Daxili qanaxma səbəbilə xəstəxanaya yerləşdirilən məşhur aktyor Murat Cemcir yaşadığı çətin günlərdən sonra ilk açıqlamasını verib.
Musavat.com xəbər verir ki, vəziyyəti stabilləşən 49 yaşlı aktyor palataya köçürülüb.
Tezliklə evə buraxılacağını bildirən Cemcir öz paylaşımında qeyd edib:
“3 gecə reanimasiyada qaldıqdan sonra… 72 saat gözləmək… Ömrümün bitmək bilməyən ən uzun saatları idi…”
“Salam, ikinci həyat” sözləri ilə müraciət edən aktyor sağalması üçün yanında olan, ona dua edən hər kəsə minnətdarlığını bildirib.
Murat Cemcir qeyd edib:
“Tibb, əlbəttə, əlindən gələni etdi və edəcək də… Keçirdiyim əməliyyatları dəyərləndirəndə anladım ki, Allah məni qoruyub. Doğum günümü reanimasiyada qeyd etməyim də prosesin rəngli hissəsi idi”.
Qeyd edək ki, Cemcir “Çalgı Çengi”, “Düğün Dernek”, “Ailecek Şaşkınız” və “Kardeş Payı” kimi məşhur layihələrdə rol alıb.
Musavat.com
