Məxfi “K” bölməsinin zabitləri rəsmi tədbirlərdə dəniz donanması geyimində görünsələr də, onlardan yalnız bir neçəsi dənizçidir
Rusiya Silahlı Qüvvələrinin ən məxfi strukturlarından biri Xüsusi Strateji Rabitə Xidməti və ya “K” xidmətidir.
Musavat.com novayaqazeta.eu-ya istinadən yazır ki, bölmənin zabitləri Vladimir Putini və yüksək ordu rəhbərlərinin “nüvə portfelləri”ni - daşıyaraq onları gecə-gündüz müşayiət edirlər.
Nüvə zərbəsinin endirilməsi bir neçə dəqiqə məsələsidir və bu səbəbdən dövlət başçısının komanda məntəqələri ilə əlaqəsini təmin edən “K” xidmətinin zabitləri həlledici rol oynayır.
Strateji Raket Qüvvələrinin Baş Komandanlıq Mərkəzi (RVSN) Moskva yaxınlığında- Vlasixada yerləşir. Orada SSRİ dövründə genişmiqyaslı müharibə zamanı fasiləsiz işləmək üçün nəzərdə tutulmuş nəhəng yeraltı komplekslər tikilib. Onlar avtonom həyati dəstək sistemləri ilə təchiz olunub və hətta post-apokaliptik şəraitdə də işləmək üçün nəzərdə tutulub.
“K” xidmət qrupları məhz bu mərkəzlərin əməkdaşlarından formalaşır. Bu bölmənin adı ictimaiyyətə açıq olan sənədlərdə cəmi iki dəfə çəkilib. Jurnalistlər qeyd edirlər ki, bir çoxları üçün Xüsusi Strateji Rabitə Xidməti hərbi karyeralarının zirvəsidir. Bəziləri orada 15 il və ya daha çox xidmət edir, sonra ya təqaüdə çıxır, ya da hərbi sənaye kompleksinə daxil olur.
İki il əvvəl “Proyekt” 2019-cu ilə qədər Putinin “nüvə portfelini” daşıyan iki zabitin adını öyrənmişdi: Birinci rütbəli kapitanlar Dmitri Şumeyko və Vladimir Poleşçuk.
Araşdırma nəticəsində ümumilikdə, gizli bölmə ilə əlaqədə olan 53 nəfəri müəyyən ediblər. Onların arasında 1 general-mayor, üç birinci dərəcəli kapitan, 35 polkovnik və rütbəsi məlum olmayan 14 mülki vardı.
Araşdırmaya görə, “K” bölməsinə polkovnik Andrey Juravlev komandirlik edir.
"K" xidmətinin zabitləri rəsmi tədbirlərdə dəniz donanması geyimində görünsələr də, onlardan yalnız bir neçəsi dənizçidir. Bu ənənə SSRİ-nin birinci prezidentinin həyat yoldaşı Raisa Qorbaçovanın təşəbbüsü ilə yaranıb. Jurnalistlər bölmənin donanma ilə əlaqəsi olan yalnız üç zabitini müəyyən ediblər.
“K” xidmətinin zabitlərinin yüksək məsuliyyət səviyyəsinə baxmayaraq, maaşları 2022-ci ilə qədər təxminən 140-150 min rubl olub, lakin Ukraynada müharibə başlayandan sonra artıb. Bəzi zabitlər indi 260 minə qədər məvacib alır. Zabitlərin əksəriyyəti Moskva yaxınlığındakı Vlasixada və ya onun yaxınlığında yaşayır və kifayət qədər təvazökar həyat tərzi keçirirlər.
“K” xidmətini daha çox “nüvə portfeli” kimi tanınan avtomatlaşdırılmış “Kazbek sistemi” ilə əlaqəlidir. “Kazbek”in inkişafı SSRİ-də 1970-ci illərdə, Amerika raketlərinin Avropada yerləşdirildiyi zaman başlayıb. Plana görə, böyük münaqişə baş verərsə, təhlükəsiz rabitə üçün mobil terminal Sov.İKP MK-nın Baş katibinə istənilən yerdən cavab zərbəsi endirmək əmri verməyə imkan verməli idi.
“Kazbek” sistemi raket hücumu siqnalını aldıqda prezident və hərbi komandanlığa təhlükəsiz kanal vasitəsilə əlaqə saxlamağa və hücumu koordinasiya etməyə imkan verir. Onlar “nüvə portfeli”ni daşıyırlar və təhlükəsizliyini təmin edirlər. Həmişə əlində portfeli olan ən azı iki zabit var: biri əsas, digəri ehtiyat nüsxəni daşıyır. Belə ki, ölkənin hərbi-siyasi rəhbərliyi məhv edilsə belə, Rusiyanın nüvə arsenalı “Perimetr” sistemi sayəsində cavab zərbəsi endirmək iqtidarındadır. Sistemə xüsusi sensorlar şəbəkəsi və raket hücumu xəbərdarlığı sistemi ilə rabitə kanalı daxildir. Sensorlar Rusiya ərazisində nüvə partlayışlarını aşkar edərsə, avtomatik olaraq xüsusi raketlər buraxılır. Bu raketlər döyüş başlığı daşımır, əvəzində onlar Rusiya nüvə silahlarının buraxılması üçün nəzarət siqnallarını ötürən qurğularla təchiz olunublar. Rusiyada yüksək rəhbərliyin qərarı olmadan cavab zərbəsi üçün raketləri avtomatik buraxa biləcək sistem yoxdur.
“Perimetr” sistemi komanda ilə əlaqəni itirərsə, siqnalı birbaşa işə salan qurğulara ötürmək üçün nəzərdə tutulmuş komanda raketlərini işə sala bilər. Daha sonra “Yars” mobil raket sisteminin sağ qalan heyəti və ya Arktika buzlarında radarlardan gizlədilmiş nüvə sualtı qayığının ekipajı düşmən ərazisinə zərbə endirməlidir. Sistemin tərtibatçıları iddia edirlər ki, Putin və yüksək rütbəli hərbçilər təlimlər zamanı mütəmadi olaraq portfeldən istifadə edirlər. Əgər o, ondan təyinatı üzrə istifadə etmək qərarına gəlsə, yaxınlıqda yalnız onun təhlükəsizlik işçisi, adyutantlar (Putinin ən yaxın məxfi köməkçilərindən bəziləri) və “K” xidmətinin bir neçə zabiti olacaq.
Musavat.com
