Musavat.com xəbər verir ki, Domodedovo şəhər məhkəməsi rusiyalı aktrisa Aqlaya Tarasovanı narkotik vasitələrin qaçaqmalçılığı maddəsi üzrə təqsirli bilib.
Məhkəmə qərarına əsasən, ona 3 il şərti azadlıqdan məhrumetmə və 200 min rubl cərimə təyin edilib.
Prokurorluq Tarasova üçün 3 il yarım şərti cəza tələb edirdi.
Tarasovanın ifadəsi
Aktrisa özünü təqsirli bildiyini desə də, ifadəsini dəyişdirib. O bildirib ki, həşiş yağı olan veyp ona 2022-ci ildə israilli bir iş adamı tərəfindən hədiyyə olunub və o, veypin tərkibində İsraildə qanuni sayılan az miqdarda kannabis olduğunu güman edib.
Tarasova üçün bir sıra tanınmış sənət adamları zamin durub və məhkəmədə onu dəstəkləyib.
Onlar arasında Sergey Bezrukov, Evgeni Mironov da var. Həmçinin məhkəmə iclasında onu Leonid Yarmolnik, Evgeni Tsıganov və Yuliya Snigir dəstəkləyiblər.
Həbsin detalları
Aktrisa 28 avqustda Tel-Əvivdən Moskvaya uçduqdan sonra saxlanılıb. Onun üzərindəki veypdə 0,38 qram həşiş yağı aşkar edilib.
Hadisə barədə ilk məlumat 5 sentyabrda yayılıb. Tarasova 3–7 il azadlıqdan məhrumetmə və 1 milyon rubla qədər cərimə ilə üzləşə bilərdi.
Oxşar hadisə
2022-ci ildə amerikalı basketbolçu Brittni Qrayner də Moskva aeroportunda baqajında həşiş yağı tapıldıqdan sonra saxlanılmış və 9 il həbs cəzasına məhkum edilmişdi. Daha sonra o, silah taciri Viktor Butla mübadilə edilmişdi.
Musavat.com
