Hindistanlı milyarder Mukeş Ambaninin qızı İşa Ambani Parisdə keçirilən moda həftəsində görüntülənib. Dünyanın diqqətini isə onun geyimi deyil, əlində daşıdığı nadir kolleksiya çantası cəlb edib. Moda ekspertlərinin qiymətləndirməsinə görə, çantanın dəyəri 400 min ABŞ dollarından çoxdur.
Musavat.com xəbər verir ki, İşa Ambani tədbirdə məşhur fransız moda evi Hermès tərəfindən istehsal edilən nadir Kelly Midas model çanta ilə iştirak edib. Məhdud sayda hazırlanan bu model qızıl detalları və əl işçiliyi ilə seçilir. Moda mütəxəssisləri bildirirlər ki, belə çantalar kolleksiyaçılar arasında ən çox axtarılan aksesuarlardan hesab olunur.
İşa Ambaninin görüntüləri yayıldıqdan sonra sosial şəbəkələrdə ən çox müzakirə olunan mövzulardan biri məhz çantanın qiyməti olub. İstifadəçilər onun dəyərinin bir çox lüks avtomobildən və bəzi ölkələrdəki mənzillərdən baha olduğunu qeyd ediblər.
İşa Ambani Hindistanın ən böyük özəl şirkətlərindən biri olan Reliance Industries-in rəhbəri Mukeş Ambaninin qızıdır. Ambani uzun illərdir Asiyanın ən varlı iş adamlarından biri hesab olunur və ailə dünyanın ən zəngin ailələri sırasında yer alır. İşa Ambani hazırda ailənin biznes layihələrində, xüsusilə pərakəndə satış və rəqəmsal xidmətlər sahəsində rəhbər vəzifələrdə çalışır.
Moda analitiklərinin fikrincə, İşa Ambaninin seçdiyi aksesuar bir daha göstərir ki, eksklüziv və məhdud sayda istehsal olunan lüks çantalar artıq təkcə moda elementi deyil, həm də yüksək dəyərli kolleksiya və investisiya vasitəsi kimi qiymətləndirilir.
Musavat.com
