Qazaxıstan Baş Prokurorluğu 2021-ci ildə Çeçenistandakı gizli həbsxanadan qaçan çeçen fəalı Mansur Movlayevin Rusiyaya ekstradisiya edilməsini təsdiqləyib.
Ölkənin məhkəmə və hüquq-mühafizə sistemlərini tənqid edən nəşrlərinə görə əvvəllər vəzifəsindən kənarlaşdırılmış insan haqları fəalı Murat Adam Qazaxıstan agentliyinin qərarını açıqlayıb.
Movlayevin dəstək qrupu onun həyatı üçün narahat olduğunu bildirir.
Fəallar bildiriblər ki, o, Salman Tepsurkayevin öldürüldüyü kimi, 100% ehtimalla öldürüləcək.
Tepsurkayev 2020-ci ildə Yanqulbayev qardaşları tərəfindən idarə olunan müxalifət kanalı 1ADAT ilə əlaqədə şübhəli bilinərək qaçırılan 19 yaşlı çeçendir. Müxalifət nümayəndələrinin sözlərinə görə, gənc oğlan cinsi zorakılığa məruz qalıb və onun alçaldıcı videoları çəkilib. Çeçen müxalifəti iddia edir ki, daha sonra hərbi təlim poliqonunda Salmanın ağzında qumbara partladaraq öldürüblər.
Movlayev isə narkotiklə əlaqəli cinayətlərdə ittiham edildikdən sonra gizli həbsxanaya salınıb. 1ADAT-ın məlumatına görə, qaçan yeganə şəxs o olub.
Rusiyada Movlayevə qarşı 1ADAT hərəkatını maliyyələşdirməkdə ittiham irəli sürülüb. "Insider" nəşri bildirir ki, Movlayev həmçinin Çeçenistan təhlükəsizlik qüvvələrini intim video görüntülərindən istifadə edərək şantaj etməkdə ittiham oluna bilər.
2023-cü ildə həmin şəxs Qırğızıstanda sərhədi qanunsuz keçdiyinə görə saxlanılıb. Məhkəmə onu altı ay həbs cəzasına məhkum edib, ardınca Rusiyaya deportasiya edilib, lakin o, deportasiyadan yayınmağı bacarıb. Qazaxıstana gəldikdən sonra Movlayev yenidən saxlanılıb. Onun qaçqın statusu almaq cəhdi uğursuz olub - komissiya ötən ilin sonunda onun müraciətini rədd edib.
Musavat.com
