BU DA BELƏ KRALLIQ | Yeni Müsavat

	26 may 2012


Onlayn ictimai-siyasi qəzet

Sevinc TELMANQIZI

BU DA BELƏ KRALLIQ

Varlının pulu kasıbın çənəsini yorar deyiblər. Srağagün bütün dünya kasıbları bir olub, Londonda Böyük Britaniya şahzadəsi Uilyamla sevgilisi Ketrin Middltonun təntənəli nikah mərasimindən danışdı. Hələ London kasıbları baş verənləri izləsinlər deyə ərinməyib, kral sarayının yanında çadır belə qurdular. Sonra da başlandı rəvayətlər... Ay gəlinin paltarının uzunluğu 50 metrmiş, ay toya gələn məşhurların geyimləri bir sərvətə bərabərmiş, toy xərcləri neçə milyonu ötürmüş...

Mış-muş, yəni, felin rəvayət forması. Bu rəvayətlə heç Bakıdakı JEK müdirini də təəccübləndirmək olmaz. Neyçün ki, əgər o da madar oğluna büsat qurmaq istəsə, bundan qat-qat artığını edər. Kral toyuna baxıb, ağzının suyunu axıdanlara isə bircə gün bizim yerli şadlıq saraylarında olmağı tövsiyyə edirəm. Nə böyük iş olub? Elton Conla əri, bir də Şakira toya qonaq qismində gəlibmiş. Bizim oliqarxlar onlara təyyarə tutub, toylarında manıs kimi oxudurlar. Gəlinin paltarı neçə min dollar imiş. Bizdə orta statistik azərbaycanlı qızı gəlin gedəndə kirayəsi min dollardan aşağı olan paltar geymir. Hələ mən toylardakı kral süfrələrindən, bəylə-gəlini salona gətirən ərəb qiyafəli qullardan... danışmıram. Türkiyədə bu günlərdə kral hoteli açan da... azərbaycanlı Mübariz Mənsimovdur. İndi siz deyin: kimdir gerçək kral?
Necə deyərlər, analoqu olmayan krallıqdır bizimki. İcra başçısının sürücüsü belə krallıq edir bu ölkədə. Heç kim heç kimin kitabın oxumadığı kimi, heç kim də başqasının krallığına tabe deyil. Məsələn, o gün Misir Mərdanov qərar verdi ki, təhsil haqları 5-ci dəfə artırılsın. Üstəlik bunu belə izah etdi ki, dövlət sifarişli ixtisaslar üzrə təhsil haqları ödənişli əsaslarla olan ixtisaslar üzrə təhsil haqqından az olmamalıdır. Halbuki, dünyanın 100 reytinqli universitetlərinin hamısında dövlət sifarişli ixtisaslarda təhsil pulsuzdur. Təkcə bir müqayisə. Almaniyanın Berlin Texniki Universitetində bütün ixtisaslar üzrə bir semestr üçün təhsil haqqı cəmi 250 avrodur (illik 500 avro). Bizdə isə illik təhsil haqqı 2500 manatdan başlayır. Hansı parametrə, hansı prinsipə görə? Adımız dünyanın nəinki yüz, heç min ən yaxşı universitetləri sırasında da görünmür. Hər şey cəhənnəm, qanunlara inansaq, dövlətin pullu təhsil xidmətləri üzrə ödəniş haqlarını Tarif Şurası müəyyənləşdirməlidir axı. Amma 2004-cü ildən 2010-cu ilədək ödənişlər 5 dəfə qalmasına baxmayaraq, şuranın qəbul etdiyi qərarlar arasında təhsil haqlarının müəyyən olunması ilə bağlı hər hansı sənəd yoxdur. Qiymətlərin qalxdığını təhsil naziri bəyan edir, qiymətlər də qalxır. Təxminən, saç ustamın ““kraska”nın qiyməti qalxdı deyə, mən də saçı daha baha kəsəcəm” absurd izahatı kimi. Bazarda kartofun qiyməti qalxanda valideynlər dərhal narahat olmağa başlamalıdır, çünki Yaşıl bazarın yaxınlığında yerləşən Təhsil Nazirliyi bundan xəbər tutub, təhsil haqlarını da artıra bilər. Təxminən belə.
Qara günümüzü indidən qablamağımız üçün daha bir səbəb. Gül bayramı yaxınlaşır. Milli Bankla üzbəüz parkda artıq çadırlar da qurulub. Hacıbalanın “çılğın proje”si olan bu bayrama bu il yenə astronomik məbləğlər xərclənəcək. Hollandiyadan bircə ədəd lalənin gətirilməsi üçün 10 kasıbın maaşı qədər pul ödəyəcəklər, bizsə yazıb-yazıb, yanıb-yaxılacağıq. Türkiyədə baş nazir Ərdoğanın İstanbulla bağlı “çılğın proje”si var ha, bax Hacıbala o projenin hər gün birini gerçəkləşdirir. Ürəyi istəyəndə mərkəzi yolları bağlayır, təzə yol çəkir, sonra körpü quraşdırır, üstündən bir maşın da keçmir, hər yerə oxuyan şəlalələr qurur, amma camaat evində susuzluqdan qırılır... Çılğınlıqda heç kim bizimlə yarışa girə bilməz....
Oxuyan şəlalə dedim, yadıma oxuyan manıslar düşdü. Hərçənd ki, bizdə manıslar oxumaqdan başqa nə işlə desən, məşğuldular. O gün bir paçkası yenə YAP-a keçib, birini də “Azadlıq” radiosu danışdırıb. Nazim Məmmədov adlı qaqaş deyib ki, bəs ölkədə sabitlik var, çünki biz gecə 3-5-də gedib restoranda otura bilirik. Əslində həmin saatda bir çox “məslək” yiyələri şəhərdə asanlıqla gəzə bilir. Və bu sabitlik göstərici sayılırmış. Belə baxanda isə yaxşı mənzərədir. Bir tərəfdən “manıslar efirdən qovulsun” deyib, o biri tərəfdən onlara qucaq açan siyasəti ancaq bu cür gözəl ifşa etmək olardı...
Kral ölkəsi oldun belədi də. Kəsdiyin başa sorğu-sual yoxdur...

833 dəfə baxılıb