Avropa İttifaqı Rusiya qazından tam imtina etmək barədə tarixi qərar qəbul edib.
Musavat.com xəbər verir ki, Aİ-yə üzv olan bütün 27 ölkə yanvarın 26-da Rusiyadan boru kəməri və mayeləşdirilmiş təbii qazın (LNG) idxalının mərhələli şəkildə dayandırılmasını nəzərdə tutan yeni reqlamenti rəsmi olaraq təsdiqləyib.
Sənədə əsasən, Avropa 2027-ci ilin sentyabr ayına qədər Rusiya boru kəməri qazının idxalını tamamilə dayandıracaq. Bu qərar Aİ-nin enerji təhlükəsizliyini gücləndirmək, Rusiyadan asılılığı minimuma endirmək və alternativ enerji mənbələrinə keçidi sürətləndirmək məqsədi daşıyır.
Reqlament hələ Avropa İttifaqının rəsmi jurnalında dərc edilməlidir. Sənəd dərc olunduqdan bir gün sonra qüvvəyə minəcək, qaz idxalına qadağa isə dərcdən altı həftə sonra tətbiq ediləcək.
Ekspertlərin fikrincə, bu qərar Avropanın enerji bazarında ciddi dəyişikliklərə, qiymət dalğalanmalarına və yeni tədarük marşrutlarının formalaşmasına səbəb olacaq. Eyni zamanda, bu addım Rusiya iqtisadiyyatı üçün də ağır zərbə kimi qiymətləndirilir.
Qeyd olunur ki, Aİ artıq uzun müddətdir ABŞ, Norveç, Qətər və digər ölkələrlə alternativ qaz tədarükü istiqamətində fəal danışıqlar aparır və bu qərar həmin strategiyanın məntiqi davamıdır.
Musavat.com
