ABŞ-nin Merilend ştatında qəribə hadisə baş verib. Çarlz dairəsi şerif ofisinin məlumatına görə, 37 yaşlı Derrik Braun həbsxanadan buraxıldıqdan bir neçə saat sonra yenidən barmaqlıqlar arxasına qayıdıb.
Polis patrul xidməti axşam saatlarında "Dodge Journey" markalı oğurlanmış avtomobili aşkar edib. Maşını idarə edən şəxsin həmin gün narkotik maddələrlə bağlı məhkəməyə gəlmədiyi üçün saxlanılan, lakin qısa müddət əvvəl sərbəst buraxılan Derrik Braun olduğu məlum olub.
İstintaqın versiyasına görə, kişi azadlığa çıxan kimi dayanacaqdakı avtomobillərdən birini qaçırıb və polis tərəfindən saxlanılana qədər şəhərdə gəzib. Maraqlıdır ki, maşındakı digər iki sərnişin nəqliyyat vasitəsinin oğurlandığından xəbərsiz olub. Bu səbəbdən onlar sərbəst buraxılıb, Brauna qarşı isə avtomobil qaçırma maddəsi ilə rəsmi ittiham irəli sürülüb.//Demokrat.az
