Fransa və Almaniya Avropa sənayesinin qorunması və böhran yaşayan avtomobil sektorunun dəstəklənməsi üçün genişmiqyaslı razılaşma üzərində işləyirlər. Razılaşma baş tutarsa, Avropa İttifaqının həm “Made in Europe” siyasətində, həm də 2035-ci ildən benzin və dizel mühərrikli yeni avtomobillərin satışının dayandırılması planında ciddi dəyişikliklər baş verə bilər.
Musavat.com xəbər verir ki, bu barədə "Politiko" nəşri xüsusi xəbər yayıb.
Ötən həftə Almaniyada keçirilən birgə nazirlər görüşündən sonra Avropa İttifaqının iki ən böyük iqtisadiyyatının rəhbərləri hökumətlərinə kompromis variant hazırlamaq tapşırığı veriblər.
Sövdələşmənin mahiyyəti sadədir: Almaniya Fransanın Avropa istehsalçılarını xarici rəqabətdən daha güclü qorumaq istəyini dəstəkləyəcək, Paris isə bunun müqabilində Berlinin avtomobil sənayesi ilə bağlı əsas tələbini qəbul edəcək.
Fransa Aİ-nin hazırladığı Sənayenin Sürətləndirilməsi Aktında “Made in Europe” prinsipinin daha sərt tətbiq edilməsini istəyir. Paris dövlət satınalmaları və subsidiyalarda ilk növbədə Avropada istehsal olunan məhsullara üstünlük verilməsinin tərəfdarıdır.
Mübahisəli məsələlərdən biri Aİ üzvü olmayan hansı ölkələrin “etibarlı tərəfdaş” hesab edilərək bu üstünlüklərdən yararlana bilməsidir. Almaniya Böyük Britaniya və Kanada kimi müttəfiqlərin də sistemə daxil edilməsini istəyirdi. Fransa isə ilkin mərhələdə güzəştlərin yalnız Aİ-nin 27 üzvünə şamil edilməsini, digər ölkələrə isə ayrıca baxılmasını müdafiə edir.
Fransanın sənaye naziri Sebastyen Marten mövqeyini belə ifadə edib: “Made in Europe yalnız Avropada istehsal olunursa, məna daşıyır”.
Bunun müqabilində Paris Almaniyanın avtomobil sənayesi üçün həyati əhəmiyyət daşıyan məsələdə güzəştə getməyə hazırlaşır.
Berlin Aİ-nin 2035-ci ildən etibarən yeni daxiliyanma mühərrikli avtomobillərin satışını faktiki dayandıran qaydalarının yumşaldılmasını tələb edir. Almaniya avtomobil istehsalçılarına daha çox çeviklik verilməsini və alternativ yanacaq növlərinin istifadəsinə imkan yaradılmasını istəyir.
Məsələ Almaniya üçün xüsusilə həssasdır. Ölkənin avtomobil sənayesində böhran dərinləşir və Volkswagen bu yaxınlarda dünya üzrə 100 min iş yerini ixtisar etmək məcburiyyətində qala biləcəyi barədə xəbərdarlıq edib.
Fransa indiyədək 2035-ci il hədəfini Avropa Yaşıl Sazişinin əsas elementlərindən biri kimi müdafiə edirdi. Lakin son dövrdə Paris də Aİ-nin bəzi ekoloji qaydalarına daha tənqidi yanaşmağa və Avropada istehsalı qoruyan şirkətlər üçün müəyyən güzəştlərə açıq olduğunu göstərməyə başlayıb.
Bütün bunlar Aİ ilə Çin arasında ticarət münasibətlərinin gərginləşdiyi bir vaxta təsadüf edir. Brüssel eyni zamanda Avropa şirkətlərini xarici rəqabətdən qorumaq və strateji istehsalı yenidən qitəyə qaytarmaq yollarını axtarır.
Beləliklə, Paris-Berlin kompromisi baş tutarsa, Fransa daha sərt “Made in Europe” siyasəti üçün Almaniyanın dəstəyini qazanacaq, Almaniya isə öz növbəsində avtomobil sənayesinin çoxdan tələb etdiyi 2035-ci il qaydalarının yumşaldılmasına nail ola bilər.
Musavat.com
