Rusiya Prezidentinin mətbuat katibi Dmitri Peskov Moskvada keçirdiyi brifinqdə Rusiya və Belarus liderlərinin növbəti görüşü, cəbhədəki cari vəziyyət və Kiyevlə mövcud olan gizli əlaqə kanalları barədə mühüm bəyanatlarla çıxış edib.
Musavat.com xəbər verir ki, Kremlin rəsmi nümayəndəsi ilk növbədə Rusiya Prezidenti Vladimir Putinlə Belarus lideri Aleksandr Lukaşenko arasında "Valday" forumu çərçivəsində baş tutan danışıqlara toxunub. Peskov bildirib ki, iki liderin ünsiyyəti tamamilə qeyri-formal xarakter daşıyıb və Rusiya rəhbərinin şəxsi iqamətgahında baş tutub. Görüş zamanı tərəflər ilk növbədə ikitərəfli əlaqələri, ticarət-iqtisadi əməkdaşlığı çox predmetli şəkildə müzakirə ediblər. Bununla yanaşı, regional təhlükəsizlik və Belarusa qarşı törədilən hərbi-siyasi təxribat cəhdləri də daxil olmaqla, bir sıra strateji məsələlər ətrafında fikir mübadiləsi aparılıb.
Jurnalistlərin Belarus liderinin vasitəçilik missiyası ilə bağlı suallarını cavablandıran Peskov vurğulayıb ki, Lukaşenko Putinlə söhbəti zamanı Ukrayna Prezidenti Vladimir Zelenskidən heç bir rəsmi və ya qeyri-rəsmi mesaj, məktub çatdırmayıb. Kremlin sözçüsü Lukaşenkonun Moskva ilə Kiyev arasında gizli rabitə kanallarından biri olub-olmaması barədə suala birbaşa cavab verməkdən yayınsa da, mühüm bir detalı diqqətə çatdırıb: "Moskva ilə Kiyev arasında mövcud olan əlaqə kanallarının effektiv işləməsi üçün bu kanallar mütləq şəkildə kölgədə, yəni ictimaiyyətdən gizli qalmalıdır".
Ukrayna böhranının nizamlanması barədə danışan Peskov əlavə edib ki, Rusiyanın Ukrayna üzrə rəsmi mövqeyi hər kəsə yaxşı məlumdur və bu mövqe 2024-cü ildə Putinin XİN-dəki çıxışı zamanı konkret bəndlərlə ifadə olunub: "Həmin bəyanat həm Kiyev rejiminə, həm də amerikalı danışıqlar aparan tərəfə çox yaxşı bəllidir. Hazırda cəbhədəki hərbi dinamika kifayət qədər anlaşıqlıdır və Rusiyanın qarşıya qoyduğu bütün hədəflərə tam şəkildə nail olacağına dair daxili əminliyimizi daha da artırır".
Brifinqin sonunda Peskov daxili kadr və humanitar məsələlərə də toxunaraq bildirib ki, Vladimir Putin bu gün İnsan Hüquqları üzrə Müvəkkil (Ombudsman) vəzifəsinə başlayan Lantratovanı ilk dəfə qəbul edəcək. Mətbuat katibinin sözlərinə görə, Lantratova yeni vəzifəsində qısa müddətdə böyük işlər görməyə nail olub və xüsusilə Ukrayna ilə hərbi əsirlərin qarşılıqlı mübadiləsinin təşkilində mühüm rol oynayıb.
Musavat.com
