Alimlər Antarktikanı əhatə edən buzlu sularda yaşayan xüsusi bir bakteriya növünün gələcəkdə xərçəng müalicəsində istifadə oluna biləcəyini açıqlayıblar.
Tədqiqatçılar dünyanın ən ucqar bölgələrindən birinə həyata keçirilən 6 həftəlik elmi ekspedisiya zamanı melanom hüceyrələrinə qarşı təsir göstərən bakteriyanı aşkar ediblər.
Araşdırmaya görə, bu bakteriya Antarktika sularında yaşayan askidiyalar, yəni "dəniz üzümləri" adlanan dəniz canlılarının üzərində inkişaf edir. Alimlər müəyyən ediblər ki, bakteriyanın istehsal etdiyi bəzi birləşmələr sağlam insan hüceyrələrinə zərər vermədən melanom xərçəngi hüceyrələrini məhv edə bilir.
Cənubi Florida Universitetinin kimya professoru Bill Baker bildirib ki, bu xüsusiyyət dərman hazırlanması baxımından böyük əhəmiyyət daşıyır. Onun sözlərinə görə, xəstəliklə mübarizə aparan müalicələrin əsas məqsədi xərçəng hüceyrələrini hədəf alarkən sağlam toxumalara zərər verməməkdir.
Alimlərin xüsusi diqqət yetirdiyi maddələrdən biri "palmerolide A" adlı birləşmədir. Bu maddənin Candidatus Synoicihabitans palmerolidicus bakteriyası tərəfindən istehsal edildiyi və melanom hüceyrələrinə qarşı təsirli olduğu müəyyən olunub.
Tədqiqatçılar bu bakteriyanı daşıyan dəniz üzümlərinin əsasən 18-24 metr dərinlikdə, güclü su axınlarının olduğu maili və ya şaquli dəniz diblərində yaşadığını müəyyən ediblər.
Mütəxəssislər hesab edirlər ki, bu kəşf gələcəkdə xüsusilə dəri xərçənginin təhlükəli növlərindən biri olan melanomaya qarşı daha effektiv müalicə üsullarının hazırlanmasına kömək edə bilər.//Demokrat.az
