI

HƏR ÖLKƏYƏ BİR SİYAVUŞ... BƏS EDƏR

Belə səhnələri tez-tez AzTV-də görmək olur. Ölkədə bir balaca çaxnaşma qopan kimi, daraşırlar küçələrin, dövlət idarələrinin, məktəblərin qapısına. Məlum olur ki, hamı mitinqlərdən narazıdır, hamının əslində olmayan, amma guya ki, varmış kimi qələmə verilən rahatlığı pozulub. Daha çox cocuqlara “stavka” edir şanlı hökumət. Bir də görürsən, hələ cümlə qurmağı zorla bacaran, Tutunun topu tutduğunu təzəcə qavrayan sümüyü bərkiməmiş körpəyə iğtişaşdan, ictimai sabitlikdən.... nitqlər əzbərlədiblər.

O da nümunəvi şagird kimi tez-tez udqunaraq, sözlərin birini də boş buraxmayaraq hüdüləyir. 2003-cü ilin 15-16 oktyabr hadisələrindən sonra məktəbliləri AzTV-yə çıxarıb stajlı YAP-çılar kimi necə danışdırdıqları yadınızdan çıxıb? “İğtişaşdan çox qorxduq, məktəbə gedə bilmədik, dərsdən geri qaldıq. Müxalifətə ar olsun...” Ay sizi dovşan yesin. Sizi yox ha, bu sözü sizə dedirdənləri...
İctimai Palatanın son mitinqlərindən sonra da eyni ssenari davam edir. Baş rolda yenə uşaqlardır. O gün dostlar sosial şəbəkədə paylaşmışdılar. Artıq balacaların danışması bəs eləmir bunlara. Valideynlərin dilindən xəbərdarlıq da yığırlar. Mətn də belədir: “Yazıb sizə bildirirəm ki, uşağımın küçə tədbirlərində iştirakına yol verməyəcəm”. İmzalı, ad-familiyalı mətndir. Sadəcə, cahillər başa düşməyiblər ki, belə sənədin adı əslində xəbərdarlıq olmalı deyil. Bu, uzaqbaşı izahatdır. Bəli, kimsə artıq öz haqqını müdafiə etməyəcəyi, hüquqlarının bərpasına görə səsini çıxarmayacağı üçün izahat verir. Vallah-billah deyib and içir ki, kar, kor, lal olacaq, uşağını da özünə bənzədəcək.
Məktəb deyəndə adamın yadına nə düşür? Çətin tapşırıqlar, öhdəliklər, rüb qiymətləri, tətillər, əzazil müəllimlər... Yaxşı, ən pisləri xatırlayaq: ilk danlanma, ilk xəyal qırıqlığı, ilk uğursuzluq, ilk .... Bir çox şeylərin ilkidir məktəb. Amma müasir dövrün məktəblərinə daha çox pisliklər qatılıb. Artıq uşaqlar məktəblərdə həyatlarındakı ilk sınmanı yaşayırlar. Onlara yalançılıq, riyakarlıq, ikiüzlülük öyrətməyə çalışır böyükləri. Valideynlər də Məşədi İbad kimi “mən yazıb sizə bildirirəm ki...” ilə başlayan izahatlar hazırlayırlar. Sanki başları üstündə əli silahlı sərvərlər varmış kimi...
Amerikada, Rusiyada, Türkiyədə valideynlər daha çox məktəb qapılarına dadanan manyaklardan, narkotik alverçilərindən qorxur. Bizlərsə şükür edirik ki, nə yaxşı bizdə belə şeylər yayılmaylb. Məktəblərin içindəki ideoloji zəhərin ondan heç də geri qalmadığını unudaraq. Okeanın o tayında uşaqların sağlamlığına qəsd edilirsə, bizdə də onların zehnini, formalaşmaqda olan mənəviyyatını zərbə altında qoymağa çalışırlar. Hələ mən siyasi ambisiyaları gözlərini örtəndə müxalifətçi balalarına necə hücum etmələrini, onlardan cani, qatil düzəltmək cəhdlərini demirəm. Təsəvvür edin, uşağı məktəbə göndərirsən və orda ondan üzəduran, yalançı, müti düzəldirlər. Onlara verdiyin uşağın əvəzinə 10 il sonra əcaib bir yaratıq qaytarırlar...
Məşhur bir aforizm var: “Dünya biz uzaqları görməyək deyə kürə formasındadır”. Hərdən elə ölkədəki belə rəzillikəri görəndə fikirləşirsən ki, kaş elə Azərbaycanın özü kürə formasında olaydı, pis adamları, iyrənc mənzərələri istəsək də, görməyəydik.
Məktəblər dövlətin ideoloji vasitələrindən biridir. Bunu anladıq. Orda öz liderlərinizdən qəhrəman düzəltməyinizi, kitablarınızın get-gedə YAP-ın ideoloji vərəqlərinə bənzədiyini də gördük. Amma bir zəhmət, balaca uşaqları özünüzə bənzətməyin. Bu ölkəyə bir Siyavuş Novruzov, bir Mübariz Qurbanlı, bir Zahid Oruc bəs edər...

813 dəfə baxılıb