Ölkəmizdə qısamüddətli işgüzar səfərdə olan Türkiyə Böyük Millət Məclisinin üzvü, MHP yetkilisi Atilla Kaya dünən “Yeni Müsavat”ın redaksiyasına təşrif buyurdu. Azərbaycanın, eləcə də qəzetimizin köhnə və sadiq dostu olan Atilla Kayanı baş redaktor Rauf Arifoğlu qarşıladı. Onunla söhbətləşib səfər təəssüratlarını öyrəndik, Türkiyə gündəmi ilə bağlı bir sıra məsələlər ətrafında söhbət etdik.
Seçkilərə çox az bir vaxt qalmış iqtidar unikal bir metoda əl atacaq. Artıq Mərkəzi Seçki Komissiyası 63 saylı Sabirabad seçki dairəsini dağıtmağa hazırlaşır. MSK-dan dairəyə bildirilib ki, yaaxın günlərdə 63 saylı dairənin əsas kəndlərindən olan Cavad, Əlicanlı, Həsənli və Zəngənə kəndlərindəki seçki məntəqələri ləğv edilərək 65 saylı Sabirabad-Saatlı-Kürdəmir dairəsinə birləşdiriləcək.
“Hakimiyyətə qarşı yaradılan hər hansı birliyin tərəfdarıyam, belə birlik yaranacaq halda onun yanındayam. Amma mənim adımdan yalan danışırlar, mənə böhtan atırlar. Heç yerdə hakimiyyətə qarşı olan birliyin əleyhinə çıxmamışam. Azərbaycanda son 20 ildə baş verən proseslərdən çıxış edərək AXCP-Müsavat birliyinin sonunun necə ola biləcəyini söyləmişəm”. Bunu APA-ya açıqlamasında Azərbaycan Xalq Cəbhəsi Partiyasının (AXCP) Rəyasət Heyətinin üzvü Xaliq Bahadır deyib.
“Mən hesab edirəm ki, müxalifətin birliyi Demokratiya Uğrunda İttifaq Müsavat-AXCP birliyində təmsil olunmadan mümkün deyil. Əks halda, AXCP-Müsavat birliyi də olmayacaq".
Həbsdə olan blogger Adnan Hacızadənin vəkili İsaxan Aşurov müvəkkilinin məhkəmədən sonra yenidən həbsxanaya göndərilməsini qanunsuz sayır. Bu barədə “Azadlıq” radiosuna məlumat yayıb.
Ədliyyə Nazirliyi İşgəncələrə Qarşı Azərbaycan Komitəsinin sədri Elçin Behbudova monitorinqlər aparmaqda problemlər yaradır. Bu barədə komitənin yaydığı məlumatda bildirilir ki, Avropa Şurasının müvafiq qurumu bu məsələ ilə bağlı narahatlığını ifadə edib.
Gürcüstan Prezident Aparatı bəyanat verərək, prezident Saakaşvilinin iyulun 27-də etdiyi çıxışda “neqr” sözündən istifadə etməsində heç bir “irqi”qəbahətin olmadığını bildirib. BBC-nin məlumatına görə, Maliyyə Nazirliyinin yüksək vəzifəli rəsmiləri ilə görüş zamanı prezident gömrük işçilərinin ünvanına tənqidi sözlər deyib. Belə ki, Saakaşvili ispan turistlərinin Türkiyə-Gürcüstan sərhədində incidilməsindən narazılıq bildirib.
İranın Xarici İşlər Nazirliyi Qərb dövlətlərini ikili standartlardan geri çəkilməyə səsləyib. İran tərəfin fikrincə, Qərbin təcrid siyasəti onsuz da gərgin olan vəziyyəti daha da qəlizləşdirəcək.
Bakıda adam oğurluğu ilə məşğul olan mütəşəkkil dəstə zərərsizləşdirilib. Bu barədə APA-ya Binəqədi rayon Polis İdarəsindən bildirilib.
Ötən gecə Abşeron rayonunun Digah qəsəbəsində dəhşətli cinayət hadisəsi baş verib. Qəsəbə sakinlərinin anspress-ə verdiyi məlumata görə, qəsəbə sakini Dadaşov Teyyub Rəfael oğlu, onun həyat yoldaşı, qızı öldürülüb, oğluna isə ağır bədən xəsarətləri yetirilib. İlkin məlumata görə, hadisə gecə saat 2-3 radələrində baş verib.
“bp-nin Azərbaycanda nəinki paylarını satmaq fikri yoxdur, hətta Azərbaycandakı işlərini genişləndirmək niyyətindədir. Bu yöndə də çox ciddi addımlar atılır”. bp-nin ictimaiyyətlə əlaqələr şöbəsinin rəhbəri Tamam Bayatlı “Azadlıq” radiosuna açıqlamasında belə deyib.
Azərbaycan banklarının təhlükəli durumda olması ilə bağlı yazmışıq. Qeyd edək ki, dünya maliyyə böhranından sonra ən böyük çətinliklərlə üzləşən ölkənin bank sektorudur. Qəzetimizin dünənki sayında problemlər bağlı danışan iqtisadçı-ekspert Qubad İbadoğlu bildirib ki, bankların ən başlıca problemi onların öz vəsaitlərini idarə etmək üçün şəraitin olmamasıdır. Belə ki, ölkə iqtisadiyyatının tikinti və əmlak bazarı kimi önəmli sahəsində ciddi problemlər yaşanır və bu səbəbdən də banklar əllərində olan pulları idarə edib qazanc götürməkdə çətinlik çəkirlər. Bir yandan da problemli kreditlərin həcmi artmaqdadır. Belə ki, böhranın təsiri və banklarda kredit risklərinin idarə edilməsinin lazımi səviyyədə olmaması problemli kreditlərin həcmini artırıb.
Dünən baş prokuror Zakir Qaralov Mətbuat Şurasının sədri Əflatun Amaşov və onun müavini Umud Rəhimoğlunu qəbul edib. Milli.az-ın məlumatına görə, Zakir Qaralov Azərbaycan milli mətbuatının 135-ci ildönümü ərəfəsində prezident İlham Əliyev tərəfindən imzalanmış sərəncamlarla Azərbaycan milli mətbuatının inkişafındakı xidmətlərinə görə mətbuat işçilərinin böyük bir qrupunun ali dövlət mükafatları ilə təltif olunmalarını, bir sıra kütləvi informasiya vasitələrinə maddi yardım ayrılmasını müstəqil mətbuatın, fikir və söz azadlığının inkişafına dövlət səviyyəsində göstərilən gündəlik diqqət və qayğının təzahürü kimi qiymətləndirib.
“Yeni Azərbaycan” qəzetinin dünənki sayında Azərbaycan mediasının durumu ilə bağlı “təhlil” yazısı yer alıb. “ABŞ-da jurnalistlər, hətta, toy mərasimini çəkdiklərinə görə həbs olunurlar” başlıqlı məqalədə Azərbaycanın dünyaya söz və fikir azadlığının təminatı, mətbuata dövlət qayğısı ilə bağlı yeni model təklif etməsi barədə fikirlər yer alıb.
Ağdamin “Qarabağ” klubu bütün Azərbaycanı, xaricdə yaşayan soydaşlarımızı sevindirməkdə davam edir. İyulun 29-da Avropa Liqasının üçüncü təsnifat mərhələsində Polşanın Krakov şəhərində yerli “Visla” komandası ilə qarşılaşan komandamız rəqiblə başabaş mübarizə apararaq minimal hesablı qələbə qazanıb – 1:0.
Avropa Liqasında mübarizəni dayandıran “Bakı” klubunun rəhbərliyi istefa verib. Bu haqda apasport.az saytına məlumat verən paytaxt təmsilçisinin baş meneceri Zeynal Məmmədov bildirib ki, özü də daxil olmaqla, digər rəhbər şəxslərin hamısı istefa ərizəsini yazıblar.
Avropada ən mötəbər musiqi sənəti festivallarından biri olan Münhen festivalında bu il 36 dövlətin musiqiçiləri iştirak edir. Festivala Avropanın müxtəlif ölkələrindən, Latın Amerikasından, ABŞ, Yaponiya və b. dövlətlərdən olan yüksək səviyyəli vokalçılar, dirijor və rejissorlar qatılır və festival çərçivəsində bütün tamaşalar, konsertlər anşlaqla keçir. Bütün bunlar isə Almaniyanın və Avropanın telekanallarında geniş işıqlandırırlar.
Qəbələ şəhərində II Beynəlxalq Musiqi Festivalına start verilib. APA-nın məlumatına görə, Heydər Əliyev Fondunun dəstəyi ilə keçirilən musiqi bayramına Azərbaycan bəstəkarlarının əsərləri ilə başlanılıb.
