Avropa ölkələri Ukrayna üçün təhlükəsizlik zəmanətlərini nəzərdə tutan altı maddəlik plan təqdim edib.
Musavat.com xəbər verir ki, “RBK-Ukrayna”nın məlumatına görə, plan Ukraynanın təhlükəsizliyinin uzunmüddətli təmininə və müharibədən sonrakı dövrdə sabitliyin qorunmasına yönəlib.
Plana əsasən:
1 Ukraynaya daimi hərbi dəstək göstərilməsi nəzərdə tutulur. Sülh dövründə Ukrayna Silahlı Qüvvələrinin sayı mümkün təhdidlərin qarşısını almaq və ərazini qorumaq məqsədilə 800 min nəfər səviyyəsində saxlanılacaq.
2 Avropanın rəhbərliyi altında çoxmillətli qüvvələr formalaşdırılacaq. ABŞ-ın dəstəyi ilə yaradılan “istəklilər koalisiyası” çərçivəsində bu qüvvələr Ukrayna ordusunun bərpası, hava məkanının və dəniz təhlükəsizliyinin qorunması ilə məşğul olacaq. Zərurət yaranarsa, onların Ukrayna ərazisində fəaliyyəti də mümkündür.
3 Atəşkəsə nəzarət mexanizmi yaradılacaq. ABŞ-ın rəhbərliyi ilə beynəlxalq monitorinq sistemi erkən xəbərdarlıq, pozuntuların qeydə alınması və onlara operativ reaksiya məqsədi daşıyacaq.
4 Hüquqi baxımdan məcburi təhlükəsizlik zəmanətləri veriləcək. Hücum halında tərəfdaş ölkələr hərbi, kəşfiyyat, iqtisadi və diplomatik tədbirlərlə reaksiya vermək öhdəliyi götürəcək.
5 Bərpa və yenidənqurma üçün maliyyələşmə təmin ediləcək, ticarət sazişləri bağlanacaq və Rusiyanın vurduğu zərərin kompensasiyası tələb olunacaq. Rusiya aktivləri Avropa İttifaqında dondurulmuş vəziyyətdə saxlanılacaq.
6 Ukraynanın Avropa İttifaqına üzvlüyünə dəstək davam etdiriləcək.
Məlumata görə, plan Avropa və ABŞ arasında razılaşdırılmış yanaşma kimi təqdim olunur və Ukrayna üçün uzunmüddətli təhlükəsizlik modelinin əsasını formalaşdırmağı hədəfləyir.
Musavat.com
