BİZİM “TRUMAN ŞOU”...

	26 may 2012


Onlayn ictimai-siyasi qəzet

Sevinc TELMANQIZI

BİZİM “TRUMAN ŞOU”...

“Allah mənim ömrümdən kəsib....” Arzunu burda dayandırsa, nə yaxşı olardı. Gerisinə zatən ehtiyac yoxdur. Əgər insan yaltaqlığın sərhədlərini zorlayıb, bu cümləni qura bilirsə, elə ömür kəsilsə nə olacaq, kiməsə bağışlansa nə. Mən inanmıram, normal insanların normal yaşadığı ölkələrdə kimsə belə arzuya düşə. İki əlini açıb Allaha yalvara ki, mənim ömrümdən kəs, ölkənin başçısınınkına cala. Bu həddə çatdırmırlar insanları, yaltaqlığın bu növünü kəşf etməyə ehtiyac qalmır. Ağsaqqal kişilər, ağbirçək qadınlar oğulları yaşda adamın əlini sırf prezidentdi deyə öpmür normal torpaqlarda. Heç oğlu yaşındakılar da bunu rəva görmür özlərinə. Doğrudan axı, biz yaradıcı xalqıq deyirlər. Amma bəlli sahələrdə.

Bir adam eyni vaxtda həm cinayətkar, həm dələduz, həm də polisin yanındakı İctimai Şuranın üzvü olmur normal ölkələrdə. Adamın “atasını yandırıb”, sonra özünə dost eləmək siyasəti ancaq bizim şanlı hökumətə məxsusdur. Doğurdan axı, niyə bunları ancaq belə qəbildən adamlar müdafiə edir? Bar qadınları, oğrular, dələduzlar, üzəduranlar...Cavab axtarmağa gərək varmı?
Multplikasiya qəhrəmanlarını xatırladan Ata Abdullayev cəmiyyətə meydan oxumaqla məşğuldur bu günlərdə. Mitinqdə adam döyən, bilet oğurlayan bu gəncin bapbalaca boyu olsa da, dam dolusu toyu çıxdı üzə. Elə gün olmur ki, yeni xəbər yayılmasın onun haqda. Serial kimi... azzz sonra. Son olaraq “Azadlıq” qəzeti də yazdı ki, dələduzluğu və cinayətkarlığı ilə yanaşı, həm də ərəb ölkələrində agent, eyni zamanda polislərin sağ əli olub. Gör bir Allahın bəndəsi deyir ki, onu cəzalandırarıq? DİN rəsmiləri əksinə, ona haqq qazandırırlar, cəmiyyətə yardım edir deyirlər. Cinayətkarın yardımı ilə ayaqda qalan ölkə...
Bəs bu gün anası ilə mitinqə çıxdı deyə bütün həyatı boyu damğalı yaşamağa məhkum olunur balaca uşaq? Məlum olur ki, bunu deyən xalalar çox əxlaqlıymış, öz halal haqları ilə kreslolar zəbt edibmiş, hamısını vicdanları danışdırırmış. Qulbeçə jurnalistləri həşirlə uşaq psixoloqları tapıb çıxardılar üzə, onlar da mitinqdə psixologiyası pozulan uşağın halına dəsmal çıxaranda adamın lap ürəyi bulanır. Dağıl a dünya, sən demə, bu ölkədə də uşaq psixoloqu varmış. “Sabah pul gətirməyən uşaq gözümüzə görünməsin”, “indi uşaqları döymək olmur, hamısı xəstədilər, bir şillə vursan şikəst olacaqlar” deyilən məktəblərə də bəlkə bir zəhmət, o mübarək psixoloqlarınızdan göndərəsiz? Yaşam dərdindən əsəbi olmuş müəllimlərin qorxusundan sarısını udan uşaqlara bir xeyriniz dəyər bəlkə.... Son mitinqdə yas yerinə getdiklərini deyən ağsaqqalları maşına basan, balaca qızcığazı bar-bar bağırdan, strekalinlərdən, sevgiladələrdən, atalardan mədət uman bir hökumətdə yaşayırıq. O psixoloqlardan bizə də lazımdır.
O gün bu uşaqla bağlı mövzu müzakirə olunanda deputat Gülər Əhmədovanın canfəşanlığı gözlərimi yaşartdı. “Uşaqlar gələcəyimizdir”dən tutmuş, onların dürlü-dürlü hüquqlarına qədər. O danışanda dəhşətə gəlirdim. Ay aman, doğrudanmı bizim uşaqlar bu qədər hüquqa sahibdir? Hələ sonda misal gətirdi ki, bəs normal ölkələrdəki telekanallarda saat 9 olan kimi məşhurların çəkildiyi roliklərdə “uşaqlar, yatmağa gedin” mesajı da verilirmiş. Amma unutdu ki, bizim telekanallarda uşaqların oyaq olduğu saatda, xəbərlər proqramında porno görüntülər verirlər. Bəlkə uşağa sayğıya, uşaq hüquqlarına elə buradan başlayaq?
“Truman şou” filmini izləmisiz yəqin. İllər boyu davam edən bir realiti şounun pərdə arxasından bəhs edir. Trumana yalançı bir şəhər, yalançı qohumlar, qonşular, sevgili... verirlər, o da illər boyu bu yalanla yaşayır. Bunun bir realiti şou olduğunu bilmədən. Öyrənəndə isə...
Biri bizə də yaşadıqlarımızın bir realiti şou olduğunu desin!

636 dəfə baxılıb