Ermənistan parlamentinin spikeri Alen Simonyan ölkənin ikinci prezidenti Robert Köçəryana qarşı rəsmi məhkəmə iddiası qaldırıb.
Musavat.com xəbər verir ki, spiker keçmiş prezidentdən onu təhqir etdiyi üçün ictimai şəkildə üzr istəməsini və 2647 dollar (təxminən 1 milyon dramdan çox) məbləğində təzminat ödəməsini tələb edir.
Mübahisəyə səbəb olan "ordu" dialoqu
Qalmaqalın kökü Robert Köçəryanın 29 yanvar 2026-cı il tarixində keçirdiyi mətbuat konfransına söykənir. Konfrans zamanı jurnalistlərdən biri Alen Simonyanın Ermənistan ordusundakı acınacaqlı vəziyyət — qida və su çatışmazlığı, zabitlərin əsgərləri alçaltması barədə tənqidi fikirlərini sitat gətirərək Köçəryana sual ünvanlayıb. Jurnalist bu vəziyyətin Köçəryanın hakimiyyəti illəri ilə üst-üstə düşdüyünü qeyd edib.
"Belə alçaqlar normal xidmət edə bilməz"
Köçəryan bu suala kəskin və təhqiramiz ifadələrlə cavab verib. Eks-prezident spikerin hərbi məsələlərdən anlamadığını iddia edərək aşağıdakı ifadələri işlədib:
"O adamın ordudan nə başı çıxır? Ümumiyyətlə, onun normal xidmət etdiyinə şübhəm var. Çünki belə alçaqlar (merzafsi) normal xidmət edə bilməzlər".
Məhkəmə iddiası və tələblər
Alen Simonyan bu sözləri şəxsi ləyaqətinin və işgüzar nüfuzunun birbaşa təhqir olunması kimi qiymətləndirib. Məhkəməyə təqdim olunan iddia sənədində bildirilir ki, Köçəryan işlətdiyi ifadələrə görə mətbuat qarşısında təkzib verməli və qanunla müəyyən edilmiş maksimum məbləğdə cərimə ödəməlidir.
Qeyd edək ki, bu, iki siyasətçi arasında ilk məhkəmə çəkişməsi deyil. Tərəflər daha əvvəl də qarşılıqlı ittihamlarla məhkəməyə müraciət ediblər, lakin bu dəfəki "alçaq" ifadəsi Ermənistan cəmiyyətində və siyasi dairələrində ciddi rezonans doğurub.
Musavat.com
