Druz dağ özünümüdafiə qüvvələri Suriyanın cənubundakı Əs-Suveyda əyalətində hökumət və ərəb qəbilə qüvvələrinə hücum edib.
Musavat.com xəbər verir ki, məlumatı Əl-İhbariyə yayıb. Bildirilir ki, Tell Hadid yüksəkliklərinə minaatan mərmiləri atılıb. Hərbçilər və ya milis üzvləri arasında itkilər barədə heç bir məlumat verilməyib.
Yerli hakimiyyət orqanları bu hücumu atəşkəs razılaşmasının ciddi şəkildə pozulması kimi qiymətləndirib. Buna cavab olaraq ordu bölmələri Rassasdakı Druz qalasına artilleriya zərbələri endirib. Telekanalın məlumatına görə, bir neçə əsgər və mülki şəxs yaralanıb və xəstəxanaya yerləşdirilib.
Respublika Daxili İşlər Nazirliyinin nümayəndəsi Nurəddin əl-Babanın sözlərinə görə, druzların özünümüdafiə qüvvələri tərəfindən hər gün baş verən atəşkəs pozuntuları vəziyyəti qeyri-sabitləşdirir və əhalinin normal həyat qurmasına mane olur.
Musavat.com
