ABŞ prezidenti Donald Tramp yeni miqrasiya məhdudiyyətlərinin hazırlanmasına başlandığını açıqlayıb və administrasiyanın yaxın günlərdə ölkə vətəndaşlarına ABŞ-a girişin qadağan olunacağı dövlətlərin siyahısını genişləndirəcəyinə işarə edib.
Musavat.com xəbər verir ki, bu barədə "Bloomberg" məlumat yayıb.
Məlumata görə, qərar Vaşinqtonda baş vermiş son insidentdən sonra təhlükəsizlik tələblərinin sərtləşdirilməsi və viza prosedurlarının yenidən qiymətləndirilməsi fonunda müzakirə olunur.
Təhlükəsizlik orqanlarının məlumatına əsasən, yenilənmiş siyahı yaxın vaxtlarda açıqlanacaq. Hazırda 12 ölkənin vətəndaşları üçün ABŞ-a tam giriş qadağası, daha 7 ölkə üçün isə qismən məhdudiyyətlər qüvvədədir.
Eyni zamanda, ABŞ Vətəndaşlıq və Miqrasiya Xidməti (USCIS) məhdudiyyət tətbiq olunan 19 ölkədən gələn bütün müraciətlərin, o cümlədən “green card” ərizələrinin qəbulunun dayandırıldığını açıqlayıb.
USCIS-in siyasi memorandumunda qeyd edilir ki, ABŞ Bayden administrasiyası dövründə həmin ölkələrdən gələnlərə verilmiş icazələrin geniş auditini aparacaq.
Prosesin sürətləndirilməsinə Vaşinqtonda baş vermiş və nəticədə bir hərbçinin həlak olduğu, digərinin ağır vəziyyətdə qaldığı hücum səbəb olub.
Hadisənin şübhəlisi kimi 2021-ci ildə Əfqanıstandan gəlmiş 29 yaşlı Rəhmanulla Lakanvalanın adı açıqlanıb.
Tramp və tərəfdarları baş verənlərin məsuliyyətini əvvəlki administrasiyanın üzərinə qoyaraq yeni məhdudiyyətlərin vacibliyini bildiriblər.
Prezident vurğulayıb ki, o, giriş qadağasının genişləndirilməsi, bəzi təbii yolla vətəndaşlıq alan miqrantların vətəndaşlıqdan məhrum edilməsi və qeyri-vətəndaşlara federal imtiyazların ləğvi kimi addımları nəzərdən keçirir.
Müzakirə olunan addımlar arasında onun birinci prezidentlik dövründə tətbiq edilmiş və Ali Məhkəmə tərəfindən təsdiqlənmiş ən mübahisəli miqrasiya siyasətlərindən birinin yenidən genişləndirilməsi də var.
ABŞ-ın daxili təhlükəsizlik naziri Kristi Noem Trampa sərtləşdirilmiş tədbirlərin genişləndirilməsi barədə məsləhət verdiyini bildirib.
Hazırda tam səyahət qadağası Əfqanıstan, Çad, Konqo, Ekvatorial Qvineya, Eritreya, Haiti, İran, Liviya, Myanma, Somali, Sudan və Yəmənə, qismən qadağa isə Burundi, Kuba, Laos, Syerra-Leone, Toqo, Türkmənistan və Venesuelaya şamil edilir.
İqbal RZAYEV,
Musavat.com
